قۇراما شتاتتار تاياۋ شىعىسقا اقش قارۋلى كۇشتەرىندەگى ەڭ وزىق اسكەري ۇشاق - F-35 جويعىش-بومبالاعىشتارى مەن ەسمينەتس جىبەرەدى. سول ارقىلى ۆاشينگتون يران مەن رەسەيگە بەلگى بەرىپ وتىر. بۇل تۋرالى دۇيسەنبى كۇنى امەريكالىق اسكەر وكىلى مالىمدەدى.

اقش قورعانىس ءمينيسترى لللويد ءوستيننىڭ وسىنداي شەشىم قابىلداۋىنا ورمۋز بۇعازىنداعى حالىرالىق سۋ اۋماعىندا يراننىڭ ەكى تانكەردى باسىپ الۋعا تالپىنعانى سەبەپ بولدى. بۇل وقيعا ەكى اپتا بۇرىن تىركەلگەن. ۇشاقتار مەن كەمە تاياۋ شىعىسقا بارىپ، ماڭىزدى تەڭىز جولدارىنىڭ قاۋىپسىزدىگىن قاداعالايدى دەيدى پەنتاگون وكىلى سابرينا سينگ.

پەنتاگوندى يراننىڭ وسى ارەكەتى عانا الاڭداتىپ وتىرعان جوق دەپ جازدى Wall Street Journal. امەريكالىق اسكەريلەردىڭ ايتۋىنشا، كەيىنگى ۋاقىتتا امەريكالىق ۇشقىشسىز ۇشاقتار سيريا اسپانىندا رەسەيلىك ۇشاقتاردىڭ نىسانىنا اينالعان. ولار امەريكالىق درونداردىڭ راديكال تەرروريستىك توپتارعا قارسى وپەراتسيالار جۇرگىزۋگە كەدەرگى جاساعان.

وتكەن اپتادا رەسەيلىك بارلاۋ ۇشاعى سيريانىڭ وڭتۇستىك-شىعىسىنداعى امەريكالىق اسكەري بازاسىنىڭ ۇستىنەن ۇشىپ وتكەن. پەنگاتوننىڭ پىكىرىنشە، رەسەي وسى ارەكەتى ارقىلى ۆاشينگتونعا قىسىم جاساۋعا تالپىنىپ وتىر.

وزىق ۇلگىدەگى جويعىش-بومبالاعىشتار كومەگىمەن پەنتاگون ءتۇرلى جاعدايلارعا قاتىستى تەز ارادا ارەكەت ەتە الادى.

Abai.kz