كوكتەمنىڭ اتى كەلسە دە، زاتى كەلمەي تۇر. قاردىڭ ءالى دە ەرىمەۋى سالدارىنان جايىلىمعا شىققان مالدار ازىق تاپپاستان ارام ءولىپ جاتىر. سارىشۇناق ايازداعى قىرىلىپ قالعان مالداردىڭ سانىنا جەتۋ مۇمكىن ەمەس. بۇل تۋرالى ۇلىتاۋ مەن اقمولا وبلىستارىنىڭ شارۋالارى دابىل قاعۋدا.

"ۇكىمەتتەن ەشقانداي شارا جوق، سول سەبەپتى مال قالاي قىرىلدى، سولاي قىرىلىپ جاتىر. دالادا بولسىن، قورادا بولسىن. ەندى ءشوپتى جازدا دايىنداۋعا ەشقانداي مۇمكىندىك جوق. ماڭايدىڭ ءبارى جىرتىلىپ تاستاعان. باياعى ەكپە شوپتەردىڭ ءبارىن جىرتىپ تاستاعان", – دەدى زەرەندى اۋدانىنىڭ تۇرعىنى تەمىربەك عالىموۆ.

مۇنداي جۇتتىڭ سالدارىنان قىرىلعان مالداردىڭ يەلەرىن دە انىقتاۋ قيىندىق تۋدىرىپ جاتىر. ۇلىتاۋ وبلىسىندا دا جاعداي ءماز ەمەس. ءتىپتى اۋىل اكىمدەرىنىڭ ءوزى قىرىلعان مالدىڭ ەسەبىن انىقتاي الماي الەككە ءتۇسىپ جاتىر.

"ولگەن مالداردى انىقتاۋ مۇمكىن بولماي تۇر. اقتاس كەنتىنەن 90 شاقىرىمدا مال ولگەنى تىركەلىپ تۇر. وعان بارۋعا ەشقانداي مۇمكىنشىلىك جوق. كوپ جەردە مال يەسىنىڭ قاتەلىگى ەكەنى ايتىلىپ جاتىر. مەن وعان كەلىسپەيمىن. 2023 جىلى قۋاڭشىلىق بولىپ، ءشوپ دايىنداۋ مۇمكىن بولمادى. ازداعان عانا ءشوپ دايىندالدى. ول قوراداعى سيىر مەن قويعا عانا جەتكىلىكتى", – دەدى اقتاس كەنتىنىڭ اكىمى دۋلات سۇلەيمەنوۆ.

Abai.kz