قازاقستان ۇكىمەتى الاپات سۋ تاسقىنىنان كەيىن شاعىن جانە ورتا بيزنەستىڭ مۇلىككە قاتىستى شىعىندارىن وتەۋ ءۇشىن ءوز رەزەرۆىنەن 12 ميلليارد تەڭگەدەن استام قارجى ءبولۋ تۋرالى قاۋلى قابىلدادى. بۇل تۋرالى Abai.kz ۇكىمەتتىڭ ءباسپاسوز قىزمەتىنە سىلتەمە جاساپ حابارلايدى.

پرەزيدەنتتىڭ تاپسىرماسىمەن ۇكىمەت سۋ تاسقىنى سالدارىن جويۋ بويىنشا كەشەندى جۇمىس جۇرگىزىپ جاتىر. سونىڭ ىشىندە ازاماتتاردى جاڭا تۇرعىن ۇيمەن قامتاماسىز ەتۋ، بىرجولعى قارجىلىق كومەك كورسەتۋ، ۇيلەردى جوندەۋ مەن قالپىنا كەلتىرۋ شىعىندارىن وتەۋ بار.

قازىرگى تاڭدا زارداپ شەككەن بيزنەسكە كەلتىرىلگەن زالالدى وتەۋ جۇمىستارى باستالدى. وڭىرلىك كوميسسيالار شاعىن جانە ورتا كاسىپكەرلىك سۋبەكتىلەرىنىڭ  جالپى سوماسى 1,5 ميلليارد تەڭگەگە 178 ءوتىنىمىن قاراپ، ماقۇلدادى.

اكىمدىكتەردىڭ باعالاۋىنشا 746 شوب سۋبەكتىسى زارداپ شەكتى. ولاردىڭ قاتارىندا ازىق-تۇلىك دۇكەندەرى، كافەلەر، تقكو، قوناق ۇيلەر جانە باسقالارى بار. بۇگىندە باعالاۋ جانە سمەتالىق جۇمىستار جۇرگىزىلىپ جاتىر، ولاردىڭ قورىتىندىسى بويىنشا وتىنىمدەر وڭىرلىك كوميسسيالاردىڭ قاراۋىنا ەنگىزىلەدى.

وسىلايشا، ۇكىمەت رەزەرۆىنەن 12 ميلليارد تەڭگەدەن استام قاراجات شوب مۇلىك شىعىندارىن وتەۋ ءۇشىن اقمولا، اقتوبە، اتىراۋ، باتىس قازاقستان، قوستاناي جانە سولتۇستىك قازاقستان وبلىستارىنىڭ بيۋدجەتىنە اۋدارىلادى.

سۋ تاسقىنى سالدارىن جويۋ جونىندەگى جۇمىس ۇكىمەت باسشىلىعىنىڭ تۇراقتى باقىلاۋىنا الىنعان.

Abai.kz