بالا تاربيەسىنە بۇرىننان ءمان بەرەتىنمىن. سوڭعى ەكى جىلدا ارنايى زەرتتەي باستادىم. اقىل ايتا سالۋ ەڭ وڭاي. سىزدەرمەن كورگەن-تۇيگەنىمدى، جىبەرگەن قاتەلىكتەرىمدى بولىسە جۇرەيىن. ەرىككەننەن جازبادىم. قولىڭىز تيسە – ءسىز دە وي قوسىڭىز. ويتكەنى، كەز كەلگەن مەملەكەت سياقتى ءار وتباسىنىڭ وزىندىك داعدىسى، زاڭى بولادى.

الدىڭعى بۋىنداردىڭ جانە ءبىزدىڭ وسكەن شاق ەندى كەلمەسكە كەتتى. قازىر زامان سيپاتى مۇلدە وزگەرگەن. ءوزىڭىز كورىپ وسكەن قۇندىلىقتارمەن بالاڭىزدى تاربيەلەي المايسىز. ءبىز كورگەن تۇيەلى كوش، ەن جايلاۋ، بوز بورانى بۇرقاعان يەن قىستاۋ، وگىز جەككەن اربا-شانامەن سۋ تاسۋ، وزەننەن مۇز ويۋ، كىشىرەك كەزدە قوشقار مەن سەركە ءمىنىپ، ەسەيە كەلە اساۋ تاي ۇيرەتۋ، ءجۇن ساباۋدان ساداق ءيىپ، اجەلەردىڭ شىپتاسىنان ءدىڭى جۋان شي سۋىرىپ الىپ، باسىنا شەگە قاداپ جەبە جاساۋ، باستاۋىشتى ءۇش شاقىرىم، ودان كەيىن جەتى شاقىرىم قاشىقتاعى مەكتەپكە كۇندەلىكتى قاتىناپ وقۋ... ايتا بەرسەك كوپ-اق.

بالاڭىزعا ايتىڭىز – سەنبەيدى نە جۇرە تىڭدايدى.

جاس كۇنىڭىزدە ەلەسىن دە كورمەگەن، وزىڭىزگە مۇلدە جات جاڭا تەحنولوگيا عاسىرىنا توسىرقاي قاراپ جۇرگەن بولارسىز.

بالالارىڭىز ءۇشىن ولاي ەمەس. جوعارىدا تىزبەلەگەن بالالىق شاعىڭىز ولارعا تەك اڭىز سياقتى عانا اسەر بەرەدى.

قازىر كوز الدىڭىزدا كىپ-كىشكەنتاي بولىپ جۇرگەن بالالار ەرتەڭ-اق ءوسىپ كەتكەنىن سەزىپ تە ۇلگىرمەيسىز. بالا-وتباسى-قوعام-مەملەكەت! ەرتەڭ تاعى الگىندەي ەكس-مينيسترلەر وسىرمەۋ ءۇشىن تاربيەنى بۇگىننەن باستاڭىز!

القيسسا، اۋەلگى ماقساتقا ورالايىق.

ءبىرىنشى، الدىمەن ءسىز ەسەيىپ كەلە جاتقان بالاڭىزدىڭ ارالاساتىن ورتاسىمەن جاقسى تانىس بولىڭىز. مىسالى، ءوزىم ارا-تۇرا بالالارىم مەكتەپكە باراردا جانە قايتاردا جاسىرىن اڭديمىن. دۇكەننەن نە الادى، ارى قاراي كىمدەرمەن بىرگە مەكتەپكە كىرەدى جانە قايتادى؟

ءوزىن ىڭعايسىز سەزىنبەس ءۇشىن نان-ءسۇت سىلتاۋىمەن سىرتقا جۇمساپ جىبەرىپ، كيىم قالتالارىن، سۋمكاسىن تۋرا گيتلەرلىك پوليتسيا – لەيبشتاندارت سس سياقتى تىنتەمىن. (ەلكەتروندى تەمەكى، قاۋىپتى ءدارى-دارمەك نەمەسە الدەكىمدەرمەن جۇلدىزى كەلىسپەي، پىشاق، وتكىر قايشى سالىپ ءجۇرۋى مۇمكىن).

ەلكەتروندى تەمەكى دەمەكشى، ءۇيىم مەكتەپتىڭ تۋرا الدىندا، ءۇي استىندا ۇلكەن بازار بولعاندىقتان ۇلى بولسىن، قىزى بولسىن سول بالەنى تالاسا شەگىپ تۇرعان وقۋشىلاردى ۇنەمى كورەمىن.

دوستارىن ۇيگە كوپتەپ ەرتىپ كەلۋىن قالايمىن. داستارحان باسىندا ولارعا ايىرىقشا ىقىلاس كورسەتىپ، اڭگىمەگە تارتامىن، اتا-تەگىن، الەۋمەتتىك جاعدايىن باقىلايمىن. وزىمشە پسيحولوگيالىق اناليز جاسايمىن.

ءوزىم فەلدشەر بولعاسىن، ءار اپتالىق تاماقتانۋ ءمازىرىن ءار ءتۇرلى تۇزەمىن. دەمالىس، ۇيقى ۋاقىتىنا مۇقياتپىن. كوكتەمدە جانە كۇز سوڭىندا مەد.ورتالىقتاردا قان سىناماسىن، ءار ءتۇرلى دياگنوزدىق انىقتامالار جاساتامىن دا، قاي ۆيتامين، كالتسي، مينەرالدار كەم، سول بويىنشا كەشەندى ەم جۇرگىزەمىن. قاجەت بولسا، ۋكول-سيستەمالار سالامىن. ەت پەن اۋىل ونىمدەرىن تۇتىنۋعا تىرىسامىن.

كىتاپ وقۋعا، يۋتۋبتاعى پايدالى ماتەريالدار مەن كينولاردى كورۋگە ءار ءتۇرلى تاسىلدەرمەن ىنتالاندىرامىن. تيك-توك، ينستا سياقتى الەۋمەتتىك جەلىلەر مەن ويىن پروگراممالارىنا تىيىم سالىنعان.

ۇل نە قىز دەپ بولمەيمىن. بىراق، تاربيەسىنە كەلگەندە ءبارىبىر بولەك قاراۋعا ءتيىس بولادى ەكەن. قىزداردى جونگە سالۋ كەرەك بولسا، شەشەسىنە يەك قاعامىن. ارعى بولمەگە بارىپ، وزدەرى شەشىپ قايتادى)

ال، باتىرىم Musik Otshigen (مۇستافا وتشىگەن عوي). وتشى – كوك تۇرىك تىلىندە. وت ۇستاۋشى، شاڭىراق يەسى. ەركەلەتكەن كوپ اتىنىڭ ءبىرى) ءوز نازارىمدا. كىشكەنتاي كەزىندە ماي قۇيرىقتان ازداپ قاققانىم بولماسا، جالپى، بالا ۇرمايتىن، اگرەسسيا كورسەتپەيتىن اداممىن.

بالالارمەن ۇيدە دە، تۇزدە دە كوپ اڭگىمەلەسەمىن. ساياحاتقا، كوركەم تاۋ، نۋ ورمان، ءمولدىر سۋعا كوپ اپارامىن. نەگە قىزىقسا سونى قۋدىرامىن. سودان بولار، ۇيدە باعاسى اجەپتاۋىر دومبىرا، پيانينو، گيتارا، سىرناي سياقتى اسپاپتارمەن قاتار ءار ءتۇرلى سپورتتىق جاتتىعۋ كيىمدەرى، سۋرەت قۇرالدارى تولىپ جاتىر. بىلاي قاراساڭىز بوس شىعىن. بىراق، ءبىرىن تاستاپ، بىرىنە كەتەتىن بالانىڭ زاڭى. ول ءۇشىن ۇرىسپايمىن. سول قىزىققان قالىڭ ونەردىڭ ءبىرىن ۇستاسا، سودان جانىنا تىنىشتىق تاپسا جەتىپ جاتىر. ەڭ باستىسى – بالا كۇنىنەن وكىنىش قالماسىن دەيمىن.

قاتۋنعا ايتامىن، «ول زاتتاردى ساتپا نەمەسە بىرەۋگە بەرمە. بۇلار امان بولسا، ەرتەڭ 18-20-عا تولعان سوڭ قاناتتانىپ، ۇشىپ كەتەدى. سولاردىڭ بالالىق ەلەسىن ۇستاپ ەكەۋىمىز قالامىز. قارتايعاندا سول كيىمدەرىن يىسكەپ، تۇتىنعان زاتتارىن سيپاپ، جاستىق شاعىمىزدى، قۇلىنداردىڭ باقىتتى بالالىق شاعىن ەسكە الامىز. بىزدە باسقا نە بار؟»، – دەپ...

جالعاسى بار.

الدا دا ايتارىم كوپ.

ۇلاربەك دالەيۇلى

Abai.kz