قازاقستان رەسەيگە سالىنعان حالىقارالىق ساۋدا سانكتسيالارىن ورىنداۋى كەرەك. ءماجىلىستىڭ جالپى وتىرىسىندا «اق جول» فراكتسياسىنىڭ دەپۋتاتتىق ساۋالىن ازات پەرۋاشەۆ جاريالادى. 

قازاقستان رەسپۋبليكاسىنىڭ
پرەمەر-ءمينيسترى
ءا.ءا. سمايىلوۆقا

وتكەن اپتادا بىرقاتار بۇقارالىق اقپارات قۇرالدارى اقش-تىڭ قارجى جانە ساۋدا مينيسترلىكتەرى مەن ۇلىبريتانيانىڭ سانكتسيالار باسقارماسى دەلەگاتسياسىنىڭ رەسەيگە قارسى شارالاردى اينالىپ وتۋگە كومەكتەسكەنى ءۇشىن قازاقستاندىق كومپانيالارعا ۋكراينادا سوعىس باستالعالى بەرى حالىقارالىق قاۋىمداستىق ەنگىزگەن قايتالاما سانكتسيالار قولدانۋ قاۋپى ارتقانىن مالىمدەگەنى تۋرالى حابارلادى.

اتاپ ايتقاندا، حالىقارالىق سەرىكتەستەر قازاقستاننان رەسەيگە ەلەكترونيكا ەكسپورتى كولەمىنىڭ 22 ەسەگە كۇرت ۇلعايعانىنا كۇمان كەلتىرەدى، مۇنى ولار ءۇشىنشى ەلدەردەن سانكتسيالانعان ونىمدەردى «پاراللەلدى يمپورت» جانە جالعان ترانزيت جولىمەن جاسىرىن رە-ەكسپورتتاۋ، ياعني، ەۋروپادان كەلەتىن تاۋارلار ءبىزدىڭ ەلگە جەتپەستەن، رەسەيلىك كومپانيالار تۇرىندەگى تۇپكى تۇتىنۋشىلارعا جارتى جولدا «قايتا ساتىلۋ» تاجىريبەسىمەن بايلانىستىرادى.

سونىمەن قاتار، قازاقستاننىڭ سىرتقى ىستەر مينيسترلىگى حالىقارالىق قۇقىق پەن الەمدىك قاۋىمداستىق ەنگىزگەن ساۋدا شەكتەۋلەرىن ساقتاۋدى جاقتايتىنىمىزدى بىرنەشە رەت راستادى.

اتالعان دەلەگاتسيانىڭ، اتاپ ايتقاندا، اقش قارجى ءمينيسترىنىڭ كومەكشىسى ەليزابەت روزەنبەرگ پەن اقش ساۋدا ءمينيسترىنىڭ كومەكشىسى مەتتيۋ اكسەلرودتىڭ مالىمدەمەلەرى باق-تا ەكىۇداي ماعىنادا تارالعانىنا بايلانىستى جانە قايتالاما سانكتسيالار سالىنعان جاعدايدا ەكونوميكامىزعا، بيزنەسىمىزگە جانە جالپى ءومىر ءسۇرۋ دەڭگەيىنە ۇلكەن ەكونوميكالىق زيان كەلەتىنىن ەسكەرە وتىرىپ، «اق جول» قدپ دەپۋتاتتىق فراكتسياسى حالىقارالىق سانكتسيالاردى مۇلتىكسىز ورىنداپ، سونىمەن قاتار، كەلەسىنى حابارلاۋدى سۇرايمىز:

1) اتالعان دەلەگاتسيا ءبىزدىڭ ەلگە قانداي دا ءبىر پراكتيكالىق تالاپتار قويدى ما، اتاپ ايتقاندا، حالىقارالىق شەكتەۋلەردى بۇزعان ناقتى قازاقستاندىق كومپانيالاردى نەمەسە بانكتەردى اتاپ ءوتتى مە؟

اتالعان بولسا، مۇنداي زاڭبۇزۋشىلىقتارعا قانداي كومپانيالار جول بەرگەن جانە ولارعا قاتىستى تەرگەۋ جۇرگىزىلە مە؟

2) رەسەي فەدەراتسياسىمەن ساۋدادا حالىقارالىق سانكتسيالاردى ساقتاۋ بويىنشا ۇكىمەت تاراپىنان قانداي ناقتى شارالار قابىلدانۋدا؟ سونىڭ ىشىندە، قازاقستان مەن رەسەي اراسىنداعى ءوزارا ساۋدا كولەمى مەن ەكونوميكالىق بايلانىستاردىڭ اۋقىمىن ەسكەرە وتىرىپ، ءىرى بيزنەس پەن شوب دەڭگەيىندە سانكتسيالانعان تاۋارلاردىڭ تىزبەسىنە قاتىستى ءتۇسىندىرۋ جۇمىستارىن جۇرگىزۋگە بايلانىستى.

3) سونداي-اق، ساۋدا-ەكونوميكالىق قارىم-قاتىناستاردىڭ اۋقىمىن ەسكەرە وتىرىپ، ۇكىمەت رەسەيمەن ساۋدادا كورسەتىلگەن شەكتەۋلەردەن قازاقستان ەكونوميكاسىنا كەلەتىن پوتەنتسيالدى شىعىندى ەسەپتەدى مە، ەسەپتەلسە، ءۇشىنشى ەلدەرمەن مۇنداي شىعىندى وتەۋ بويىنشا كەلىسسوزدەر جۇرگىزىلىپ جاتىر ما؟

قۇرمەتپەن،

«اق جول» قدپ فراكتسيا دەپۋتاتتارى

Abai.kz