قىتاي توراعاسى سي تسزينپين سەيسەنبى كۇنى اۋعانستانداعى تاليبان رەجيمىنىڭ قىتايداعى ەلشىسى بيلال كاريميمەن كەزدەستى. 

قحر سىرتقى ىستەر مينيسترلىگىنىڭ حابارلاۋىنشا، 30 قاڭتاردا قحر توراعاسى سي تسزينپين حالىق ءماجىلىس زالىندا قحر-داعى 42 ەلشىنىڭ سەنىم گراموتالارىن الدى. قىتايداعى وسى 42 ەلشىنىڭ اراسىندا اۋعانستانداعى تاليبان رەجيمىنىڭ ەلشىسى بيلال كاريمي دە بار.

بۇل قىتايدىڭ تاليبان رەجيمىمەن رەسمي تۇردە ديپلوماتيالىق قارىم-قاتىناس ورناتقانىن بىلدىرەدى. ناتيجەسىندە قىتاي تاليبان رەجيمىن مويىنداعان العاشقى ءىرى حالىقارالىق مەملەكەت بولدى.

فوتو: تاليبان سىرتقى ىستەر مينيسترلىگى وكىلىنىڭ تۆيتتەردە جاريالاعان سۋرەتى

سي تسزينپين سەنىم گراموتالارىن قابىلداۋ راسىمىندە ءسوز سويلەپ، قىتاي بارلىق ەلدىڭ حالقىمەن دوستىقتى جوعارى باعالايدى جانە باسقا ەلدەرمەن تەڭدىك جانە ءوزارا تيىمدىلىك نەگىزىندە ىنتىماقتاستىقتى دامىتۋعا دايىن ەكەنىن ايتتى. بۇل تۋرالى تاليبان سىرتقى ىستەر مينيسترلىگىنىڭ ءباسپاسوز حاتشىسى ابدۋل كاحار بالحي X الەۋمەتتىك جەلىسىندە (بۇرىنعى Twitter) جازبا جاريالادى.

سونداي-اق سەنىم گراموتالارىن تاپسىرۋ ءراسىمى اياقتالعان سوڭ بيلال كاريميدىڭ قىتاي سىرتقى ىستەر ءمينيسترى ۆان يمەن دە كەلىسسوزدەر جۇرگىزگەنى ايتىلدى.

2021 جىلدىڭ تامىزىندا بيلىككە ورالعاننان بەرى تاليبان اۋعانستاننىڭ، اسىرەسە كورشى ەلدەردەگى ديپلوماتيالىق ميسسيالارىنا تۇراقتى تۇردە باقىلاۋ ورناتتى. تاليبان قازىر پاكىستان، وزبەكستان جانە تۇركىمەنستاندى قوسا العاندا، كەم دەگەندە 14 ەلدەگى اۋعانستاننىڭ ەلشىلىكتەردى قاراۋىنا العان.

كەيبىر ەلدەر، سونىڭ ىشىندە رەسەي، قىتاي جانە يران كابۋلدا ءوز ەلشىلىكتەرىن ساقتايدى.

رەسەي سىرتقى ىستەر ءمينيسترى سەرگەي لاۆروۆ وتكەن اپتادا نيۋ-يوركتە جۋرناليستەرگە ماسكەۋدىڭ ساياسي جانە ادام قۇقىقتارىنا بايلانىستى تاليبان رەجيمىن ءالى مويىنداماعانىن ايتتى.

فوتو: تاليبان سىرتقى ىستەر مينيسترلىگى وكىلىنىڭ تۆيتتەردە جاريالاعان سۋرەتى

Abai.kz