قاراعاندى وبلىسى بۇقار جىراۋ اۋدانىندا جارىلىس بولىپ، وعان شىداماعان تۇرعىن ءۇي وپىرىلىپ قالدى. ءۇيىندى استىندا ءالى دە ادامدار بار. 

30 قاڭتار تۇنگى 00.07 شاماسىندا بۇقار جىراۋ اۋدانى بوتاقارا كەنتى اۋەزوۆ كوشەسىندەگى قوسقاباتتى 12 پاتەرلى ۇيدە جارىلىس بولعانى حابارلانعان.

وبلىستىق توتەنشە جاعدايلار دەپارتامەنتىنىڭ باستىعى مۇرات قاتپانوۆ الدىن الا بولجام بويىنشا تۇرمىستىق گاز باللونى جارىلعان دەيدى.

كەيىننەن ەكىنشى قابات جارتىلاي وپىرىلعان.

ءورت شىقپاعان.

«وپىرىلعان اۋماق انىقتالىپ جاتىر. ءبىزدىڭ بولجام بويىنشا، ءۇيىندى استىندا ادامدار بار. جەرگىلىكتى جەردە شتاب ۇيىمداستىرىلعان. وقيعا ورنىندا 45 ادام جانە 13 تەحنيكا جۇمىس ىستەپ جاتىر»، — دەيدى مۇرات قاتپانوۆ.

قازىرگى ۋاقىتتا ءۇيىندى استىنان 6 ادام شىعارىلىپ، بوتاقارا كەنتىنىڭ ورتالىق اۋرۋحاناسىنا جەتكىزىلدى. قاراعاندى وبلىسىنىڭ دەنساۋلىق ساقتاۋ باسقارماسى ءبىر ادامنىڭ جاعدايىنىڭ اۋىر ەكەنىن ايتتى.

«ايماقتىڭ مەديتسينالىق مەكەمەلەرىنە بەس زارداپ شەككەندەر، ونىڭ ىشىندە ءۇش بالا جەتكىزىلدى. ەكى بالا امبۋلاتوريالىق ەمدەلۋگە جىبەرىلدى، ءبىر بالا وبلىستىق بالالار كلينيكالىق اۋرۋحاناسىنا قاناعاتتانارلىق جاعدايدا جەتكىزىلدى. ەكى ەرەسەك پاتسيەنتتىڭ بىرەۋى وتە اۋىر جاعدايدا (80% كۇيىك شالعان), ەكىنشىسىنىڭ جاعدايى قاناعاتتانارلىق. پاتسيەنتتەرگە بارلىق قاجەتتى مەديتسينالىق كومەك كورسەتىلىپ جاتىر»، - دەپ مالىمدەدى قاراعاندى وبلىستىق دەنساۋلىق ساقتاۋ باسقارماسى.

فوتو: اۋدان اكىمىنىڭ الەۋمەتتىك جەلىسىنەن

Abai.kz