الماتى وبلىسىنىڭ ورتالىعى قوناەۆ قالاسىندا وتاندىق جانە شەتەلدىك باق وكىلدەرى مەن ساراپشىلاردىڭ باسىن قوسقان ءى حالىقارالىق مەديا جانە تۋريزم فورۋمى ءوتتى.

اۋقىمدى ءىس-شارانىڭ اشىلۋ سالتاناتىندا ءسوز سويلەگەن وبلىس اكىمى مارات سۇلتانعازيەۆ ىشكى ءتۋريزمدى دامىتۋدا مەديا قۇرالداردىڭ ماڭىزدى ەكەنىن ەسكە سالدى.

«ەكى كۇن وڭىرىمىزگە دەگەن نازار ەرەكشە بولىپ تۇر. قوناەۆ قالاسىندا قوس بىردەي حالىقارالىق دەڭگەيدەگى شارا – مەديا جانە ءتۋريزمنىڭ حالىقارالىق فورۋمى جانە اۋە شارلارىنىڭ فەستيۆالى ءوتىپ جاتىر. الەمنىڭ 15-كە جۋىق مەملەكەتىنىڭ جانە ەلىمىزدىڭ كوپتەگەن وڭىرلەرىنىڭ باق-نىڭ وكىلدەرى قاتىسىپ وتىرعان مەديا فورۋمنىڭ ماڭىزى زور. بۇل ءىرى ەكى شارا ءوڭىرىمىز تۋرالى اقپاراتتىق كەڭىستىكتە وڭ پىكىر قالىپتاستىرادى دەگەن سەنىمدەمىز. سەبەبى، الماتى وبلىسى ءۇشىن ءتۋريزمدى دامىتۋ – بۇل ماڭىزدى ەكونوميكالىق فاكتور. جەلىگە تۋريستىك نىسان تۋرالى كوپ اقپارات تاراسا، سونشا كوپ ادام كورىپ، تۋريستىك ورىندارعا كەلەدى دەگەن ءسوز. سوندىقتان دا ءتۋريزمدى دامىتۋعا سەپ بولاتىن مەديا قۇرالداردى دامىتۋ ماڭىزدى»، - دەدى مارات سۇلتانعازيەۆ.

سونىمەن قاتار ول تۋريزمدەگى ينفراقۇرىلىم، قىزمەت ساپاسىن كوتەرۋ سىندى ماسەلەلەرگە دە توقتالىپ ءوتتى. بۇل ماسەلەلەردى شەشۋ باعىتىندا ۇكىمەتتىڭ قولداۋى دا جوق ەمەس.

«الماتى وبلىسىندا كاسىپكەرلەر تۋريستىك نىسانداردى سالسا، شىعىندارىنىڭ 10%-ىن، جول بويىنداعى سەرۆيستىك نىسانداردى سالسا 10%-ىن، تۋريستىك اۆتوبۋستار السا 25%-ىن قايتارۋ مەحانيزمى قاراستىرىلعان. اتالعان جانە باسقا دا كوپتەگەن ماسەلەلەردى شەشۋ قازىرگى كۇنى ازىرلەنىپ جاتقان وڭىرىمىزدە ءتۋريزمدى دامىتۋدىڭ ماستەر-جوسپارىنىڭ اياسىندا قاراستىرىلماق. بۇگىنگى شارا جەمىستى بولسىن»، - دەدى وبلىس اكىمى.

حالىقارالىق مەديا فورۋمنىڭ اشىلۋ سالتاناتىنا ارنايى كەلگەن قر اقپارات جانە قوعامدىق دامۋ ءمينيسترى دارحان قىدىرالى فورۋم قاتىسۋشىلارىن قۇتتىقتادى.

«بارشاڭىزدى جەتىسۋ جەرىندە تۇركىتىلدەس جۋرناليستەر قورى ۇيىمداستىرىپ وتىرعان فورۋمنىڭ اشىلۋىمەن قۇتتىقتايمىن. مەملەكەت باسشىسىنىڭ جارلىعىمەن الماتى وبلىسى ەكىگە ءبولىنىپ، جاڭا وبلىس ورتالىعى قاپشاعاي قالاسىنا د.قوناەۆتىڭ ەسىمىن بەرۋ -  تاريحي ادىلەتتىلىك بولدى. وبلىسقا العاش رەت كەلىپ وتىرعاندىقتان، ءوڭىر باسشىلىعىن وسى تاريحي شەشىممەن قۇتتىقتايمىن. وزدەرىڭىزگە بەلگىلى، ەل اراسىندا «تاريح شۋمەردەن باستالادى» - دەگەن ءسوز بار، ال ءبىزدىڭ تاريحىمىز ىلە وزەنىنەن باستالادى. ءتىپتى، كونە تۇرىك كۇنتىزبەلىك مۇشەل جىل ساناۋى ىلە وزەنىمەن بايلانىستى. قوناەۆ قۇرىلعالى بەرى اۋقىمدى ءىس-شارالار ۇيىمداستىرىلىپ كەلەدى. وبلىس اكىمى ايتىپ كەتكەندەي، ءتۋريزمدى دامىتۋ ءۇشىن باق-نىڭ اقپاراتتىق ناسيحاتى ماڭىزى ەرەكشە. بۇگىنگى مەديا مەن ءتۋريزمدى ءبىر جەرگە توعىستىرعان فورۋم الماتى وبلىسىنىڭ ءتۋريزمى دامۋىنا سەپتىگىن تيگىزەدى»، - دەدى مينيستر.

شارانىڭ ۇيىمداستىرۋشىسى، تۇركىتىلدەس جۋرناليستەر قورىنىڭ پرەزيدەنتى ءنازيا جويامەرگەنقىزى الەمدىك ءتۋريزمنىڭ پاندەميادان كەيىن دامىعانىن تىلگە تيەك ەتىپ، بىلتىرعى كىرىس 1 ترلن اقش دوللارعا جەتكەنىن اتاپ ءوتتى.

«الماتى وبلىسى – قازاقتىڭ ەجەلگى ادەت-عۇرپى، تاريحى، سالت-ءداستۇرىنىڭ ەڭ باستى دامۋ مەكەنى. سول سەبەپتى فورۋم بيىل وسى جەردە ۇيىمداستىرىلىپ وتىر. تامىزدا انتاليادان جۋرناليستەر كەلىپ، ءوڭىر باسشىسىنىڭ قولداۋىمەن بۇل جەردە تاعى دا اۋقىمدى شارا وتەدى. وندا ءتۋريزمدى دامىتۋ، ينۆەستيتسيا تارتۋ سەكىلدى ماسەلەلەر قاراستىرىلاتىن بولادى. شەتەلگە شىعۋ جاقسى،بىراق، قازاقستاننىڭ دا كورىكتى جەرلەرى كوپ، سولاردى الەۋمەتتىك جەلىدە ناسيحاتتاپ، ىشكى ءتۋريزمدى دامىتۋعا شاقىرامىن»، - دەدى قور پرەزيدەنتى.

ايتا كەتەيىك، اتالعان شاراعا قازاقستاننان وزگە ۇلىبريتانيا، شۆەيتساريا، اۆستريا، بەلگيا، گەرمانيا، فرانتسيا، نيدەرلاند، مولدوۆا، سولتۇستىك كيپر تۇركيا رەسپۋبليكاسى،  وزبەكستان، ءازىربايجان، قىرعىزستان سياقتى مەملەكەتتەردەن 200-دەن استام ادام قاتىستى.

Abai.kz