كۇنى كەشە ۋكراينا پرەزيدەنتى امەريكاعا ات باسىن بۇرىپ، كونگرەسمەندەرمەن، وكىلدەر پالاتاسىنىڭ باسشىسىمەن، پرەزيدەنت بايدەنمەن جەكە-جەكە كەزدەسۋ وتكىزدى. ماقساتى – اسكەري كومەككە قول جەتكىزۋ.

ماۋسىم ايىنىڭ سوڭىنا قاراي ۋكراينا تارابى ورىس اسكەرىنە قارسى قايتارما شابۋىلعا شىققانى بەلگىلى. بىراق شابۋىل ەل كۇتكەندەي ناتيجەلى بولمادى. ەكى تاراپ تا تيتىقتاپ قالدى.

سونى مەڭزەگەن اقش وكىلدەر پالاتاسىنىڭ توراعاسى مايك جونسون زەلەنسكيمەن كەزدەسكەننەن كەيىن: «بايدەن ۇكىمەتىنىڭ سۇراپ وتىرعانى وتە قوماقتى سوما. ۇكىمەتتىڭ ول قارجىنىڭ دۇرىس جۇمسالۋىن قاداعالايتىن جۇيەسى دە، قايتارىمى دا جوق. امەريكا حالقى كۇتكەن ناقتى جاۋاپ تا جوق»، - دەپ پىكىر ءبىلدىردى.

ودان كەيىن زەلەنسكيدى قابىلداعان اق ءۇي باسشىسى بايدەن ۋكراينادان بەت بۇرمايتىنىن قاداپ ايتتى. «اق ءۇي دە، اقش حالقى دا ۋكراينانى سوڭىنا دەيىن قولدايدى»، - دەدى.

دەموكراتتار ۋكرايناعا 60 ميلليارد دوللاردىڭ كومەگىن بەرۋدى ۇسىنعان ەدى. رەسپۋبليكاشىل پارتيا وكىلدەرىنىڭ قارسىلىعىنان كەيىن ول وتپەي قالدى. رەسپۋبيكاشىل پارتيا بايدەن بيلىگىنىڭ زاڭسىز قونىس اۋدارۋشىلارعا ۇستانعان كەڭ پەيىل كوشى-قون ساياساتىن سىناپ، ونى بارىنشا قاتاڭداتۋعا، ولاي ىستەمەگەن جاعدايدا ۋكرايناعا بەرىلەتىن اسكەري كومەك جوباسىن قۇپتامايتىنىن جەتكىزگەن ەدى.

بايدەن رەسپۋبليكاشىلاردىڭ ۇستانىمىن سىناپ: «ولار جەڭىستى پۋتينگە قولدان بەرگەلى تۇر. ولار زاڭ جوباسىن ماقۇلداماسا، بۇل پۋتينگە جاسالعان ەڭ جاقسى جاڭا جىلدىق ساۋعا بولعالى تۇر»، - دەدى.

قازىر ۋكرايناعا تىلەۋلەس ەلدەردەن كەلىپ جاتقان اسكەري كومەك سوعىس باستالعاننان بەرى ەڭ تومەنگى شەككە جەتكەن.

Abai.kz