ازەربايجان پرەزيدەنتى يلحام اليەۆتىڭ قازاقستانعا رەسمي ساپارى بارىسىندا مەملەكەت باسشىسى قاسىم-جومارت توقاەۆ ەكى ەلدىڭ قارىم-قاتىناسىن نىعايتۋدا مادەنيەت سالاسىنداعى ءوزارا ءىس-قيمىل ەرەكشە ءرول اتقاراتىنىن اتاپ ءوتتى.

ناتيجەسىندە ءوزارا مادەنيەت كۇندەرىن وتكىزۋ تۋرالى كەلىسىم جاسالدى.

2024 جىلعى 24-26 قىركۇيەك ارالىعىندا استانادا ازەربايجان مادەني كۇندەرى وتەدى. 24 قىركۇيەكتە «فيزۋلي-530» كىتابىنىڭ تۇساۋكەسەرى جانە ەتنو-دجاز كونتسەرتى وتەدى. 25 قىركۇيەكتە قازاقستان مەن ازەربايجاننىڭ ۇلتتىق كىتاپحانالارى اراسىندا مەموراندۋمعا قول قويۋ، ەلميرا احۋندوۆا كىتابىنىڭ تۇساۋكەسەرى، سونىمەن قاتار «ازەربايجان ونەرىنىڭ جاۋھارلارى» كورمەسىنىڭ اشىلۋى جانە بي ءانسامبلىنىڭ كونتسەرتى وتەدى. 26 قىركۇيەكتە ازەربايجاننىڭ زاماناۋي ونەرى جانە توميريس يكونوگرافياسى تۋرالى دارىستەر وتكىزىلەدى.

باستى ءىس-شارا 26 قىركۇيەك كۇنى ق. قۋانىشباەۆ اتىنداعى ۇلتتىق مۋزىكالىق-دراما تەاترىندا وتەدى. گالا-كونتسەرتتە ازەربايجاننىڭ حالىق ارتىستەرى ونەر كورسەتەدى.

ايتا كەتەيىك، 2023 جىلدىڭ جەلتوقسانىندا قازاقستان رەسپۋبليكاسىنىڭ ازەربايجان رەسپۋبليكاسىنداعى مادەنيەت كۇندەرى باكۋ قالاسىندا ءوتتى.

Abai.kz