بيىل ءۇش ايدا سىبايلاس جەمقورلىق قىلمىسىنا قاتىسى بار 414 ادام انىقتالدى. كۇدىكتىلەر سانى وتكەن جىلدىڭ سايكەس كەزەڭىمەن سالىستىرعاندا 8%-عا از. اتاپ ايتقاندا بىلتىر ۇقساس كەزەڭىندە 450 ادام انىقتالعان بولاتىن، دەپ جازدى Finprom.kz.

Finprom.kz دەرەگىنشە، 414 كۇدىكتىنىڭ ىشىندە 307 ادامعا قاتىستى ءىس – اۋىر، 88 كۇدىكتىنىڭ ارەكەتى - ورتاشا اۋىر، 16 ادام - اسا اۋىر جانە تاعى ۇشەۋىنىڭ ءىسى اۋىر ەمەس قىلمىستار ساناتىنا جاتقىزىلعان.

جەمقورلىق بويىنشا ايىپتالعانداردىڭ كوبى استانادا تىركەلدى - 64 ادام. بىلتىرمەن سالىستىرعاندا بۇل كورسەتكىش 14,3%-عا كوپ. سونىمەن قاتار، مۇنداي قىلمىستار الماتى (55 ادام) مەن تۇركىستان وبلىسى (37 ادام), شىمكەنت قالاسى (29 ادام) جانە اقتوبە وبلىسىندا (27 ادام) ءجيى انىقتالعان.

ال، اتالعان قىلمىستار ەڭ از انىقتالعان وڭىرلەر – ۇلىتاۋ (2 ادام), اباي (2 ادام), پاۆلودار (6 ادام) جانە قىزىلوردا (8 ادام) وبلىستارى.

كۇدىكتىلەردىڭ ىشىندە 155 ادامعا پارا بەردى دەگەن ايىپ تاعىلدى. تاعى 124 ادام پارا الدى، 58 ادام سىبايلاس جەمقورلىقپەن بايلانىستى الاياقتىق جاسادى، 19 ادام سەنىپ تاپسىرىلعان وزگەنىڭ مۇلىكىن يەمدەندى نەمەسە ىسىراپ ەتتى، 18 ادام لاۋازىمدىق وكىلەتتىكتەرىن اسىرا پايدالاندى دەگەن كۇدىككە ىلىكتى.

سىبايلاس جەمقورلىق قىلمىستارى ءۇشىن سوتقا جولدانعان قىلمىستىق ىستەردىڭ 26,1%-ى (61 ادام) ىشكى ىستەر ورگاندارىنىڭ قىزمەتكەرلەرىنە قاتىستى. سونداي-اق، 39 كۇدىكتى اكىمدىكتەر مەن وعان قاراستى قۇرىلىمدىق بولىمشەلەردە ەڭبەك ەتكەن. بۇعان قوسا، اتالعان تىزىمدە قارجى مينيسترلىگىنىڭ 7 قىزمەتكەرى، يندۋستريا جانە ينفراقۇرىلىمدىق دامۋ مينيسترلىگىنىڭ 6 جۇمىسكەرى مەن ءىىم قىلمىستىق-اتقارۋ جۇيەسى كوميتەتىنىڭ 4 مامانى بار.

Abai.kz