تۇركيا ازاماتى ستامبۋلداعى سوت تورەلىگى سارايىندا ەكى تەرروريستىڭ وق اتۋى سالدارىنان العان جاراقاتىنان قايتىس بولدى. تۇركيا پرەزيدەنتى رەجەپ تايىپ ەردوعان ستامبۋلداعى سوت عيماراتىنا جاسالعان قارۋلى شابۋىلعا تۇسىنىكتەمە بەرە وتىرىپ، وسىنداي مالىمدەمە جاسادى.

ول تەرروريزمنىڭ بارلىق تۇرىنە «باتىل قارسى تۇرۋعا» ۋادە بەردى.

«ەكى لاڭكەسشىنى پوليتسيا قىزمەتكەرلەرى وزدەرىنىڭ جامان جوسپارلارىن جۇزەگە اسىرماس بۇرىن زالالسىزداندىردى. تۇركيا بارلىق دەڭگەيدەگى تەرروريستىك ۇيىمدارعا جانە ولاردىڭ جاقتاستارىنا قارسى باتىل كۇرەستى جالعاستىرادى. وكىنىشكە وراي، تەرروريستىك شابۋىل سالدارىنان ءبىر ازاماتىمىز قازا تاپتى»، - دەپ حابارلادى ەردوعاننىڭ ءسوزىن TRT Haber تەلەارناسى.

ستامبۋلدا سوت عيماراتىنا شابۋىلعا قاتىسقان ءۇشىنشى ادام ۇستالدى، دەپ جازادى تۇرىك باق.

سول ۋاقىتتا لاڭكەستىك سالدارىنان زارداپ شەككەن بەس ادامنىڭ بىرەۋى قازا تاپتى.

ستامبۋلداعى سوت عيماراتىنا شابۋىل جاساعاندار تۇركيادا تەرروريستىك دەپ تانىلعان DHKP-C سول جاق راديكالدىق پارتياسىنىڭ مۇشەلەرى بولدى، دەپ حابارلادى ەلىمىزدىڭ ءىىم باسشىسى ءالي ەرلىكايا.

ستامبۋلداعى چاگلايان سوتىنىڭ كىرە بەرىسىندەگى كۇزەت پۋنكتىنە قارۋلى شابۋىل جاسالدى. اتىس بارىسىندا ءۇش پوليتسيا قىزمەتكەرى جارالاندى.

تۇركيا ءىىم مالىمەتىنشە، ستامبۋلداعى سوت عيماراتىنا شابۋىل جاساعاندار جويىلدى، التى ادام جاراقات الدى. ءتيىستى اقپاراتتى ەلىمىزدىڭ ىشكى ىستەر ءمينيسترى ءالي ەرلىكايا X الەۋمەتتىك جەلىسىندەگى ءوزىنىڭ اككاۋنتىندا جاريالادى.

ونىڭ ايتۋىنشا، چاگلايان سوت عيماراتىنىڭ كىرەبەرىسىندە ورنالاسقان كۇزەت بەكەتىنە شابۋىل جاساۋعا ارەكەت جاسالعان. جارالانعانداردىڭ اراسىندا ءۇش پوليتسيا قىزمەتكەرى بار. شابۋىلداۋشىلار ەر مەن ايەل بولىپ شىقتى، ولار جويىلدى.

قازىرگى ۋاقىتتا سوت عيماراتى پوليتسيامەن قورشالعان، كىرۋ جانە شىعۋ جولدارى جابىق، قاۋىپسىزدىك شارالارى كۇشەيتىلدى. وعان كوپتەگەن ءتارتىپ ساقشىلارى تارتىلدى. وق اتىلعاننان كەيىن عيمارات ماڭىنداعى ادامدار اراسىندا دۇربەلەڭ تۋىندادى. كوبى جۇگىرە باستادى، كەيبىرەۋلەرى جەرگە جاتىپ قالدى. وقيعا ورنىنا ستامبۋل باس پروكۋرورى كەلدى.

Abai.kz