جەتى جىلعا سوتتالعان مارات جىلانباەۆ ۇكىمنىڭ كۇشى جويىلعانعا دەيىن ۇزاقمەرزىمدىك اشتىق جاريالايتىنىن ايتتى. بۇل جونىندە ازاتتىققا ادۆوكاتى مەيىرجان دوسقاراەۆ حابارلادى.

ادۆوكات بۇگىن، 24 قاڭتاردا مارات جىلانباەۆپەن كەزدەسكەن. ادۆوكاتتىڭ سوزىنشە، جىلانباەۆ اپەللتسيالىق سوت القاسىنىڭ شەشىمىن بۇگىن عانا ەستىگەن. وتكەن اپتادا سوت جىلانباەۆتى جەتى جىلعا تۇرمەگە كەسۋ تۋرالى ءبىرىنشى ساتىدا شىققان ۇكىمدى وزگەرىسسىز قالدىرعان ەدى.

"مارات سوت قاۋلىسىنان بەيحابار بولعان. سوندىقتان ونى ەستىپ، ءوزىن جەتى جىلعا سوتتاعانى جونىندە ۇكىمگە نارازىلىعىن ءبىلدىرىپ، ءوز ۋادەمدە تۇرامىن دەپ "سوت ۇكىمى كۇشىن جويىلعانعا دەيىن مەرزىمسىز اشتىق جاريالايمىن دەپ شەشىم قابىلدادىم" دەدى" دەيدى ادۆوكاتى مەيىرجان دوسقاراەۆ.

ادۆوكاتتىڭ ايتۋىنشا، جىلانباەۆ اشتىق جاريالايتىنى جونىندە مەكەمەگە دە ارىز تۇسىرگەن. قازىر جىلانباەۆ تەك سۋ ءىشىپ وتىر دەدى ادۆوكات.

19 قاڭتاردا استانا قالالىق سوتى بەلسەندى، "العا، قازاقستان" تىركەلمەگەن پارتياسىنىڭ جەتەكشىسى مارات جىلانباەۆتىڭ ۇكىمىن وزگەرىسسىز قالدىرعان. العاشقى ينستانتسياداعى سوت جىلانباەۆتى 7 جىل تۇرمەگە كەسكەن. ازاماتتىق بەلسەندىگە "ەكسترەميستىك ۇيىمنىڭ ىسىنە ارالاستى" جانە "ەكسترەميزمدى قارجىلاندىردى" دەگەن ايىپتار تاعىلعان. بۇعان دەيىن پروكۋراتۋرا تىركەلمەگەن "العا، قازاقستان" پارتياسىنىڭ ليدەرى مارات جىلانباەۆ "قدت ەكسترەميستىك ۇيىمىنان تاپسىرما الىپ، ولاردىڭ قىزمەتىن قارجىلاندىرعان" دەپ كۇدىكتەنگەن. (استانا شەتەلدە تۇراتىن ەكس-بانكير مۇحتار ءابليازوۆتىڭ قدت قوزعالىسىن "ەكسترەميستىك ۇيىم" دەپ تانىپ، قىزمەتىنە تىيىم سالعان. ەۋروپارلامەنت قدت قوزعالىسىن "بەيبىت وپپوزيتسيالىق ۇيىم" دەپ اتايدى). جىلانباەۆ پەن جاقتاستارى ءىستىڭ ساياسي استارى بار دەگەن.

بەلسەندىگە جەرگىلىكتى جانە حالىقارالىق قۇقىق قورعاۋ ۇيىمدارى اراشا ءتۇستى.

بىلتىر جەلتوقساندا ادام قۇقىقتارى بويىنشا حالىقارالىق سەرىكتەستىك (IPHR) پەن قازاقستانداعى ادام قۇقىعى بويىنشا بيۋرو جىلانباەۆ كونستيتۋتسياداعى ويىن ەركىن ايتۋ، بەيبىت تۇردە جينالۋ قۇقىقتارى ءۇشىن جاۋاپقا تارتىلعانىن، ونىڭ ىسىندە ەشقانداي "ەكسترەميزم بەلگىلەر" جوعىن ايتقان. ەكى ۇيىم جىلانباەۆتىڭ سوتىنىڭ جابىق بولعانىن، قۇقىق قورعاۋشىلاردىڭ باقىلاۋىنا مۇمكىندىك بەرىلمەگەنىن دە سىنعا العان.

قازاقستاندىق قۇقىق قورعاۋشىلار جىلانباەۆتى "ساياسي تۇتقىن" دەپ تانىعان. ەۋروپارلامەنت 17 قاڭتار كۇنگى قارارىندا قازاقستان بيلىگىن ساياسي تۇتقىنداردى بوساتۋعا ۇندەپ، قۇجاتتا مارات جىلانباەۆتىڭ دا ەسىمىن اتاعان.

فوتو: vlast.kz

دەرەككوز: centralasian

Abai.kz