بۇگىنگە دەيىن قازاقستان بيلىگى حالىق الدىندا اەس بويىنشا تۇپكىلىكتى شەشىم قابىلدانعان جوق دەۋمەن كەلەدى.

بيلىكتىڭ تۇلكىبۇلاعىنا قاراماي كەيبىر ەكولوگتار جۋىردا ۇلكەن اۋىلىندا وتكەن «جاريا تالقىلاۋدى» مەڭزەي «بيلىك ستانتسيا سالۋ ماسەلەسىن باياعىدا حالىقسىز-اق شەشىپ قويعان، ەندى تەك كوزبوياۋشىلىق ارقىلى حالىقپەن ساناسقانداي كەيىپ تانىتىپ جاتىر» دەپ ايتىپ كەلگەندى.

ويتكەنى، 22 تامىزدا «اەس سالۋعا قولايلى ورىن» دەپ تانىلعان الماتى وبلىسى ۇلكەن اۋىلىندا اەس بويىنشا قاراما-قايشى كوزقاراستاعى ادامداردىڭ ايعاي-شۋىمەن اياقتالعان جاريا تالقىلاۋ ءوتتى. وسى ءبىر شارادان كەيىن ەنەرگەتيكا مينيسترلىگى «ۇلكەن اۋىلىنىڭ تۇرعىندارى اەس-ءتى قولدايدى» دەپ مالىمدەدى. وعان قاتىسقان وزگە وڭىرلەردەن بارعان ەكولوگتار، بەلسەندىلەر «اەس سالۋ ماسەلەسىن تەك ۇلكەن ەمەس، تۇتاس رەسپۋبليكا حالقى شەشۋ كەرەك» دەپ ايتقاندىعى ءالى ەسىمىزدە.

پرەزيدەنت قاسىم-جومارت توقاەۆ 1 قىركۇيەكتەگى بيىلعى جىلعى جولداۋىندا قوعامدا قىزۋ تالقىلانىپ جاتقان اتوم ەلەكتر ستانتسياسىن سالۋ ماسەلەسىن «رەفەرەندۋم ارقىلى شەشكەن دۇرىس» دەپ ايتقان بولاتىن.

ەندى مىنە 6 قىركۇيەكتە ورتالىق سايلاۋ كوميسسياسى (وسك) قازاقستان اەس سالۋ بويىنشا رەفەرەندۋمدى بيىل وتكىزۋگە دايىن ەكەنىن قازتاگ اگەنتتىگى وسك وكىلى شاۆكات وتەمىسوۆكە سىلتەمە جاساپ حاباردار ەتتى.

ءماجىلىس كۋلۋارىندا: «[رەفەرەندۋم بويىنشا] ماسەلە ءالى شەشىلگەن جوق، بىراق ونىڭ وتكىزىلەتىنى، ناقتى ۋاقىتى كەيىن انىقتالاتىنى ايتىلدى. دايىندىق جۇمىستارى، سايلاۋشىلار ءتىزىمىن ءتۇزۋ ءجۇرىپ جاتىر. جۇمىستى ءبىزدىڭ اۋماقتىق سايلاۋ كوميسسيالارى جۇرگىزۋگە ءتيىس. ءبىز دايىنبىز» دەگەن وتەمىسوۆ رەفەرەندۋمنىڭ ناقتى ۋاقىتىن «بەلگىسىز» دەپ جاۋاپسىز قالدىردى.

Abai.kz