قىزىلقىرعىن جىلدارى قىسپاقتان قاشىپ، اۋا كوشىپ، شەت جايلاعان ءبىراز قازاقتىڭ قيلى تاعدىرىمەن ۇشتاسقان شەرمەندە اۋەنى جارتى عاسىردان استام ۋاقىت بۇرىن مۇحيت اسىپتى.

ناقتاپ ايتقاندا، 1966-1972 جىلدارى اۋعانستانعا بىرنەشە رەت ەتنوگرافيالىق ەكسپەديتسيا جاساعان امەريكالىق ەتنوگراف م. سلوبين مەن جاپون تەكتى امەريكالىق مۋزىكاتانۋشى، ەتنوگراف ح.ل. ساكاتا ونداعى جەرگىلىكتى قازاقتار دومبىرامەن ورىنداعان 40-قا جۋىق ءان-كۇي مەن جىر-تولعاۋدى ۇنالعىعا جازىپ، سۋرەت پەن ۆيدەوعا ءتۇسىرىپتى. سول سۋرەت پەن ۆيدەولاردى كورىپ، سارىنىن تىڭداپ وتىرىپ، اۋعان اسقان قازاقتىڭ قيلى تاعدىرى مەن قاسىرەتىن سەزگەندەي بولدىم. اسىرەسە، بەتاشار، جىر-تولعاۋ جانە ورتەكە ويناتقان كۇي ەرەكشە. دومبىرامەن ورتەكە ويناتۋ بۇگىن دە از كەزدەسەتىنىن ەسكەرسەك، بۇل ۆيدەو سول ونەر ءتۇرىن زەرتتەۋشىلەر ءۇشىن تاپتىرماس مۇرا. ەكسپەديتسيا اۆتورى سونداعى قازاقتاردان يسمايل اليقوجا، مونتاي قىتاي-قازاق، مىرزاشباي قاتارلى ونەرپازداردىڭ اتىن اتاپ، ارنايى سۋرەتكە ءتۇسىرىپتى. اتالمىش ءان-كۇي، جىر-تولعاۋلاردىڭ ناۋرىزباي، كەڭشىلباي، گۇلىناي، تىرنا، كوروعىلى، قادەر، قىنجىلدى؟، ت.ب. اتاۋلارىنىڭ استارىندا دا ءبىراز سىر جاتقانداي.

سونىمەن قاتار ەكسپەديتسيا اۆتورى ونداعى قازاقتاردىڭ تۇرمىس-تىرشىلىگى مەن گەراتتاعى قىپشاق-قازاق قوعامى تۋرالى دا قۇندى ماتەريالدار مەن سۋرەتتەر ءتۇسىرىپتى. سول مۇرا قازىر اقش-تا ارحيۆتە ساقتاۋلى تۇر.

مىنا سۋرەتتەگى قارت - يسمايل اليقوجا. دومبىراسىن شەرتە وتىرىپ، الدە ءبىر نۇكتەگە قادالا قاراعان ويلى جانارىنان، مۇڭلى ۇسقىنىنان شەر كوڭىلدىڭ زارى، شەرمەندە ساعىنىشتىڭ تابى مەنمۇندالايدى.

ومىربەك قانايدىڭ جازباسى

Abai.kz