7 قازاقستاندىق ۆولونتەر بۇۇ قۇرىلىمدارىندا تاعىلىمدامادان وتەدى. بۇل تۋرالى قر مادەنيەت جانە اقپارات مينيسترلىگى حابارلادى.

قازاقستان رەسپۋبليكاسى مادەنيەت جانە اقپارات مينيسترلىگى مەن بىرىككەن ۇلتتار ۇيىمىنىڭ ەرىكتىلەر باعدارلاماسى (بۇۇ) اراسىنداعى كەلىسىم اياسىندا جەتى قازاقستاندىق ۆولونتەر بۇۇ-نىڭ ءارتۇرلى قۇرىلىمدارىندا (UNFPA, UN Women, UNDP, UN ESSCAP, IOM) تاعىلىمدامادان وتەدى. ولار 266 ۇمىتكەردىڭ اراسىنان كونكۋرستىق نەگىزدە ىرىكتەلدى. ءۇش جىل بويى ۆولونتەرلەر كەنيا، تايلاند جانە تۇركيادا جۇمىس ىستەيدى.

جۇرگىزىلىپ جاتقان جۇمىستار ۆولونتەرلىك قىزمەت سالاسىنداعى الەمدىك وڭ تاجىريبەنى قازاقستاندا ودان ءارى ىسكە اسىرۋعا مۇمكىندىك بەرەدى.

ەسكە سالايىق، 2019 جىلى قازاقستان رەسپۋبليكاسىنىڭ ۇكىمەتى مەن بۇۇ ەرىكتىلەر باعدارلاماسى قازاقستاندىق ۆولونتەرلەردىڭ بۇۇ-نىڭ حالىقارالىق ۆولونتەرلەرى رەتىندە جۇمىس ىستەۋىن قامتاماسىز ەتەتىن كەلىسىمگە قول قويعان ەدى.

ناتيجەسىندە 7 قازاقستاندىق الەمنىڭ ءارتۇرلى ەلىندە (كەنيا، يوردانيا، تۇركيا جانە تايلاند) وزدەرىنىڭ ۆولونتەرلىك قىزمەتىن ءساتتى جۇزەگە اسىردى، ولاردىڭ ىشىندە 6 ۆولونتەر بۇكىل الەم بويىنشا بۇۇ قۇرىلىمدارىنا جۇمىسقا شاقىرىلدى.

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz