6 مامىر كۇنى كاسپي تەڭىزى جاعالاۋىنان 15 يتبالىق جانە 4 بەكىرە بالىعىنىڭ ولەكسەسى تابىلدى. وقيعا بويىنشا قىلمىستىق ءىس قوزعالدى. بۇل تۋرالى ەكولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتىنىڭ ءباسپاسوز قىزمەتى حابارلادى.

«6 مامىر كۇنى جەرگىلىكتى ۋاقىت ساعات 19:00 شاماسىندا تۇسكەن اقپاراتقا سايكەس، جايىق – كاسپي وبلىسارالىق باسسەيندىك بالىق شارۋاشىلىعى ينسپەكتسياسى مەن ماڭعىستاۋ وبلىستىق بالىق ينسپەكتسياسى باسقارماسىنىڭ مەملەكەتتىك ينسپەكتورلارى مونيتورينگ جۇرگىزۋ بارىسىندا تۇپقاراعان اۋدانى باۋتينو اۋىلى تۇسىنداعى كاسپي تەڭىزى جاعالاۋىنان 15 يتبالىق پەن 4 بەكىرە بالىعىنىڭ ولەكسەسىن تاپتى.

ماڭعىستاۋ وبلىسى بويىنشا ەكولوگيا دەپارتامەنتى يتبالىقتار تابىلعان جەردەن سۋ مەن اۋا سىنامالارىن الدى. تابىلعان تەڭىز جانۋارلارى ۇشالارىنىڭ ىدىراۋ دەڭگەيى جوعارعى دارەجەدە بولعاندىقتان، وقيعا سەبەبىن انىقتاۋ ءۇشىن گيستولوگيالىق سىناما الۋ مۇمكىن بولمادى»، - دەلىنگەن بالىق شارۋاشىلىعى كوميتەتىنىڭ Facebook-پاراقشاسىندا جاريالانعان حابارلامادا.

ءمالىم بولعانداي، اتالعان دەرەك بويىنشا قىلمىستىق ءىس قوزعالعان. ونىڭ شەڭبەرىندە جانۋارلاردىڭ ولىمىنە سەبەپ بولعان ءمان-جايلار انىقتالادى. بالىق شارۋالشىلىعى كوميتەتى تاراتقان اقپاراتقا ساي، ينسپەكتسيا قىزمەتكەرلەرى كاسپي تەڭىزىنىڭ جاعالاۋىنا مونيتورينگ جۇرگىزىپ جاتىر.

ەسكە سالا كەتەيىك، بىلتىر دا كاسپي تەڭىزىندە جاپپاي يتبالىق قىرىلعان بولاتىن. ول وقيعاعا قاتىستى زەرتتەۋ جۇرگىزگەن بالىق شارۋاشىلىعى كوميتەتى قورىتىندىنى بيىل شىعاردى. ۆەدومستۆو اقپاراتىنا قاراعاندا، يتبالىقتاردىڭ قىرىلۋىنا پنەۆمونيا سەبەپ بولعان.

Abai.kz