شۆەتسيا سىرتقى ىستەر مينيسترلىگى رەسەيدىڭ كورشىلەس ەلدەرگە ەكسپورتىنىڭ كۇرت وسۋىنە سانكتسيالاردى اينالىپ ءوتۋ ارەكەتتەرى سەبەپ بولۋى مۇمكىن ەكەنىن مالىمدەدى. الايدا شۆەتسيا ناقتى قاي مەملەكەت ەكەنىن اتامادى، دەپ حابارلايدى Ulysmedia.kz.

شۆەتسيا ۇكىمەتى رەسەيمەن كورشىلەس ەلدەرگە ەكسپورتتىڭ كۇرت ءوسۋ سەبەپتەرىن تەكسەرۋدى ءجون كورگەن. سىرتقى ساۋدا ءمينيسترى يوحان فورسەلدىڭ ايتۋىنشا، رەسەيگە قارسى سانكتسيالاردى مەملەكەتتەردىڭ ءبارى ساقتاۋى ءتيىس.

"ەگەر ءبىز سانكتسيالاردىڭ كۇشىنە ەنۋىن جانە شەكتەۋلەر رەسەيدىڭ ۋكرايناعا قارسى باسقىنشىلىعىن باسەڭدەتۋگە كومەكتەسكەنىن قالاساق، ولاردى ساقتاۋ كەرەك. رەسەيمەن كورشىلەس ەلدەرگە ەكسپورتتىڭ ءوسۋى تابيعي سەبەپتەرگە بايلانىستى بولۋى مۇمكىن، سونداي-اق، بۇل سانكتسيالاردىڭ تولىق ساقتالماۋىنا بايلانىستى بولۋى مۇمكىن", - دەدى ول.

شۆەتسيا ۇكىمەتى ىقتيمال بۇزۋشىلىقتاردى توقتاتۋعا نيەتتى. الايدا، مالىمدەمەدە رەسەيدىڭ ناقتى قاي كورشىلەرى تۋرالى ايتىلعانى بەلگىسىز.

BBC-ءدىڭ جازۋىنشا، 2023 جىلى شۆەتسيادان قازاقستانعا ەكسپورت كولەمى وتكەن جىلمەن سالىستىرعاندا 140%-عا، ال قىرعىزستان مەن تۇرىكمەنستانعا – 200%-عا ءوستى.

رەسمي مالىمەتتەر بويىنشا، قازاقستان مەن شۆەتسيا اراسىنداعى تاۋار اينالىمى 2022 جىلعى قاڭتار-قاراشادا 282 ملن دوللاردى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 40%-عا جوعارى.

ەستەرىڭىزگە سالا كەتەيىك، ەۋروپا ءوزىنىڭ سانكتسيالارىمەن رەسەي فەدەراتسياسىنا كوپتەگەن تاۋارلاردى، سونىڭ ىشىندە قارۋ-جاراق وندىرىسىندە قولدانۋعا بولاتىن كومپونەنتتەردى جەتكىزۋگە تىيىم سالدى.

سونىمەن بىرگە، باتىس ەلدەرى رەسەي كورشى ەلدەردى تىيىم سالىنعان تاۋارلاردى اكەلۋ ءۇشىن پايدالانادى دەپ قورقادى.

ەستەرىڭىزگە سالا كەتەيىك، بۇعان دەيىن اقش قىرعىزستانعا قاتىستى شەكتەۋلەر ەنگىزگەن.  اق ءۇي قىرعىز ەلى ارقىلى رەسەيگە سانكتسيالىق ونىمدەر، سونىڭ ىشىندە قىتايلىق دروندار جەتكىزىلەدى دەپ ەسەپتەيدى.

Abai.kz