بۇرىنعى ىشكى ىستەر ءمينيسترى ەرلان تۇرعىمباەۆ شارتتى تۇردە بەس جىلعا سوتتالدى. بۇل تۋرالى ازاتتىق جازدى. 

استانا قالاسىنىڭ قىلمىستىق ىستەر جونىندەگى اۋدانارالىق سوتى بۇرىنعى ءمينيستردى “بيلىك وكىلەتىن اسىرا پايدالانۋ” بابى بويىنشا كىنالى دەپ تانىپ، بەس جىل شارتتى جازا بەردى. ودان بولەك، سوت ونى ون جىل بەلگىلى ءبىر قىزمەتتەردى اتقارۋ قۇقىعىنان دا ايىرعان. بۇل جونىندە استانا سوتىنىڭ ءباسپاسوز قىزمەتى حابارلادى.

سوتتىڭ حابارلاۋىنشا، تۇرعىمباەۆ “وزىنە تاعىلعان ايىپتاردى تولىق مويىنداپ، وكىنگەن”.

“اسا قۇپيا ساناتقا جاتاتىن” ءىس كىنانى مويىنداۋ تۇرىندەگى پروتسەسسۋالدىق كەلىسىم فورماسىندا [سوتقا] ءتۇستى. سوندىقتان ول بىتىمگەرشىلىك ءوندىرىس جاعدايىندا جابىق قارالدى” دەپ جازىلعان سوت حابارلاماسىندا.

قاڭتار وقيعاسىنان كەيىن ىشكى ىستەر ءمينيسترى قىزمەتىنەن بوساعان ەرلان تۇرعىمباەۆ "بيلىك پەن لاۋازىمدىق وكىلەتىن اسىرا پايدالاندى" دەگەن كۇدىكپەن ۇستالعانى بيىل ساۋىردە بەلگىلى بولعان. باس پروكۋراتۋرا قىلمىستىق ىستە مەملەكەتتىك قۇپيالار بولعاندىقتان، باسقا دەرەكتەر جاريالانبايتىنىن ايتقان.

Abai.kz