قر ۇلتتىق ۇلانى ءباسپاسوز قىزمەتىنىڭ مالىمەتىنشە، 12 قاراشادا 6637 اسكەري ءبولىمىنىڭ (پەتروپاۆل قالاسى)  كەلىسىمشارت بويىنشا اسكەري قىزمەتشىسى ارىپتەسىنىڭ ابايسىزدا اتىلعان وعىنان جاراقات الدى. ول شۇعىل تۇردە مەديتسينالىق مەكەمەگە جەتكىزىلدى. بىراق دارىگەرلەر اسكەري قىزمەتشىنى قۇتقارا الماعان.

“قىزمەتتىك تەرگەۋ تاعايىندالدى، وقيعانىڭ ءمان-جايى انىقتالۋدا. ۇلتتىق ۇلاننىڭ باس قولباسشىلىعى قازا تاپقان اسكەري قىزمەتشىنىڭ تۋىستارىنا كوڭىل ايتادى”، – دەلىنگەن حابارلامادا.

ايتا كەتەيىك، قازان ايىندا تەمىرتاۋدا قر ۇلتتىق ۇلانى 6636 اسكەري ءبولىمىنىڭ ساربازى مەرت بولعان. ول كەزەكشى بولىمشەنىڭ قۇرامىنداعى قىزمەتى كەزىندە شتاتتىق قارۋدان ءوز باسىنا وق اتىپ، كوز جۇمدى.

ال قىركۇيەكتە ۇلتتىق ۇلان وفيتسەرلەرى جامبىل وبلىسىندا «ايشا ءبيبى» پوليگونىنداعى وقۋ-جاتتىعۋ كەزىندە جاراقات العان.. قاۋىپسىزدىكتى بۇزۋ سالدارىنان ءۇش وفيتسەردىڭ اياعى جارالاندى. اسكەري قىزمەتشىلەر تاراز قالاسىنداعى مەديتسينالىق مەكەمەگە جەتكىزىلگەنى حابارلاندى.

Abai.kz