بيزنەسمەن قايرات بورانباەۆ سياقتى قايرات ساتىبالدى دا مەرزىمىنەن بۇرىن بوستاندىققا شىعا ما؟ بۇگىن سەنات كۋلۋارىندا جۋرناليستەر وسى سۇراقتى باس پروكۋروردىڭ ورىنباسارى اسەت شىنداليەۆكە قويعان. شىنداليەۆ تۇرمەدە جازاسىن وتەپ جاتقان ءار ازاماتتىڭ ءوتىنىش بەرۋ ءوز ەركىندە ەكەنىن ايتادى، دەپ حابارلايدى Ulysmedia.kz.

«ەگەر تەوريالىق تۇرعىدا قارايتىن بولساق، زاڭ ەرەجەلەرىندە مەرزىمىنەن بۇرىن بوساپ شىعۋ نەمەسە جازاسىن جەڭىلدەتۋ تەتىكتەرى قاراستىرىلعان. الايدا زاڭنىڭ بەلگىلى ءبىر تالاپتارى بولادى. مەرزىمىنەن بۇرىن بوساپ شىققىسى كەلەتىن ازامات وزىنە كەسىلگەن جازانىڭ ءبىر بولىگىن وتەپ، ءوز ارەكەتى سالدارىنان كەلتىرىلگەن قانداي دا ءبىر شىعىندى وتەۋى ءتيىس. سوتتالعان ادامعا بەرىلەتىن جەكە مىنەزدەمەگە قارايدى»، - دەيدى اسەت شىنداليەۆ.

شىنداليەۆتىڭ سوزىنشە، مەرزىمىنەن بۇرىن بوساپ شىعۋعا ءوتىنىش بەرۋ – سوتتالعان ادامنىڭ ەركىندە بولادى. الايدا سوتتالعان ادامنىڭ وتىنىشتەرى تالاپقا ءبارى ساي بولىپ تۇرسا دا، سوت ودان باس تارتۋى مۇمكىن. جۋرناليستەر وسى رەتتە باس پروكۋروردىڭ ورىنباسارىنان «ءبىزدىڭ مەملەكەت نە سەبەپتى جەمقورلارعا جازانى جەڭىلدەتەدى؟» دەپ سۇراعان. الايدا ول باق-تا تانىمال ادامداردىڭ مەرزىمىنەن بوساپ شىعۋىنان قوعامدا تەرىس پىكىر قالىپتاسۋى مۇمكىن ەكەنىن، شىن مانىندە كوپ ادام ءوتىنىش بەرىپ بوساپ شىققانىن ايتادى.

ەسكە سالا كەتەيىك، اسەت شىنداليەۆ بۇعان دەيىن كاسىپكەر قايرات بورانباەۆتىڭ قاشان بوساتىلاتىنىن ايتقان ەدى. مەملەكەتكە شىعىندى وتەگەننەن كەيىن 20 قاراشادا بورانباەۆتىڭ تۇرمەدەگى جازاسى باس بوستاندىعىن شەكتەۋگە الماستىرىلعانى بەلگىلى بولدى. سوتتالۋشى پروباتسيالىق باقىلاۋدا بولادى.

فوتو: اشىق دەرەككوزدەن

Abai.kz