قازاقستان جانە قىرعىزستان سپورت مينيسترلەرىنىڭ كەزدەسۋى: V دۇنيەجۇزىلىك كوشپەندىلەر ويىندارىنا دايىندىق جالعاسۋدا. بۇل تۋرالى Abai.kz اقپاراتتىق پورتالى حابارلادى. 

قر تۋريزم جانە سپورت ءمينيسترى ەرمەك مارجىقپاەۆ استاناداعى 5-ءشى دۇنيەجۇزىلىك كوشپەندىلەر ويىندارى اياسىنداعى قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى ءمينيسترىنىڭ ورىنباسارى شىڭعىس ەسەنگۇل ۋلۋمەن كەزدەستى. ەرمەك مارجىقپاەۆ قىرعىزستاندىق ارىپتەسىنە ىنتىماقتاستىق ءۇشىن العىس ءبىلدىرىپ، بيىلعى سپورتتىق جارىسقا الەمنىڭ 89 ەلى قاتىسۋعا ءوتىنىش بىلدىرگەنىن اتاپ ءوتتى.

«ويىندارعا دايىندىق اياسىندا «قىرعىز رەسپۋبليكاسىنىڭ بالالار وليمپيادالىق اۋىلى» قوعامدىق بىرلەستىگى، قۇقىق يەسىمەن «دۇنيەجۇزىلىك كوشپەندىلەر ويىندارى» لوگوتيپى مەن برەندىن وتەۋسىز پايدالانۋعا ليتسەنزيالىق كەلىسىم جاسالدى. 5-ءشى دۇنيەجۇزىلىك كوشپەندىلەر ويىندارى (دكو) حاتشىلىعىنىڭ بىشكەك كەڭسەسىنىڭ ۇسىنىستارىنا سايكەس، ءبىز ويىنداردى وتكىزۋ ءداستۇرىن ساقتاۋعا باعىتتالعان بىرقاتار مىندەتتى تالاپتى ەسكەردىك. سونىڭ ىشىندە دكو-نىڭ لوگوتيپىندە كوشپەندىلەردىڭ قاسيەتتى سيمۆولى رەتىندە سۋ ەلەمەنتىن ساقتاپ قالدىق», - دەدى قر تۋريزم جانە سپورت ءمينيسترى.

ەرمەك مارجىقپاەۆ ويىنداردىڭ اشىلۋ سالتاناتىندا سپورتشىلار شەرۋىن قىرعىز رەسپۋبليكاسىنىڭ وكىلدەرى باستايتىنىن جەتكىزدى. سونداي-اق اتاقتى قىرعىز كومپوزيتورى ەميل كەنجەكۋلوۆ جازعان ءانۇران ورىندالادى. استاناداعى 5-ءشى دۇنيەجۇزىلىك كوشپەندىلەر ويىندارى سپورتتىڭ 21 تۇرىنەن ءوتىپ، 97 مەدال جيىنتىعى ساراپقا سالىنادى. كوشپەندىلەر ويىندارىنىڭ باعدارلاماسى سپورت، مادەنيەت جانە عىلىم باعىتىنداعى وقيعالاردى قامتيدى. ەستەرىڭىزگە سالا كەتەيىك، دۇنيەجۇزىلىك كوشپەندىلەر ويىندارى يۋنەسكو-نىڭ ماتەريالدىق ەمەس مادەني مۇرا تىزىمىنە ەنەدى جانە 8-13 قىركۇيەك كۇندەرى استانادا وتەدى. ەلورداعا 2000-نان استام سپورتشىلار مەن رەسمي تۇلعالار، 100 مىڭنان استام تۋريستەر كەلەدى دەپ كۇتىلۋدە. ويىنداردى دايىنداۋ مەن وتكىزۋگە 1000 ەرىكتى جۇمىلدىرىلادى دەپ جوسپارلانۋدا.

Abai.kz