الگىندە عانا رەسەي ۋكراينا قالالارىنا جاپپاي زىمىران جانە درون سوققىلارىن جاسادى. ۋكراينا تارابىنىڭ ەسەبىنشە، رەسەي ءبىر دەگەندە ۋكراينانىڭ 15 ايماعىنا سوققى بەرگەن. ول ءۇشىن 127 زىمىران، 109 سوققىلاۋشى درون قولدانعان.

بۇل رەسەيدىڭ سوڭعى ايلارداعى ەڭ اۋقىمدى «شابۋىلى» بولدى. ونى پرەزيدەنت زەلەنسكي دە، مينيستر ۋمەروۆ تە ايتتى.

رەسەي قانداي زىمىراندار مەن دروندار قولداندى؟ جاۋاپ مىناۋ: «شاحەد» دروندارى، «قاناتتى زىمىراندار» مەن «كينجالدار» قولدانعان.

سوققىلار ۋكراينانىڭ ەنەرگەتيكالىق جانە ازاماتتىق ينفراقۇرىلىمدارىنا باعىتتالعان. سايكەسىنشە، ەلەكتر ستانتسيالارى، ءوندىرىس ورىندارى مەن تۇرعىن ۇيلەر قيراعان. 50 شاقتى ەلدىمەكەن زارداپ شەگىپ، 57 نىسان بۇلىنگەن. قازا تاپقان بەيبىت تۇرعىندار مەن بالالار دا بار. وسى شابۋىلدىڭ سالدارىنان ۋكراينانىڭ ءبىراز ايماعى جارىقسىز قالعان. رەسەيدىڭ باستى كوزدەگەن نىساندارىنىڭ ءبىرى – كيەۆ گەس-ءى بولعان. اتالعان گەس-ءتىڭ 2 بلوگى ىستەن شىققان.

پرەزيدەنت زەلەنسكي: «قولباسشى سىرسكيمەن ۇزاق كەڭەستىم. لايىقتى جاۋاپ بولادى. قازىرگى ساتتە قارسىلاسقا قارىمتا جاۋاپتى دايىنداۋدامىز»، - دەدى.

وسىدان سوڭ، باتىس اقپاراتىندا شىققان 2 حابار:

«Associated Press»: «ۋكراينا رەسەيدىڭ ىشكى اۋماقتارىنا سوققى جاساماق. ول ءۇشىن باتىستىڭ رۇقساتى كەرەك ەمەس، سەبەبى، ۋكراينا «پاليانيتسيا» سوققىلاۋشى درون-زىمىراندارىن قولدانباق. بۇل زىمىران-دروندار بولجالدى تۇردە 600-700 شاقىرىمعا دەيىن جەتۋى مۇمكىن»، - دەپ جازادى.

ال «Politico»: «ۋكرايناعا اقش-قا ءتىزىم ۇسىنباق. وندا رەسەيدىڭ ىشكى اۋماقتارىنداعى پوتەنتسيالدى نىساندار تىزىمدەلگەن. بۇل ءتىزىمدى ۆاشينگتوننىڭ ماقۇلداۋىنا مينيستر رۋستەم ۋمەروۆ الىپ بارماق»، - دەيدى.

ۋكراينا قازىر دە رەسەيدىڭ ىشكى اۋماقتارىنا سوققىلاۋشى دروندار ارقىلى كۇن سايىن بارلاۋ جاساپ كەلەدى. سالىستىرىپ ايتساق، ۋكراينانىڭ سوققىلارى رەسەيدىكى سەكىلدى جاپپاي ءھام بەتالباتى سوققىلار ەمەس، ناقتى ستارتەگيالىق ينفراقۇرىلىمدارعا، ءموز-دەر مەن اسكەري نىساندارعا، سونىڭ ىشىندە اۋە ايلاقتارىنا باعىتتالۋدا.

ال «Forbes»: رەسەيدىڭ كەشەگى ۋكرايناعا جاساعان جاپپاي سوققىسى كرەمل قازىناسى ءۇشىن ەڭ قىمبات سوققىلاردىڭ ءبىرى بولعانىن جازىپتى. ۇشىرىلعان زىمىراندار مەن درونداردىڭ باعالارىن ەسەپتەپ كەلىپ: « بۇل شابۋىلدىڭ قۇنى - 1,3 ملرد دوللاردى قۇرادى»، - دەگەن قورىتىندىعا توقتاعان.

سولاي، رەسەيدىڭ ۋكرايناعا جاساعان ءبىر جولعى جاپپاي سوققىسىنىڭ قۇنى رەسەي بيۋدجەتى ءۇشىن وسىنشا شىعىن بولسا، ارعىسىن ەسەپتەي بەرىڭىز. سوعىستىڭ جالعاسىپ جاتقانىنا 3 جىلعا تاياۋ ۋاقىت بولدى.

نۇرگەلدى ابدىعانيۇلىنىڭ جەلىدەگى جازباسى

Abai.kz