الەۋمەتتىك جەلىدە چاپاەۆ ەسكەرتكىشى تۋرالى ماسەلە كوپتەن قوزعالىپ كەلەدى. بىرەۋلەر كەنەسارى حان تۇرۋى كەرەك دەيدى. ال مەن ابىلقايىر حان تۇرۋى كەرەك دەيمىن.

ورال قالاسىنداعى تەمىرجول ۆوكزالىنىڭ الدىنداعى چاپاەۆ ەسكەرتكىشىنىڭ ورنىنا ابىلقايىر حاننىڭ ەسكەرتكىشى تۇرعانى دۇرىس دەپ ويلايمىن.

چاپاەۆتىڭ قازاق جەرىنە، ورال وڭىرىنە قاتىستى تاريحى بەلگىلى. بىراق بۇگىنگى كۇنى تاريحي سانامىزعا قايتا قاراپ، ءوز جەرىمىزدىڭ تاريحىندا ايرىقشا ورنى بار تۇلعالاردى ۇلىقتايتىن ۋاقىت كەلدى.

ءوز جەرىمىزدە كىمدەردى ۇلىقتايمىز، كەلەر ۇرپاققا قانداي تاريحتى كورسەتەمىز دەگەن ماسەلە وزەكتى.

ابىلقايىر حان — قازاق تاريحىنداعى كۇردەلى دە ماڭىزدى تۇلعا. ونىڭ رەسەيمەن بايلانىس ورناتۋى، ەلدىڭ سىرتقى ساياساتىنا قاتىستى شەشىمدەرى — تاريحشىلار اراسىندا ءالى دە تالقىلاناتىن ماسەلەلەر. بۇل جەردە بىرجاقتى پىكىر ايتۋعا بولمايدى. ويتكەنى سول كەزەڭدەگى ساياسي جاعداي، جوڭعار قاۋپى، ىشكى الاۋىزدىق پەن سىرتقى كۇشتەردىڭ ىقپالى قاتار جۇرگەن.

بىراق ابىلقايىر حاننىڭ ءوز زامانىنىڭ ساياسي كوشباسشىسى بولعانىن جوققا شىعارا المايمىز. ونىڭ ءومىرى مەن قىزمەتى قازاق تاريحىنىڭ ءبىر بولىگى.

ال ونىڭ قازا تابۋى — تاريحتاعى ۇلكەن وكىنىشتەردىڭ ءبىرى. قازاق ەلىنىڭ بىرلىگىن ساقتاپ، ەل تاعدىرىن شەشكەن تۇلعانىڭ ءوز ىشىمىزدەگى ساياسي تارتىستىڭ قۇربانى بولۋى — بىزگە ساباق بولۋى كەرەك.

ابىلقايىر حاندى ولتىرمەگەن دە جوسپارى كوپ ەدى. رەسەي وتارلاپ الماۋى دا مۇمكىن. رەسەيگە قوسىلۋ شەشىمى ۇلكەن جوسپار ەدى…

سوندىقتان ورال قالاسىنىڭ تورىندە، تەمىرجول ۆوكزالى سەكىلدى قالاعا كىرىپ كەلگەن ادامنىڭ ەڭ العاش كورەتىن جەرىندە چاپاەۆتىڭ ەمەس، قازاق تاريحىنداعى ءىرى تۇلعالاردىڭ ءبىرى — ابىلقايىر حاننىڭ ەسكەرتكىشى تۇرسا، بۇل تاريحي جادىمىزدى جاڭعىرتۋعا جاسالعان ماڭىزدى قادام بولار ەدى.

بۇگىن ءبىز ەسكەرتكىشتىڭ ورنىن وزگەرتسەك، ەرتەڭ ۇرپاعىمىز:

«بۇل جەردە قازاقتىڭ تاريحىنداعى قانداي تۇلعا تۇردى؟» — دەپ سۇرايدى.

سول سۇراققا ماقتانىشپەن جاۋاپ بەرەتىندەي شەشىم قابىلدايتىن ۋاقىت كەلدى.

ورالدىڭ ءتورى — ورالدىڭ تاريحىنا لايىق بولۋى كەرەك!

چاپاەۆتىڭ ورنىنا ابىلقايىر حان تۇرسىن!

جالعاس نيگمەت

Abai.kz