مەملەكەت باسشىسى قاسىم-جومارت توقاەۆ 2 قىركۇيەك كۇنى قازاقستان حالقىنا «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىن جاسادى. اتالعال جولداۋدا ەل تاعدىرىنا قاتىستى ماڭىزدى ماسەلەلەر قامتىلدى. ءبىز وسى رەتتە اقىن، اكادەميك باۋىرجان جاقىپ پەن ەكس-دەپۋتات انار جەتىباەۆادان پىكىر سۇرادىق...

ەلىمىز وركەندەيتىن بولادى!

باۋىرجان جاقىپ،

قازاقستان جازۋشىلار وداعى باسقارما توراعاسىنىڭ ورىنباسارى، قر ۇلتتىق عىلىم اكادەمياسىنىڭ اكادەميگى:

– مەملەكەت باسشىسى قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا ارناعان جولداۋىندا حالىقتىڭ ءال-اۋقاتىن جاقسارتۋعا باسا نازار اۋداردى.

مەنىڭ ءوز باسىما ينفراقۇرىلىمعا قاتىستى وزەكتى ماسەلەلەردى شەشۋ باعىتى بويىنشا ايتىلعان ءتۇيىندى ويلار ەرەكشە اسەر ەتتى. ماسەلەن، «استانا-الماتى، اقتوبە-اتىراۋ-استراحان، تالدىقورعان-وسكەمەن باعىتىنداعى كۇرە جولداردى قايتا جاڭعىرتۋ جۇمىستارى اياقتالىپ قالدى»، - دەگەن سوزدەرى ايرىقشا قۋانتتى. مەن اباي وبلىسىندا تۋىپ-وسكەنمىن. جىلدار بويى ەلگە بارعاندا، جول قيىندىعىن كورىپ كەلەمىن. ەندى سول جول زاماناۋي تالاپقا ساي جوندەلىپ، ءبىتىپ جاتسا، نۇر ۇستىنە نۇر بولار ەدى.

سونداي-اق، «بالقاش جانە الاكول دەمالىس ايماقتارىنداعى ۇشۋ-قونۋ جولاقتارى تولىق جاڭعىرتىلدى»، - دەگەن ءسوزى دە قۋانتتى. جىلدا الاكولگە دەمالىس كەزىندە بارۋ ءۇشىن قينالامىز. ەندى جازعى دەمالىس كەزىندە بىرنەشە اۆيارەيس ۇشىرىلسا، كوپ ادام قولجەتىمدى باعامەن الاكولگە بارىپ ەمدەلىپ، تىنىعىپ قايتاتىن بولادى.

جولداۋداعى ەڭ باستى ماسەلەلەردىڭ ءبىرى - اتوم ەلەكتر ستانساسىن سالۋ ماسەلەسىنە قاتىستى جالپىۇلتتىق رەفەرەندۋم وتكىزۋدى 6 قازاندا وتكىزۋدى ۇسىنۋى. سەمەي پوليگونىنىڭ وراسان زور زاردابىن تارتقان ءبىزدىڭ ەل ءۇشىن اتوم ءسوزىنىڭ ءوزى ۇرەي تۋدىراتىنى راس. بىراق پرەزيدەنتتىڭ: «…ەكونوميكامىز كۇن وتكەن سايىن مول ەنەرگيانى قامتاماسىز ەتە الادى. قازىر دامىعان جانە دامۋشى 30 مەملەكەتتە 200-گە جۋىق اتوم ەلەكتر ستانساسى جۇمىس ىستەپ تۇر»، - دەگەن ناقتىلى دايەكتەرىنەن كەيىن وزىمىزدەن وندىرىلەتىن ۋران شيكىزاتىن پايدالانىپ، ارزان ەنەرگيا كوزىن پايدالانۋ ءتيىمدى ەكەنىنە كوز جەتكىزۋگە بولادى. تەك ونىڭ قاۋىپسىز بولۋى ءۇشىن بۇل سالادا بيىك ماقساتتارعا قول جەتكىزگەن اقش، جاپونيا سياقتى ەلدەردىڭ ماماندارىن تارتۋ ارقىلى اەس سالىنىپ جاتسا، بۇل بولاشاقتىڭ قامىن جەۋدەن تۋعان پەرسپەكتيۆالىق وزىق ءىس بولار ەدى.

مەملەكەت باسشىسىنىڭ ناقتى شەشىمىن تاباتىن اقشا-نەسيە ساياساتى، بيزنەستى جۇرگىزۋگە قاجەتتى جاعدايلاردى جاقسارتۋعا، ەلىمىزدىڭ ونەركاسىپ سالاسىن تولىق پايدالانۋعا قاتىستى، كادرلىق الەۋەتتى ارتتىرۋعا، ۇلت ساۋلىعىن نىعايتۋعا، ەكولوگيالىق احۋالدى جاقسارتۋعا، زاڭ مەن ءتارتىپ يدەولوگياسىن تەرەڭ ورنىقتىرۋعا وراي ايتىلعان ويلارىنىڭ ءبارىن دە قۋاتتايمىن. تەك ءسوز جۇزىندە قالىپ قويماي، وسىنىڭ ءبارى جۇزەگە اسىپ جاتسا، ەلىمىز وركەندەي بەرەتىنىنە سەنىم مول!

بىزگە اتوم ەلەكتر ستانتسياسى قاجەت!    

انار جەتىباەۆا،

پاۆلودار وبلىسىنىڭ ايەلدەر قاناتىنىڭ مۇشەسى، ەكس-دەپۋتات:

– پرەزيدەنت جولداۋىندا ايتقانداي، اتوم ەلەكتر ستانتسياسىن سالۋ ماسەلەسى بويىنشا جالپىۇلتتىق رەفەرەندۋم 6 قازاندا وتەدى. اتوم» دەسە، ءبىزدىڭ حالىق ات تونىن الا قاشادى. اتوم ەلەكتر ستانتسياسى كەيبىرەۋلەر ويلاعانداي اتوم قارۋى ەمەس! ەكەۋىنىڭ الىنۋ ءادىسى ۇقساعانىمەن، فۋنكتسياسى مۇلدەم باسقاشا. اتوم ەنەرگياسىن الەمدە دامىعان ەلدەر عانا پايدالانىپ جاتقان جوق. ونى ءبىز سياقتى دامۋشى ەلدەر ءوز يگىلىگىنە جاراتىپ وتىر. اەس رەاكتورى سۋ–سۋ تەحنولوگياسىن پايدالانادى. مۇنداي تەحنولوگيا قولدانىلعان ستانتسيالاردىڭ بىرىندە دە اپات بولماعان. اتوم ەلەكتر ستانتسياسىندا ۋران 4-5 پايىز عانا بايىتىلادى. ول ەشقانداي جارىلىسقا اكەلمەيدى. سول سەبەپتى شىندىقتى حالىققا جەتكىزۋ — ءبىزدىڭ پارىزىمىز.

جۋىردا قازاقستاندىق ءتورت وقۋشى الەمدە فيزيكادان جارىستا ءبىرىنشى ورىن الدى. ولار ەرتەڭ ەلىمىزگە كەلەدى. ءبىلىمدى بالالار قاي جەردە وزدەرىنىڭ فيزيكالىق عىلىمي ءبىلىمىن، يادرولىق ءبىلىمىن ىسكە اسىرادى؟! تەك اتوم ەلەكتر ستانتسياسىن دامىتقاندا عانا جۇزەگە اسىرا الادى. ءبىلىمدى ۇرپاققا مۇمكىندىك تۋادى. قازاقستاندا جاھاندىق تازا ەنەرگيا كوزدەرىنە كوشۋ ۇردىستەرى اياسىندا اتوم ەلەكتر ستانتسياسىن (اەس) سالىنۋ كەرەك.مەن ءوز باسىم قولدايمىن. سول ءۇشىن،ەلدىڭ ەرتەڭىن ويلاپ مەملەكەت باسشىسى قاسىم-جومارت توقاەۆتىڭ ۇسىنىسىن قولداعانىمىز دۇرىس! بىزگە اتوم ەلەكتر ستانتسياسى قاجەت!

Abai.kz