كەشە الماتىداعى «بۋكينيست» دۇكەنىنە بارىپ، ءبىراز كىتاپ ساتىپ الدىم. سونىڭ ىشىندە ماسكەۋدەگى «پروگرەسس» باسپاسىنان 1975 جىلى شىققان «زارۋبەجنايا پوۆەست» دەپ اتالاتىن كىتاپتى ەرەكشە اتاعىم كەلىپ تۇر.

«ينوستراننايا ليتەراتۋرا» جۋرنالىن بىلەتىن شىعارسىزدار. كەڭەس وداعى كەزىندە قاتتى وقىلاتىن. تيراجى دا كوپ بولاتىن. قازىر ارينە بىزدەگىدەي ولاردىڭ دا وقىرمانى مۇلدە ازايدى. بىراق، شىعىپ جاتىر. عالامتوردا سايتى بار. بىراق تەگىن ەمەس، جاريالانعان شىعارمالاردىڭ ەلەكتروندىق نۇسقاسىن ساتىپ الىپ وقيسىز. ءبىر كەزدەرى اتالمىش جۋرنالدا جاريالانعان ۇزدىك شىعارمالاردى كىتاپ قىلىپ باسىپ شىعارۋ ءداستۇرى بار ەدى. مەنىڭ قولىمداعى «زارۋبەجنايا پوۆەست» جيناعى سول سەريامەن شىققان. بۇندا جاپوننىڭ الەمگە ايگىلى جازۋشىسى كوبا ابەنىڭ «جەنششينا ۆ پەسكاح»، برازيليالىق ەريكو ۆەريسسيمونىڭ «پلەننيك»، شۆەيتساريالىق فريدريح ديۋررەنماتتىڭ «اۆاريا»، بولگاريالىق يوردان راديچكوۆتىڭ «جاركي پولدەن»، يامايكالىق ۆيكتور ءريدتىڭ «لەوپارد»، پولشالىق ەجي ستاۆنيسكيدىڭ «چاس پيك»، امەريكالىق دجەروم د. سەليندجەردىڭ «ناد پروپاستيۋ ۆو رجي»، ۆەنگريالىق يشتۆان ەركەننىڭ «سەميا توتوۆ» دەگەن پوۆەستەرى توپتاستىرىلعان. كورىپ وتىرسىزدار، ءبارى دە مىقتى جازۋشىلار، ءبارى دە ۇزدىك شىعارمالار. پوۆەستەر دەپ جالپى اتاۋمەن بەرىلگەنىمەن، بۇندا كولەمدى روماندار دا بار. كول-كوسىر قازىنا. كولەمى 950 بەت، ءبىر كەمشىلىگى – ارىپتەرى تىم ۇساق. ءوزى قىزىل كىرپىشتەن دە قالىڭ.

كەزىندە شەتەلدىك قالامگەرلەردىڭ ۇزدىك شىعارمالارىن ءبىر جيناققا توپتاپ شىعارۋ ءداستۇرى بىزدە دە بار ەدى. بىراق قازىر سول ءۇزىلىپ قالدى. بۇل باعىتتا «اۋدارما» باسپاسى وتە جاقسى جۇمىس ىستەدى. وكىنىشكە وراي جابىلىپ قالدى. قازىر ەندى «فوليانت» باسپاسى ارا-تۇرا شەتەلدىك قالامگەرلەردىڭ ۇزدىك شىعارمالارىن اۋدارتىپ، كىتاپ قىلىپ باستىرىپ ءجۇر. دەگەنمەن، بۇل باعىتتا ەشكىم دە جۇيەلى جۇمىس اتقارىپ جاتقان جوق.

قاي سالادا بولماسىن، وزىمىزبەن-ءوزىمىز تۇيىقتالىپ قالۋعا بولمايدى. وندا دامۋ مەن ءوسۋ دە جوق. سوندىقتان ەل ەرتەڭىن، ۇرپاق قامىن ويلاساق، وسىنداي يگى داستۇرلەردى قايتا جاڭعىرتۋ كەرەك!

دۋمان رامازان

Abai.kz