بۇگىن ورتالىق سايلاۋ كوميسسياسى 9 شەت مەملەكەتتەن جانە 4 حالىقارالىق ۇيىمنان 155 حالىقارالىق بايقاۋشىنى اككرەديتتەدى، دەپ حابارلايدى.

كوميسسيا وتىرىسىندا ءسوز سويلەگەن وسك توراعاسىنىڭ ورىنباسارى مۇحتار ەرمان ەۋروپا ەلدەرى مەن تمد مەملەكەتتەرىنىڭ حالىقارالىق بايقاۋشىلارى قازاقستاندا وتەتىن سايلاۋ ناۋقانىنا ەرەكشە قىزىعۋشىلىق تانىتىپ وتىرعانىن ايتتى.

– 2026 جىلعى 3 تامىزداعى جاعداي بويىنشا قازاقستان رەسپۋبليكاسى سىرتقى ىستەر مينيسترلىگى ورتالىق سايلاۋ كوميسسياسىنا 9 شەت مەملەكەتتەن جانە 4 حالىقارالىق ۇيىمنان 155 حالىقارالىق بايقاۋشىنىڭ كانديداتۋراسىن اككرەديتتەۋگە ۇسىندى. ولاردىڭ ىشىندە ەقىۇ پارلامەنتتىك اسسامبلەياسىنان – 86 بايقاۋشى، تمد بايقاۋشىلار ميسسياسىنان – 22, تمد پاا-دان – 23, ۇقشۇ پا-دان – 6 بايقاۋشى بار. شەت مەملەكەتتەردەن: رەسەي فەدەراتسياسىنان – 3 بايقاۋشى، ازەربايجان رەسپۋبليكاسىنان، ارمەنيا رەسپۋبليكاسىنان، يوردانيا حاشيميت كورولدىگىنەن، قىرعىز رەسپۋبليكاسىنان، مولدوۆا رەسپۋبليكاسىنان، ميانما وداعى رەسپۋبليكاسىنان جانە رۋمىنيادان – ارقايسىسىنان 2 بايقاۋشى، ۋكراينادان – 1 كانديداتۋرا ۇسىنىلدى، – دەيدى مۇحتار ەرمان.

ەسكە سالايىق، اتالعان ميسسيالاردىڭ قۇرامىنا 29 ەلدىڭ اتىنان 74 دەپۋتات كىرەدى. ولاردىڭ قاتارىندا اۆستريا، ازەربايجان، البانيا، بەلارۋس، بەلگيا، بوسنيا جانە گەرتسەگوۆينا، ۇلىبريتانيا، ۆەنگريا، گەرمانيا، يسپانيا، يتاليا، قىرعىزستان، لاتۆيا، ليۋكسەمبۋرگ، نيدەرلاند، نورۆەگيا، پولشا، رەسەي، رۋمىنيا، سولتۇستىك ماكەدونيا، سلوۆەنيا، تاجىكستان، تۇركيا، فينليانديا، فرانتسيا، حورۆاتيا، چەرنوگوريا، چەحيا جانە شۆەتسيا مەملەكەتتەرىنىڭ وكىلدەرى بار.

سونىمەن قاتار ورتالىق سايلاۋ كوميسسياسى اككرەديتتەگەن دەلەگاتسيالاردىڭ قاتارىندا شەت مەملەكەتتەردىڭ ورتالىق سايلاۋ ورگاندارىنىڭ 12 دەلەگاتسياسى بار.

ولاردىڭ جەتەۋىن ازەربايجان، ارمەنيا، گرۋزيا، قىرعىزستان، مولدوۆا، پاكىستان جانە رەسەيدىڭ ورتالىق سايلاۋ كوميسسيالارىنىڭ توراعالارى باستاپ كەلەدى. بۇدان بولەك، تاجىكستان، تۇركيا جانە وزبەكستاننىڭ ورتالىق سايلاۋ ورگاندارىنىڭ باسشىلارى دا سايلاۋدى بايقاۋعا قاتىساتىنىن راستادى.

وسىلايشا، بۇگىنگى كۇنگە دەيىن ورتالىق سايلاۋ كوميسسياسى شەت مەملەكەتتەر مەن حالىقارالىق ۇيىمداردان 251 حالىقارالىق بايقاۋشىنى اككرەديتتەدى.

اككرەديتتەۋگە قاتىستى ۇسىنىستار كەلىپ تۇسكەن سايىن حالىقارالىق بايقاۋشىلار تۋرالى مالىمەتتەر جاڭارتىلىپ وتىرادى.

ەسكە سالا كەتەيىك، وسك قازاقستاندا وتەتىن قۇرىلتاي سايلاۋىنداعى بيۋللەتەن قانداي بولاتىنىن ءتۇسىندىردى. سايلاۋعا 12,7 ملن بيۋللەتەن باسىپ شىعارىلادى.

Abai.kz