مەكەمە مالىمەتىنشە، قازاقستان مەن قىرعىزستان 1968 جىلدىڭ 8 قاراشاسىندا قابىلدانعان "جول قوزعالىسى جونىندەگى" بۇۇ-نىڭ ۆەنا كونۆەنتسياسىنىڭ مۇشەسى. بۇل قۇجاتقا سايكەس، مۇشە ەلدەر ازاماتتاردىڭ جۇرگىزۋشى كۋالىگىن ءوزارا مويىندايدى.

بىراق سوعان قاراماستان قىرعىزستان تاراپ كەيبىر قازاقستاندىق پوليتسيا حالىقارالىق تالاپتى ساقتاماي، قىرعىز جۇرگىزۋشىلەردەن كۋالىكتى اۋىستىرۋدى تالاپ ەتىپ جاتادى دەپ اتاپ ءوتتى.

"قازاقستان تاراپىنا ىشكى ىستەر مينيسترلىگىنە قارايتىن ءتيىستى مەكەمەلەرگە اقپاراتتىق ءتۇسىندىرۋ جۇمىسىن جۇرگىزۋدى ۇسىندىق. كەلىسسوز ناتيجەسىندە قازاقستاندىق تاراپ قاجەتتى ءتۇسىندىرۋ جۇمىسى جۇرگىزىلگەنىن، الدا تاعى كەلەڭسىزدىك بولىپ جاتسا، دەرەۋ ءمان بەرۋگە شاقىردى", - دەپ حابارلادى قىرعىزستان ءسىم.

بۇل ماسەلە بويىنشا قازاقستاننىڭ ءىىم وكىلدەرىمەن كەزدەسۋ جوسپارلانعانى دا ايتىلدى.

جوگوركۋ كەڭەش دەپۋتاتى ەميل توكتوشەۆ 8 اقپاندا قازاقستاندا تۇرىپ جاتقان قىرعىز ازاماتتارى جۇرگىزۋشى كۋالىگىمىزدى قازاقستاندىق تاراپ مويىنداماي جاتىر دەپ شاعىمدانعانىن جەتكىزگەن. دەپۋتات بۇل ماسەلەنى شەشۋ ءۇشىن قىرعىز ۇكىمەتىنە قايرىلعان.

رەسمي مالىمەت بويىنشا، قازاقستاندا 30 مىڭعا جۋىق قىرعىز ازاماتى تۇرادى.

Abai.kz