بۇگىن قازاقستانعا ماجارستان رەسپۋبليكاسىنىڭ پرەمەر-ءمينيسترى ۆيكتور وربان رەسمي ساپارمەن كەلدى. بۇل تۋرالى اقوردانىڭ ءباسپاسوز قىزمەتى حابارلادى.

ەلىمىزگە رەسمي ساپارمەن كەلگەن ماجارستان پرەمەر-ءمينيسترى ۆيكتور ورباندى «اقوردا» رەزيدەنتسياسىندا سالتاناتتى تۇردە قارسى الۋ ءراسىمى ءوتتى.

قاسىم-جومارت توقاەۆ پەن ۆيكتور وربان اۋەلى ءبىر-بىرىنە رەسمي دەلەگاتسيا مۇشەلەرىن تانىستىرىپ، قۇرمەت قاراۋىلىنىڭ باستىعى مەملەكەتتەر باسشىلارىنا راپورت بەرىپ، ەكى ەلدىڭ ءانۇراندارى شىرقالدى.

سودان سوڭ قازاقستان پرەزيدەنتى مەن ماجارستان پرەمەر-ءمينيسترى شاعىن قۇرامدا كەلىسسوز وتكىزدى

تاراپتار ساياسي ديالوگتى نىعايتۋعا، ساۋدا-ەكونوميكالىق ىنتىماقتاستىق پەن مادەني-گۋمانيتارلىق بايلانىستاردى تەرەڭدەتۋگە باسا ءمان بەرە وتىرىپ، قازاق-ماجار قارىم-قاتىناسىنىڭ قازىرگى جاي-كۇيى مەن دامۋ پەرسپەكتيۆاسىن جان-جاقتى تالقىلادى.

مەملەكەت باسشىسى قازاقستان مەن ماجارستان اراسىنداعى قارىم-قاتىناستاردى نىعايتۋعا ەلەۋلى ۇلەس قوسقانى ءۇشىن ۆيكتور وربانعا ريزاشىلىعىن ءبىلدىردى.

«قۇرمەتتى پرەمەر-مينيستر مىرزا، ەڭ الدىمەن، قازاق جەرىنە قوش كەلدىڭىز! سەبەبى ءسىز – قىپشاقسىز. بۇل دەرەكتى قازاقتار جاقسى بىلەدى ءارى ءسىزدى سىيلايدى. سوندىقتان اتامەكەنىڭىزگە كەلدىڭىز دەپ ايتساق، ارتىق بولمايتىن شىعار. مەنىڭ شاقىرۋىمدى قابىل الىپ، قازاقستانعا رەسمي ساپارمەن كەلگەنىڭىز جانە تۇركى مەملەكەتتەرى ۇيىمىنىڭ مەرەيتويلىق سامميتىنە قاتىسۋعا نيەت تانىتقانىڭىز ءۇشىن شىنايى ريزاشىلىعىمدى بىلدىرەمىن. بۇل ساپارىڭىز ەكى ەل اراسىنداعى ىنتىماقتاستىققا تىڭ سەرپىن بەرەتىنى ءسوزسىز. سوندىقتان بۇگىنگى كەلىسسوزدەر ناتيجەلى بولاتىنىنا سەنىمدىمىن»، – دەدى قاسىم-جومارت توقاەۆ.

ۆيكتور وربان قازاقستانعا شاقىرعانى جانە وزىنە، ماجارستان دەلەگاتسياسىنا كورسەتكەن قوناقجايلىعى ءۇشىن قاسىم-جومارت توقاەۆقا العىس ايتتى. ول ەكى ەل اراسىنداعى ساياسي ديالوگ پەن ءوزارا ءتيىمدى سەرىكتەستىكتىڭ دەڭگەيىن جوعارى باعالادى.

بۇدان كەيىن قاسىم-جومارت كەمەلۇلى ۆيكتور وربانمەنن كەڭەيتىلگەن قۇرامدا كەلىسسوز جۇرگىزدى.

قاسىم-جومارت توقاەۆ قازاقستان مەن ماجارستاننىڭ تاريحي تامىرلاستىعى جانە تىعىز بايلانىستارى بۇگىندە ەكى ەل اراسىنداعى ىنتىماقتاستىقتىڭ تەرەڭدەي تۇسۋىنە نەگىز بولعانىن اتاپ ءوتتى. سونداي-اق، پرەزيدەنت قازاقستان مەن ماجارستان اراسىندا ەكىجاقتى ىنتىماقتاستىقتى ودان ءارى دامىتۋ ءۇشىن جاقسى ينستيتۋتسيونالدى نەگىز بار دەپ سانايتىنىن جەتكىزدى.

مەملەكەت باسشىسىنىڭ پىكىرىنشە، ەكونوميكالىق ىنتىماقتاستىق جونىندەگى ۇكىمەتارالىق كوميسسيا مەن ىسكەرلىك كەڭەس ەكى ەلدىڭ ساۋدا قاتىناستارىن دامىتۋدا بەلسەندى ءرول اتقارۋى كەرەك.

«گەوساياسي شيەلەنىستەرگە قاراماستان، بىلتىر تاۋار اينالىمى 20 پايىزدان استام ءوستى. تاياۋ بولاشاقتا بۇل كورسەتكىشتى 1 ميلليارد دوللارعا دەيىن جەتكىزۋگە تولىق مۇمكىندىگىمىز بار ەكەنىنە سەنىمدىمىن»، – دەدى قازاقستان پرەزيدەنتى.

تاراپتار ەنەرگەتيكا، كولىك، لوگيستيكا، مەتاللۋرگيا، وڭدەۋ ونەركاسىبى، اۋىل شارۋاشىلىعى، فارماتسەۆتيكا، تاماق ونەركاسىبى جانە تۋريزم سياقتى سالالارداعى بايلانىستاردى دامىتۋعا ءوزارا مۇددەلى ەكەنىن ءبىلدىردى.

كەلىسسوز بارىسىندا ەكى ەلدىڭ زاڭ شىعارۋشى ورگاندارىندا جۇمىس ىستەيتىن دوستىق توپتارى ارقىلى پارلامەنتارالىق بايلانىستى نىعايتۋدىڭ ماڭىزدىلىعى ايتىلدى. سونىمەن قاتار، بۇۇ، ەقىۇ، تمۇ جانە ءتۇرلى حالىقارالىق پلاتفورمالار اياسىنداعى ءوزارا ىقپالداستىق پەرسپەكتيۆالارى قاراستىرىلدى.

مەملەكەت باسشىسى كەلەسى كەزەكتە ەكى ەلدىڭ گۋمانيتارلىق بايلانىستارىن نىعايتۋ ماسەلەسىنە دە توقتالدى. بۇگىن استانا كوشەلەرىنىڭ بىرىنە ماجار ۇلتىنىڭ كورنەكتى اقىنى شاندور پەتەفيدىڭ ەسىمى بەرىلەدى. بۇل – قازاقستان مەن ماجارستان اراسىنداعى تىعىز دوستىق قاتىناستاردىڭ تاعى ءبىر ايقىن دالەلى.

كەلىسسوز قورىتىندىسى بويىنشا ءبىلىم سالاسىنداعى ءوزارا تۇسىنىستىك تۋرالى مەموراندۋمعا قول قويىلدى

بۇدان بولەك، مەملەكەت باسشىسى ماجارستان پرەمەر-ءمينيسترى ۆيكتور ورباندى I دارەجەلى «دوستىق» وردەنىمەن ماراپاتتادى

« حالىقتارىمىز اراسىنداعى دوستىق ارقاۋىن جانە ءوزارا ءتيىمدى بايلانىستاردى نىعايتۋ ىسىندەگى ايرىقشا ءرولىڭىزدى ەسكەرە وتىرىپ، ءسىزدى I دارەجەلى «دوستىق» وردەنىمەن ماراپاتتاۋ تۋرالى شەشىم قابىلدادىم. بۇل – زور قۇرمەت پەن ريزاشىلىقتىڭ بەلگىسى. سونداي-اق قازاقستان مەن ماجارستاننىڭ – دوستاس ەكى حالىق بىرلىگىنىڭ ءارى ءوزارا سەنىم مەن سىيلاستىققا نەگىزدەلگەن قاتىناستاردى نىعايتۋعا دەگەن نيەتىمىزدىڭ ايقىن كورىنىسى. وسى ماراپات ىنتىماعىمىزدى ودان ءارى دامىتۋعا جانە ورتاق يگىلىك جولىنداعى بىرلەسكەن جۇمىسىمىزعا سەپتىگىن تيگىزەتىنىنە سەنىمدىمىن»، – دەدى پرەزيدەنت.

قازاقستاننىڭ جوعارى ناگراداسىمەن ماراپاتتاعانى ءۇشىن ۆيكتور وربان قاسىم-جومارت توقاەۆقا العىس ايتىپ، ەكى ەل اراسىنداعى ستراتەگيالىق سەرىكتەستىكتى ودان ءارى نىعايتۋعا بار كۇشىن جۇمساۋعا دايىن ەكەنىن مالىمدەدى.

Abai.kz