ەلوردانىڭ تۇرعىن ءۇي كەشەندەرىنىڭ بىرىندە بولعان ورتتەن 6 كولىك ورتەنىپ كەتتى، تاعى 4 ماشيناعا زاقىم كەلدى، دەپ حابارلادى توتەنشە جاعدايلار مينيسترلىگى.

بۇعان دەيىن ق. مۇحامەدحانوۆ كوشەسىندەگى تۇرعىن ءۇي كەشەنى پاركينگىندە ءورت شىققانى حابارلانعان ەدى. ءورت سوندىرۋشىلەر وقيعا ورنىنا 7 مينۋتتا جەتىپ، اۆتوتۇراقتا كولىكتەر جانىپ جاتقانىن انىقتاعان.

«6 ماۋسىم كۇنى ساعات 11:56-دا ق. مۇحامەدحانوۆ كوشەسىندەگى ۇيدە 3 قويما ءۇي-جايى مەن 6 جەڭىل كولىك ورتەندى، جىلۋ اسەرىنەن تاعى 4 اۆتوكولىككە زاقىم كەلدى. قۇتقارۋشىلاردىڭ كۇشىمەن، ونىڭ ىشىندە جوعارعى قاباتتاردان اۆتوباسپالداق ارقىلى 17 ادام ەۆاكۋاتسيالاندى، ونىڭ ىشىندە 6 بالا بار»، - دەپ حابارلادى مينيسترلىكتىڭ ءباسپاسوز قىزمەتىنەن.

«كومىرتەگى توتىعىمەن ۋلانۋ» الدىن الا دياگنوزىمەن 3 ادام اۋرۋحاناعا جەتكىزىلدى.

ءتىلسىز جاۋدىڭ تارالۋى ساعات 14:33-تە توقتاتىلىپ، 15:02-دە تولىعىمەن سوندىرىلگەن.

وقيعا ورنىندا 70 ءورت ءسوندىرۋشى مەن 18 تەحنيكا جۇمىس ىستەگەن.

Abai.kz