قۇرمەتتى مۇسىلمان باۋىرلار، وتانداستار!

قۇرمەتتى مۇسىلمان باۋىرلار، وتانداستار!

مىنەكي، ورازا ۇستاپ، تاراۋىق نامازىن وقىپ، ءپىتىر، ساداقامىزدى بەرەتىن قاسيەتتى را­ما­زان ايى دا اياقتالدى. اللا تاعالانىڭ راحى­مى مەن مەيىرىمىنە، كەشىرىمى مەن شاراپاتىنا تولى بۇل ايمەن قوشتاساردا كوڭىلدە قيماس­تىق سەزىمى ۇيالادى. مۇنى ءالى تالاي ەسكە الا­تى­نىمىز حاق. الايدا قاسيەتتى ايدىڭ ارتىن­شا ايت مەرەكەسى دە كەلىپ، دۇنيە مەن اقىرەت­تىڭ عاجاپ قۇندىلىقتارىن سەزدىرىپ، جۇرە­گى­مىزدى ەرەكشە راقاتقا كەنەلتتى. بۇل مەرەكە ءبىر ايلىق ورازادان كەيىنگى جالپى حالىقتىق اۋىز اشار ىسپەتتەس. كەي عالىمداردىڭ بۇل ايتتى "يفتار" (اۋىز اشار) ايتى" دەپ اتاۋى دا تەكتەن تەك ەمەس.

اللا ەلشىسىنىڭ (س.ع.س.) حاديستەرىندە ايت مەيرامىنا تاعام جەپ، سۋسىن ءىشۋ، اللانى ەسكە الۋ، قوناق كۇتۋ ءتان ەكەندىگى بىلدىرىلگەن. ەندە­شە ايت كۇندەرىن قۇلشىلىعىمىزدى كە­مىت­پەستەن، كوتەرىڭكى كوڭىل-كۇيمەن جانە باسقا دا ساۋابى مول ىستەرمەن وتكىزگەنىمىز ابزال.

پايعامبارىمىز (س.ع.س.) مەككەدەن ءمادي­ناعا كوشىپ كەلگەندە جەرگىلىكتى حالىقتىڭ مەيرامداپ كوڭىل كوتەرىپ جاتقانىن كورىپ: "بۇل قانداي مەرەكە؟" دەپ سۇراعاندا، ولاردان: "بۇل ءبىزدىڭ يسلامعا دەيىن تويلاپ كەلە جات­قان مەرەكەلەرىمىز" دەگەن جاۋاپ ەستىدى. سوندا راسۋلۋللا (س.ع.س..): "اللا سىزدەرگە بۇدان دا ۇلىق ەكى مەيرام بەردى. ولار رامازان جانە قۇربان ايتتارى" دەپ وسى يسلامي مەيرام­داردىڭ مارتەبەلى ەكەندىگىن بىلدىرگەن.

ايت كۇنىنىڭ وزىنە ءتان جاراسىمدى دا ساۋاپ­تى امالدارى مول. ەرتە ويا­نىپ، عۇسىل قۇيىنىپ، دارەت الىپ، تازا، جاڭا كيىم كيىپ، جۇپار ءيىس سەۋىپ، ايت نامازىنا قاتىسۋ سۇننەت.

ورازا ايتىندا اتا-انا مەن قاريالارعا سالەم بەرىپ باتاسىن الۋ، سىرقات كىسىلەردى زيارات ەتىپ كوڭىلىن سۇراۋ دا ىزگىلىكتى امالدارعا جاتادى.

رەنجىسىپ قالعان كىسىلەرمەن تاتۋلاسىپ، قاتىناس ۇزىلگەن تۋىستاردىڭ ۇيلەرىن ارالاۋ دا ەرەكشە ماڭىزدى. ويتكەنى اللا تاعالا: "سەن كەشىرىم جولىن ۇستان، جاقسىلىققا بۇيىر، ناداندىقتان بەت بۇر" ("اعراف" سۇرەسى، 199-ايات) دەپ مۇسىلمانداردى بارىنشا كەشىرىمدى بولا تۇسۋگە شاقىرعان. كوڭىلى قاياۋ مۇقتاج ادامدار مەن جارلى-جاقىباي، مىسكىندەر ايت كۇندەرىندە كوبىرەك كومەك-قولداۋ، ساداقا كۇتىپ، دامەتەدى. سوندىقتان دا مۇنداي مۇقتاج جاندارعا قايىر-ساداقا ۇلەستىرىپ، كوڭىلدەرىن اۋلاعان ماقۇل.

ەل مۇسىلماندارى قازاقستاننىڭ جۇرگىزىپ وتىرعان ىشكى جانە سىرتقى ساياساتىنا قولداۋ بىلدىرۋمەن قاتار ۇلتارالىق كەلىسىم مەن ءدىن­دەرارالىق توزىمدىلىكتى ودان ءارى دە نىعايتۋعا، سۇيىكتى وتانىمىزدى وركەندەتۋ مەن ونىڭ مادەني، رۋحاني قۇندىلىقتارىن ساقتاپ، دامىتا تۇسۋگە بۇدان بىلاي دا كۇش-جىگەرىن اياماي جۇمساي بەرمەك. بىزدەگى بۇگىنگى ءوزارا سىيلاستىق پەن جاراسىمدىلىق، ىنتىماقتاستىق پەن دىندەرگە دەگەن قۇرمەت باستى ماقساتىمىز بولىپ قالا بەرمەك. ءبىز بۇل جەتىستىكتەرىمىز ءۇشىن اللا تاعالاعا ءدايىم شۇكىرشىلىك ەتۋگە ءتيىسپىز.

ەلباسى نۇرسۇلتان ءابىشۇلى نازارباەۆتىڭ ەلىمىزدى الەمنىڭ باسەكەگە قابىلەتتى ەلۋ ەلىنىڭ قاتارىنا قوسۋ جونىندەگى باستاماسىنا ناقتى ىسپەن بارىنشا قولداۋ ءبىلدىرىپ، ءبىر جاعادان باس، ءبىر جەڭنەن قول شىعارايىق.

ەلىم، جەرىم، ءدىنىم، وتانىم، حالقىم دەپ جار قۇلاعى جاستىققا تيمەي جۇرگەن ەلباسى مەن ەل قامىنداعى اسىل ازاماتتارىمىزعا اللا تاعالا جار بولسىن! ويعا العان ءىس-جوسپارلارىن جۇزەگە اسىرۋعا كۇش-قۋات بەرگەي!

اسىل ءدىنىمىز شاقىرعانداي، بەيبىت­، ءارى ءوزارا سىيلاستىق پەن ىنتىماقتا ءومىر سۇرەر بولساق، وندا بۇدان دا قارقىندى دامي تۇسەرىمىز ءسوزسىز.

اللا تاعالا رامازان ايىندا ۇستاعان ورا­زالارىمىز بەن قۇلشىلىق-عيباداتتارىمىزدى قابىل ەتىپ، ەكى دۇنيەنىڭ باقىتىنا بولەگەي! حالقىمىزدىڭ ىنتىماق-بىرلىگىن ارتتىرىپ، ىرىس-نەسىبەسىن ادالىنان مولايتقاي! ءدىنى­مىزگە قۋات، وزىمىزگە يمان بايلىعىن بەرگەي! ءاۋمين!

ىزگى تىلەكپەن، شەيح ءابساتتار قاجى دەربىسالى،
قازاقستان مۇسىلماندارى ءدىني باسقارماسى
جانە ورتا ازيا مۇفتيلەر كەڭەسىنىڭ توراعاسى، باس مۋفتي
"ەگەمەن قازاقستان" رەسپۋبليكالىق گازەت، 2009-09-18