مادەنيەت جانە اقپارات مينيسترلىگى قازاقستان ايماقتارىندا وڭىرلىك نىشانداردى ازىرلەۋگە قاتىستى جاڭا ەرەجە ازىرلەدى. اتالمىش ەرەجە اشىق نقا پورتالىندا قوعامدىق تالقىعا ۇسىنىلدى. 

ەرەجەدە لوگوتيپتە رەسمي اتاۋلاردىڭ مەملەكەتتىك تىلدە جازىلۋ كەرەكتىگى شەگەلەنىپ جازىلعان.

ەرەجەگە سايكەس، وڭىرلىك نىشانداردىڭ جوباسىن ازىرلەۋدە گەرالديكالىق ءتارتىپتى، مەملەكەتتىك مۇددەنى، ۇلتتىق قۇندىلىقتار مەن ءداستۇردى، حالىقتار بىرلىگىن، مادەني، تاريحي، گەوگرافيالىق، ساياسي، الەۋمەتتىك-ەكونوميكالىق ەرەكشەلىكتەر ەسكەرىلەدى. 

تاعى ءبىر ماڭىزدى تالاپ – وڭىرلىك نىشانداردا رەسمي اتاۋلار مەملەكەتتىك تىلدە جازىلۋى كەرەك.

لوگوتيپ جوباسى اۆتورلىق قۇقىقتى بۇزۋعا نەمەسە پلاگياتقا جول بەرىلمەيتىن، بۇرىن قولدانىستا بولماعان، ەلدى مەكەننىڭ كەلەشەك باعىت-باعدارىن ايقىندايتىن تىڭ تۋىندى بولۋى ءتيىس.

سۋرەت: facebook.com

Abai.kz