قىزىلوردالىق وقۋشى سادىق روزا ماتەماتيكانى وقىتۋدىڭ ادىستەمەسىن جەتىلدىرەتىن جاڭا ماتەماتيكالىق كەستە ويلاپ تاۋىپتى. زەرتتەۋ جۇمىسىنىڭ جۇرگىزىلۋ ناتيجەسىندە ۇلتتىق زياتكەرلىك مەنشىك ينستيتۋتى تالابىنا ساي جاس اۆتور روزا مەن جەتەكشىسى عابيدەن تولەبايۇلىنا ساندىق كۋالىك بەرىلدى. اتالمىش كەستە «روزا – ولشەم بىرلىكتەر كەستەسى» دەپ رەسمي اتالدى.

قىزىلوردا قالاسى ي.ۆ.پانفيلوۆ اتىنداعى №5 مەكتەپ-ليتسەيىندە ءبىلىم الاتىن جاس ورەننىڭ بۇل جاڭالىعى «زەردە» رەسپۋبليكالىق عىلىمي زەرتتەۋ جوبالارى كونكۋرسىنىڭ رەسپۋبليكالىق كەزەڭىندە ۇزدىك دەپ تانىلىپ، عالىمداردىڭ تاڭدانىسىن تۋعىزعان. ناتيجەسىندە اتالمىش بايقاۋدا گران-پري يەگەرى اتاندى.

«جوبانىڭ باستى جاڭالىعى – ماتەماتيكالىق ولشەم بىرلىكتەرمەن جۇمىس ىستەۋدىڭ ادىستەمەلىك كەستەسىن ەسەپتەر شىعارۋ بارىسىندا قولدانۋ. ماتەماتيكانى وقىتۋدىڭ ادىستەمەسىن جەتىلدىرەتىن بۇل جاڭا كەستە بۇگىندە ءبىلىم بەرۋ ۇيىمدارىندا ساباق پروتسەسىندە قولدانىلىپ كەلەدى»، – دەدى روزانىڭ جەتەكشىسى عابيدەن تولەبايۇلى.

ايتا كەتەيىك، ءبىلىم باسەكەسىندە 600-گە جۋىق قاتىسۋشىنىڭ اراسىنان دارا شىققان قىزىلوردالىق وقۋشىنىڭ بۇل ەڭبەگى ماتەماتيكا عىلىمىنا تاعى ءبىر جاڭا فورمۋلا رەتىندە ەنگىزىلىپ وتىر.

Abai.kz