بالا قۇقىقتارى جونىندەگى ۋاكىل دينارا زاكيەۆا 14 جاستاعى نۇرجان سىدىقتىڭ ولىمىنەن كەيىن اقتوبە وبلىسىنىڭ قوپا اۋىلىنا باردى، دەپ حابارلايدى Abai.kz Azattyq-ruhy.kz/--كە سىلتەمە جاساپ.

زاكيەۆا بۇعان دەيىن جەرگىلىكتى اكىمدىك پەن مەكتەپ باسشىلىعى، پوليتسيا وكىلدەرى جوققا شىعارىپ كەلگەن بۋللينگتى راستادى.

«وقۋشى ۇلدىڭ ولىمىنە قاتىستى جاعدايدى انىقتاۋ ءۇشىن جانە جالپى مەكتەپتەگى جاعدايمەن تانىسۋ ءۇشىن اقتوبە وبلىسى قوپا اۋىلىنا باردىم. سول جەردە مەكتەپ پسيحولوگى، مەكتەپتىڭ الەۋمەتتىك قىزمەتكەرى مەن كامەلەت جاسىنا تولماعان بالالاردىڭ ءىسى جونىندەگى ينسپەكتوردىڭ جۇمىسىمەن تانىستىم. اۋداننىڭ پروكۋرورىمەن بىرگە وقۋشىلار اراسىندا ساۋالناما جۇرگىزدىم»، - دەيدى ول.

وسى ساۋالناما قوپا مەكتەبىندە ۇلكەن سىنىپتا وقيتىن ۇلدار وزدەرىنەن كىشى ۇلداردى ۇرىپ-سوعىپ، ولاردى تاربيەلەپ، ولاردان اقشا بوپسالايتىنىن راستاعان.

«مەكتەپتە وقۋشىلارى اراسىندا ۇلكەندەر كىشىلەردى «تارتىپكە سالاتىن جۇيە» بار ەكەنى انىقتالدى. سونداي-اق، مەكتەپ وقۋشىلارىنىڭ اقشا بوپسالايتىنى تۋرالى دا ءمان-جايلار كەزدەستى. بۇل ماسەلەلەرگە شۇعىل تۇردە نازار اۋدارۋ كەرەك. وسىنىڭ ءبارىن جازىپ، اۋدان اكىمىنە، مەكتەپ باسشىلىعى مەن جەرگىلىكتى پوليتسيانىڭ قولىنا ۇستاتتىم. ويتكەنى، كەزدەسۋ بارىسىندا ولار بۇل مالىمەتتەردى جوققا شىعاردى»، - دەپ جازدى زاكيەۆا.

ەستەرىڭىزگە سالا كەتەيىك، اقتوبە وبلىسى قوپا اۋىلىنىڭ 14 جاستاعى وقۋشىسى نۇرجان سادىقتى 15 وقۋشى ءبىر ساعات بويى قاتىگەزدىكپەن ۇرىپ-سوققان. ونى ۇرعان 10-11 سىنىپ وقۋشىلارى بالانى قانجوسا كۇيىندە دالاعا تاستاپ كەتكەن. ونىڭ ولىمىنە قاتىستى ءىستى باس پروكۋرور بەرىك اسىلوۆ ءوز باقىلاۋىنا الدى.

Abai.kz