رەسەيدىڭ بەلگورود وبلىسىندا يل-76 اسكەري ۇشاعى قۇلادى. بۇل تۋرالى رەسەي قورعانىس مينيسترلىگى حابارلادى.

ۆەدومستۆو اسكەري ۇشاقتىڭ بورتىندا تۇتقىنعا الىنعان 65 ۋكراينالىق اسكەري بولعانى، ولاردى الماستىرۋ ءۇشىن بەلگورود وبلىسىنا اپارا جاتقانى ايتىلدى. بۇعان قوسا، ۇشاقتا التى ەكيپاج مۇشەسى مەن تۇتقىندارعا باس-كوز بولىپ جۇرگەن ءۇش ادام بارى حابارلاندى.

بەلگورود وبلىسىنىڭ گۋبەرناتورى ۆياچەسلاۆ گلادكوۆ يل-76 بورتىندا بولعان ادامداردىڭ ءبارى قازا تاپتى دەپ جازدى تەلەگرامدا. كەيىن قورعانىس مينيسترلىگى اقپاراتتى راستاپ، بورتتا بولعانداردىڭ ءبارى قازا بولعانىن مالىمدەدى.

ۆەدومستۆو ۇشاقتى ۋكراينا حاركوۆ وبلىسىنان راكەتامەن اتىپ ءتۇسىردى دەپ وتىر. ال رەسەي مەملەكەتتىك دۋماسىنىڭ قورعانىس بويىنشا كوميتەتىنىڭ باسشىسى اندرەي كارتاپولوۆ يل-76 ۇشاعىن ۋكراينا تارابى امەريكالىق Patriot نەمەسە گەرمانيالىق Iris-T قارۋىمەن اتىپ ءتۇسىردى دەدى.

"ۋكراينسكايا پراۆدا" ۋكراينا قارۋلى كۇشتەرىندەگى دەرەككوزىنە سىلتەمە جاساپ، ۋكراينالىق اسكەريلەر ۇشاقتىڭ قۇلاعانىن راستاعانىن جازدى. "ۋكراينسكايا پراۆدا" دەرەككوزى "ۇشاقتىڭ قۇلاۋى - ۋكراينا اسكەرىنىڭ جۇمىسى" دەپ "ۇشاق س-300 قارۋىنا راكەتا اكەتىپ بارا جاتقانىن" ايتقان.

كەيىن سايت "يل-76 ۇشاعىنىڭ قۇلاۋى – ۋكراينا قارۋلى كۇشتەرىنىڭ جۇمىسى" دەگەن اقپاراتتى وزگەرتىپ تاستادى.

"ۋكراينسكايا پراۆدادان" بولەك "ربك-ۋكراينا" سايتى "ۋكراينا قارۋلى كۇشتەرىنىڭ جۇمىسى" دەگەن ءسوزدى الىپ تاستاپ، بەلگورودتا قۇلاعان ۇشاق "س-300 قارۋىنا راكەتالار اكەتىپ بارا جاتقان" دەگەن اقپاراتتى قالدىردى.

ۋكراينا قارۋلى كۇشتەرىنىڭ باس شتابى بەلگورود وبلىسىنداعى يل-76 ۇشاعىنىڭ اپاتىن تىكەلەي اتاماي، حاركوۆ باعىتىنا ۇشىپ شىققان اسكەري-تاسىمالداۋشى ۇشاقتاردى "الداعى ۋاقىتتا دا جويا بەرەتىنىن" مالىمدەدى. ۋكراينالىق باسىلىمدار بۇل مالىمدەمەنى يل-76 ۇشاعىن ۋكراينا اسكەرى اتىپ تۇسىرگەنىن راستايدى دەپ جازىپ جاتىر.

ۋكراينا شەنەۋنىكتەرى قۇلاعان يل-76 ۇشاعىندا ۋكراينالىق 65 تۇتقىن بولعان دەگەن اقپارات جايلى ازىرگە ەشتەڭە ايتقان جوق.

سوعىس كەزىندە تاراپتاردىڭ اقپاراتىن تاۋەلسىز دەرەككوزدەردەن تەكسەرۋ مۇمكىن ەمەس.

فوتو: Commons.wikimedia.org

Abai.kz