الماتى قالاسىندا ۆولونتەر جاستاردىڭ قاتارى كۇن ساناپ ارتىپ كەلەدى. كومەك قولىن ۇسىنۋدان ايانبايتىن بەلسەندى جاستاردىڭ جۇمىسى قۋانتپاي قويمايدى. الماتىدا وسىنداي يگى ىستەرىمەن كوپشىلىكتىڭ ىقىلاسىنا بولەنىپ جۇرگەن «كلۋب دوبرياكوۆ الماتى» ەرىكتىلەر توبى جۇمىس ىستەيدى. Abai.kz ءتىلشىسى وسى ەرىكتىلەر توبىنىڭ ۇيلەستىرۋشىسى جانسايا ومىربەكوۆامەن سۇحباتتاسىپ، ەرىكتىلەردىڭ جۇمىسىمەن تانىستى.

- جانسايا ومىربەكقىزى، «كلۋب دوبرياكوۆ الماتى» ۆولونتەرلىك قوزعالىسى نەمەن اينالىسادى؟ كلۋبتى اشۋعا نە تۇرتكى بولدى؟

- «كلۋب دوبرياكوۆ» ۆولونتەرلىك ۇيىمىنىڭ نەگىزىن استانا قالاسىندا گۇلميرا ابدىراشەۆا قالاعان. ال الماتىدا ۇيىمنىڭ جۇمىسى 2015 جىلى قىركۇيەك ايىندا قۇرىلدى. مادينا مىرزاحمەتوۆانىڭ باستاماسىمەن «كلۋب دوبرياكوۆ الماتى» ۇيىمى جۇمىسىن باستادى. سودان  بەرى كلۋب بەلسەندى تۇردە جۇمىس ىستەيدى. مەن سىزدەرگە ۇيىمنىڭ نەگىزگى  4 باعىتىن ايتىپ بەرەيىن. ولار:

ءبىرىنشىسى - «بەس اسىل»باعىتى. بۇل باعىت تۇرمىس تاۋقىمەتىن تارتاقان  وتباسىنداعى بالالاردىڭ بىلىمىنە باعىتتالعان. مۇندا  بالالار سپورت، مۋزىكا سياقتى قوسىمشا ۇيىرمەلەرگە قاتىسادى. ءبىز جاعدايى تومەن بىراق ونەر مەن سپورتقا جاقىن بالالارعا مۇمكىندىك بەرگىمىز كەلەدى.

ەكىنشىسى -  «يت پەن مىسىق» جوباسى. وزدەرىڭىز بىلەسىزدەر قازىر قاراۋسىز قالعان  ۇيسىز جانۋارلارى كوپ. كلۋب وسىنداي جانۋارلاعا قامقورلىق جاساۋدى كوزدەيدى.

ءۇشىنشى - «ەكو دوبرياك» باعىتى. اتى ايتىپ تۇرعانداي قورشاعان ورتانى قورعاۋعا باعىتتالعان.

ءتورتىنشى - «قاسيەت» - جالعىز قالعان قارتتارعا كوڭىل ءبولۋ ماقساتىندا قۇرىلعان جوبا. جوبا شەڭبەرىندە اپتا سايىن قارتتارعا ىستىق تاعام تاراتۋ قاراستىرىلعان.

- بۇگىندە كلۋبتا قانشا ۆولونتەر بار، بيىل قانداي ءىس-شارالاردى وتكىزدىڭىزدەر؟

- قازىر بىزدە ۇيىمدا 100-دەن استام ۆولونتەر بار. ال تۇراقتى  تۇردە ەرىكتىلىكپەن اينالىساتىنى 30-دان اسادى. ءبىزدىڭ ۆولونتەرلاردىڭ بارلىعىنىڭ نەگىزگى جۇمىسى بار. ولار وزدەرىنىڭ بوس ۋاقىتتارىن ەرىكتىلىككە ارنايدى. ارقايسىسى ەرىكتى بولۋ ارقىلى قوعامعا پايداسىن تيگىزگىسى كەلەدى. ءبىز قالا اكىمدىگىمەن، الەۋمەتتىك ورتالىقتارمەن تىكەلەي جۇمىس ىستەيمىز.  بيىل جوعارىدا اتالعان باعىتتار بويىنشا ناقتى ءىس-شارالار ءوتتى. ەندى الداعى وقۋ جىلىنا تۇرمىسى تومەن وتباسىلاردىڭ بالالارىن مەكتەپكە دايىنداۋعا اتسالىسپاقپىز. «مەكتەپكە جول» اكتسياسىن ۇيىمداستىرىپ 100-دەن استام وتباسىنىڭ بالالارىنا قۋانىش سىيلاماقشىمىز.

- ۆولونتەرلىك جۇمىس كەزىندەگى ەرەكشە وقيعامەن بولىسسەڭىز؟

- بيىل مەنىڭ «كلۋب دوبرياكوۆ الماتى» ۇيىمىندا جۇرگەنىمە 7 جىل. بۇل ارالىقتا كوپتەگەن ەستەن كەتپەس وقيعالار ورىن الدى. ەرەكشە ەسىمدە قالعانى لوسىدان 4-5 جىل بۇرىن ءبىز الماتىداعى الپينيست اتانىڭ ۇيىنەن ءۇش كاماز قوقىس شىعاردىق. ءۇيىنىڭ كىرە بەرىسىنەن تورىنە دەيىن قوقىس ءۇيىندىسىن جيناعان. اتانىڭ كورشىلەرى قالالىق كوممۋنالدىق شارۋاشىلىق باسقارماسىنا ارىز تۇسىرگەن. اكىمدىك تاراپىنان ءبىز سەكىلدى بىرنەشە ۆولونتەرلىك ۇيىمعا ءوتىنىش ءتۇسىپتى. بىردەن كوماندامىزبەن كىرىسىپ، اتانىڭ ءۇيىن تازالادىق. نەگىزىنەن ءبىزدىڭ ءاربىر ءىسىمىز ەموتسياسىز وتپەيدى. ەڭ باستى - ماقساتىمىز قالامىزدىڭ دامۋىنا، تازالىعىنا، ونداعى مۇقتاج ادامدارعا تيتتەي دە بولسا كومەك ۇسىنعىمىز كەلەدى. قالامىزدا ۆولونتەرلىك جاقسى دامىعان. اسىرەسە ستۋدەنتتەر بەلسەندى اتسالىسادى.

- ۆولونتەرلىكتى تانىمال ەتۋ ءۇشىن ءالى دە نە ىستەۋىمىز كەرەك دەپ ويلايسىز؟

- ءبىزدىڭ ەلىمىزدە ۆولونتەرلىكتى دامىتۋعا مەملەكەت تاراپىنان قولداۋ بار. اسىرەسە پاندەميا كەزىندە ەرىكتىلەردىڭ جۇمىلا ىستەگەن جۇمىستارى كوپشىلىككە ۇلگى بولدى. سودان بەرى ۆولونتەر بولعىسى كەلەتىن جاستارىمىزدىڭ دا قاتارى ارتتى. الماتى قالاسىندا ەرىكتىلەر كلۋبىنىڭ ورتاق فرونت ءوفيسى بار. ورتالىققا جينالىپ باسقا دا ۆولونتەرلىك ۇيىمدارمەن ەتەنە ارالاسىپ، ارمان ماقساتتارىمىزدى ايقىنداپ، ءوزارا تاجىريبە الماسامىز. 

اbai.kz