ەلىمىزدىڭ ءتورت وڭىرىندە سينتەتيكالىق ەسىرتكى وندىرۋمەن اينالىسقان قىلمىستىق توپ ۇستالدى، دەپ حابارلادى Abai.kz Polisia.kz-كە سىلتەمە جاساپ.

پوليتسەيلەر ءبىر مەزەتتە بىرقاتار وڭىردە وپەراتسيا جۇرگىزدى. ناتيجەسىندە، وسكەمەندە جيھاز بيزنەسىنىڭ اتىن جامىلىپ، سينتەتيكالىق ەسىرتكى ءوندىرىسىن جولعا قويعان جەرگىلىكتى تۇرعىن ۇستالدى. ول قويمانى جالعا الىپ، جابدىقتار مەن حيميالىق زاتتار اكەلگەن.

"ۇستاۋ كەزىندە 1,5 كەلىگە جۋىق دايىن ەسىرتكى، ءبىر جارىم توننا پرەكۋرسور، سونىمەن قاتار زەرتحانالىق جانە بۋىپ-تۇيۋگە ارنالعان جابدىقتار تاركىلەندى. تەكسەرۋدەن كەيىن ونىڭ قوستاناي، پەتروپاۆل قالالارى جانە الماتى وبلىسىنداعى ۇقساس زەرتحانالارمەن بايلانىسى بار ەكەنى انىقتالدى. پوليتسيا قىزمەتكەرلەرى قىلمىسكەرلەردىڭ قوزعالىس مارشرۋتى جانە كۇن ءتارتىبىن باقىلاۋدا ۇستادى", – دەلىنگەن حابارلامادا.

سونداي-اق، رۋدنىيدا دا جالدامالى ءۇيدىڭ مونشاسىن زەرتحانا ەتىپ جابدىقتاعان ەكى ادام ۇستالدى.

"الماتى وبلىسىندا مەفەدرون وندىرىسىمەن اينالىسقان تاعى ەكى كۇدىكتى ۇستالدى. ءوندىرىستىڭ سوڭعى ساتىسىنداعى ەسىرتكى، پرەكۋرسورلار جانە جابدىقتار تاركىلەندى. تەرگەۋ كەزىندە ۇستالعاندار ەسىرتكى جاسىرىلعان ون جەردى كورسەتىپ، جالپى سالماعى شامامەن 3 كەلىدەن اساتىن ەسىرتكى انىقتالدى. جالپى قالا كوشەلەرىنە سينتەتيكالىق ەسىرتكىنىڭ 11 مىڭعا جۋىق دوزاسىنىڭ تارالۋىنا توسقاۋىل قويىلدى. قابىلدانعان شارالاردىڭ ناتيجەسىندە 6 كەلىدەن استام سينتەتيكا زاڭسىز اينالىمعا جىبەرىلمەدى، 4 تونناعا جۋىق پرەكۋرسور تاركىلەندى. ءىىم قوعام قاۋىپسىزدىگىنە بەيجاي قارامايتىن ازاماتتارعا العىس بىلدىرەدى جانە قۇقىقتىق ءتارتىپتى قامتاماسىز ەتۋدى جالعاستىراتىن بولادى. بىرلەسىپ قانا ءبىز قالالاردى قاۋىپسىز ەتىپ، بالالاردى ەسىرتكى قاۋپىنەن قورعاي الامىز", – دەدى دەپارتامەنت باستىعى – ءىىم رەسمي وكىلى شىڭعىس الەكەشەۆ.

Abai.kz