كەشەگى 9 مامىر مەرەكەسى جايلى اڭگىمە ەسىمنەن كەتپەي تۇر. اسىرەسە، پرەزيدەنتىمىز توقاەۆتىڭ ماسكەۋدەگى اسكەري شەرۋگە بارعاندىعى جايلى. مۇنى ءبىراز وقىرماندار دۇرىس بولعان دەپ ەسەپتەمەيدى. ءتىپتى قاسەكەڭدى ءپۋتيننىڭ قولبالاسىنا بالاپ، ءبىراز جەرگە اپارىپ تاستادى. مەنىڭشە، بۇل تىم اسىعىس جاسالعان قورىتىندى سەكىلدى.

بۇل ۇلكەن ساياسات. رەسەي ءالى دە كۇشتى مەملەكەت. قازاقتا "جىلاندى ءۇش كەسسەڭ دە، كەسىرتكەلىك ءالى بار" دەگەن بەكەر ايتىلماسا كەرەك.

ونىڭ ۇستىنە، ۇزاقتىعى 7,5 مىڭ شاقىرىمعا جەتەتىن اشىق-شاشىق شەكارامىز بار. اسكەري قاۋقارىمىز دا شامالى. سوندىقتان "جەتى ولشەپ، ءبىر كەسۋگە" ءماجبۇرمىز. ونىڭ ۇستىنە ول بۇل شەرۋگە جالعىز بارعان جوق. الدىمەن جۇرتتان بۇرىن جەلپىلدەپ قىرعىزدىڭ جاپاروۆى جەتتى ماسكەۋگە. ارمياننىڭ رەسەيگە دەگەن وكپەسى قارا قازانداي پاشينيانى دا شەت قالۋدى ءجون كورمەپتى. انشەيىندە شىرەنىپ جۇرەتىن وزبەكتەردىڭ ماڭگىلىك پرەزيدەنتى ميرزيەۆ تە ءپۋتيننىڭ جانىنان تابىلىپتى.

ەندى وسىلاردان ءبولىنىپ، "جوق، مەن بارمايمىن!" دەپ ءجونسىز قيسايىپ قالۋ قالاي بولار ەكەن؟ ولاي ەتسە، ەرتەڭ ءپۋتيننىڭ قاھارىنان وسى كورشىلەرىمىز قورعاپ قالادى دەپ ويلاۋدىڭ ءوزى كۇلكىلى.

تاعى ءبىر جاي، توقاەۆ تەك ماسكەۋمەن شەكتەلگەن جوق. ول رەسەيدەگى سول سوعىستا شەيىت بولعان قازاقستاندىق جاۋىنگەرلەردىڭ بەيىتتەرىنىڭ باسىنا بارىپ، تاعزىم ەتىپ قايتتى. ءسويتىپ، پرەزيدەنتتىك قانا ەمەس، ازاماتتىق پارىزىن دا وتەدى.

ال ەڭ باستىسى، قازىر وسى ءپۋتيننىڭ جانىندا جاپىرىلىپ جۇرگەن تمد باسشىلارىنىڭ ىشىندە قايسىسى كەزىندە سول پۋتينگە قارسى قاراپ تۇرىپ، ەش تايسالماستان ء"بىز لحر، دحر دەگەن جاساندى مەملەكەتتەردىڭ ەشقايسىسىن دا مويىندامامايمىز!" دەپ ايتۋعا كىمنىڭ ءداتى بارىپ ەدى؟

وسىلاي دەگەن ادامدى ءپۋتيننىڭ ايتقانىنان شىعا المايدى دەپ كىنا ارتۋعا ەشكىمنىڭ دە مورالدىق قۇقى جوق دەپ سانايمىن.

مەنىڭ وسى ماسەلە جايلى قىسقاشا ويىم وسى. قىسقاسى، اقىلعا سالايىق، اعايىن!

جايبەرگەن بولاتوۆ

Abai.kz