كازكرايكوم  ۆكپ (ب)

ف.گولوششەكينگە جانە س.سادۋاقاسوۆقا         

پارتيا مۇشەسى    ف. ي.  ارىزى

10  قىركۇيەك  1926 جىل  

وتە قۇپيا

كازكرايكوم  ۆكپ (ب)

ف.گولوششەكينگە جانە س.سادۋاقاسوۆقا         

پارتيا مۇشەسى    ف. ي.  ارىزى

10  قىركۇيەك  1926 جىل  

وتە قۇپيا

    مەن  گپۋ قىزمەتكەرى رەتىندە، ءبىر توپ ەۆروپالىق قىزمەتكەرلەر  - شيشكو، بەرەستين، وزول، الشانسكي جانە باسقالاردى تانيتىن بولعاندىقتان، ولاردىڭ جۇرگىزىپ جاتقان ساياساتىن كورىپ بىلگەندىكتەن وسىنى ايتىپ جەتكىزۋدى ءوزىمنىڭ پارتيالىق پارىزىم دەپ سانايمىن. ەگەر وسى توپتىڭ انتيپارتيالىق ساياساتىن، اتاپ ايتقاندا، ولاردىڭ قازاق قىزمەتكەرلەرىنە قارسى ارنايى باعىتتالعان، ولاردىڭ بويىنداعى كۇش، جىگەر مۇمكىندىكتەرى مەن قاسيەتتەرىن وزدەرىنە قارسى پايدالانۋ ارقىلى ولاردى قۋعىنداۋ مەن ىزىنە ءتۇسىپ الۋشىلىقتارىن  قويدىرماسا بولمايتىنىن ايتپاقپىن.   گپۋ-ڭ سالعان جولى بويىنشا، ونىڭ ءبىرىنشى كەزەكتەگى وپەراتيۆتىك جۇمىسى  -  جاۋاپتى قىزمەتتەگى قازاقتارعا قارسى جالعان ماتەريالداردى جيناۋ. ءبىز بۇل تاجىريبەمىزدە ءارتۇرلى ادىستەردى پايدالانامىز، قازاقتاردىڭ اراسىنان قىلمىستىق ەلەمەنتتەردى ارنايى ىزدەپ تاۋىپ ولاردى جالدايمىز نەمەسە بارىمتاشىلاردى تۇتقىنداپ ولاردان قازاقتىڭ جاۋاپتى قىزمەتكەرلەرىنە قارسى جالعان توپ قۇرعان بولىپ ولاردى قازاقتىڭ جاۋاپتى قىزمەتكەرلەرىنە قارسى ايداپ سالۋ ارقىلى قاجەتتى ماتەريالداردى الامىز. سونىمەن بىرگە، ولاردىڭ ىزىنە تىڭشى سالىپ قازاق قىزمەتكەرلەرىن جەڭۋ ماقساتىندا ولاردىڭ ءوز جۇمىستارىن اتقارۋىنا مۇمكىندىك بەرمەيمىز، ءبىر قىزمەتكەردى ەكىنشى قىزمەتكەرگە ايداپ سالىپ، ءبىرىنىڭ «كىناسىن» ەكىنشىسىنە تاعامىز جانە ت.ب.  گپۋ لينياسى بويىنشا جەتىستىكتەرىمىز بولىپ سانالاتىن، ءبىزدىڭ ساياساتىمىزعا ءتان تاعى ءبىر جۇمىسىمىز بار  -  جىل سايىن كەدەي قازاقتار مەن ورتاشا قازاقتاردىڭ اراسىن ءبولۋ ءۇشىن ونداعان قازاق جارلىلارىن ولتىرەمىز، ارينە ءوزىمىز ولتىرمەيمىز، ورىستىڭ بۇزاقىلارى ارقىلى جاسايمىز.

  بيىلعى جىلى، وتكەن جىلدارداعىداي ارمياعا شاقىرىلعانداردى پايدالانىپ جاتىرمىز. ولاردى قازاق تۇرعىندارىنا عانا ەمەس، جوعارى قىزمەتتە وتىرعان جاۋاپتى قىزمەتكەرلەرگە بارىمتاشىلاردى قارسى قويىپ كەلەمىز. ورىس تۇرعىندارىنا «بارىمتاشىلاردى باسقارىپ وتىرعان قازاقتىڭ جاۋاپتى قىزمەتكەرلەرى» دەيمىز. ولاي ەمەستىگى ءبىلىنىپ قالسا، بار بالەنى ورىستىڭ قۇلاقتارىنا، اتاماندارىنا، قازاقتىڭ رۋباسىلارىنا جابامىز. قازاقستاننىڭ جاعدايىندا ءىس جۇزىندە ولاردى باسقارىپ قازاقتىڭ جاۋاپتى قىزمەتكەرلەرىنە قارسى پايدالانىپ كەلەمىز. ءبىزدىڭ قاراماعىمىزدا اگەنت بولىپ قىزمەت اتقارعانى ءۇشىن وراسان مولشەردە اقشا الىپ قازاق قىزمەتكەرەلەرىنە قارسى ماڭىزدى ماتەريالدار جيناپ بەرەتىن ورىستىڭ قۇلاقتارى مەن قازاقتىڭ رۋباسىلارى جەتكىلىكتى.

  ءوزىم بىلەتىن بۇل قۇپيانى اشۋعا قۇقىم بولسا دا، پارتيا مۇشەسى رەتىندە قازكرايكومنىڭ حاتشىسى گولوششەكيننىڭ جەكە وزىنە جانە قازكرايكومنىڭ بيۋرو مۇشەسى سادۋاقاسوۆ جولداسقا جەتكىزگىم كەلەدى. بۇل قۇپيا حاتىمدى ەۆروپالىق جانە قازاق باسشىسىنىڭ بىلگەنى ءجون، سوندا عانا مەن جوعارىدا ايتقان ماسەلە تۋرا شەشىلەدى. ءۇزىلدى-كەسىلدى پىكىرىمدى قوسا مالىمدەيمىن، جوعارىدا ايتىلعاندار  -  قالىپتاسقان جاعدايدىڭ كورىنىستەرى، لەپسى جانە جاركەنت ۋەزدەرىندە ۋاكىل بولىپ ىستەگەن كەزىمدەگى ءوزىم قولدانعان ءىس-تاجىريبەمنەن الىنعان جايتتەر. سوندىقتان دا، وسى ءىس-تاجىريبەلەر مەن ادىستەردىڭ  دۇرىستىعىنا كۇمان كەلتىرە  وتىرىپ، سىزدەن جەكە كەڭەس العىم كەلەدى. ارينە، ەشكىمگە ايتىلماسىن، ەگەر وسى حاتىم جايلى الشانسكي جانە جۋراۆلەۆ جولداستار ءبىلىپ قويسا، ولار مەنى تىرىدەي جەپ قويادى. ءبىر عانا جول بار: مەنىڭ قولىم ەمەس دەپ باس تارتۋ نەمەسە قولىمدى وزگەرتۋ. ايتسە دە مەنى رەنجىتۋگە تاستامايسىز  دەگەن ۇمىتتەمىن، كوممۋنيستىك اشىقتىعىم ءۇشىن بۇل تاعى حايۋاندارعا مەنى تالاتپايسىز دەگەن سەنىمدەمىن.

كوممۋنيستىك سالەممەن،  فوما  يۆانوۆ 

قر پرەزيدەنتىنىڭ مۇراعاتى، ف. 141, وپ.1, 1458 ءىس، 21 پاراق

راستالعان  كوشىرمە     

قازاقشالاعان س. ءجۇسىپ

Abai.kz