سپورت سالاسىندا «كادرلىق تازالاۋ» باستالدى: جاڭا مينيسترگە تولىق كارت-بلانش بەرىلدى...

بۇعان دەيىن سەنىمدى دەرەككوزگە سۇيەنگەن «DALA INSIDE» وليمپيادادان كەيىن جاپپاي «كادرلىق تازالاۋ» باستالاتىنىن حابارلاعان ەدى.

پاريج وليمپياداسى اياقتالعاسىن سپورتقا جاۋاپتى مەملەكەتتىك مەكەمەلەردە ءتيىستى اۋديت جۇرگىزىلەتىنىن ايتقانبىز. رەفەرەندۋم بىتە سالا «سول جاعالاۋ» وسى ىسكە بىلەك تۇرە كىرىسكەن سىڭايلى. مايلى قۇيرىعى كرەسلوعا جەلىمدەلىپ قالعان سپورت فۋنكتسيونەرلەرى جىلى ورنىمەن جىلاپ-سىقتاپ قوشتاسىپ جاتقانى جايى بار.

كۇنى كەشە بوريس يۆانيششەۆ قىزمەتتەن قۋىلدى. بوكەڭ ەلىمىزدەگى حاككەي سۇيەرگە قاۋىمعا وتە جاقسى تانىس. بيۋدجەتتىڭ موينىنا ءمىنىپ العان، بىراق ناتيجەسى كوڭىل كونشىتپەيتىن «بارىستىڭ» باس ديرەكتورى.

پاريجدەگى فياسكوعا تىكەلەي جاۋاپتى تۋريزم جانە سپورت ءمينيسترى ەرمەك مىرجاقپاەۆتىڭ ۇزاققا بارماسىن وقىرمان الدىمەن DALA INSIDE-تان ەستىگەن ەدى. بىزگە جەتكەن مالىمەت بويىنشا، «سول جاعالاۋ» ونىڭ ورنىن باسقان ەربول مىرزابوسىنوۆقا تولىق كارت-بلانش بەرگەن. سۋ جاڭا مينيستر سپورت سالاسىن استى-ۇستىنە شىعارىپ، تولىق تازالاۋ جۇرگىزۋگە تاس-ءتۇيىن دايىن وتىر. ىلگەرىدەگى بوريا، بوريس يۆانيششەۆتىڭ قىزمەتىنەن قۋىلۋى ەندى-ەندى كوتەرىلىپ كەلە جاتقان داۋىلدىڭ باسى عانا.

«الداعى ۋاقىتتا بيۋدجەتتىڭ اقشاسىن ەمىپ، تالاي جىل بويى ءبىر ورىندا تاپجىلماي وتىرعان سپورت مەنەدجەرلەرى جاپپاي «تاعىنان تايادى»، - دەيدى.

«بارىس» دەمەكشى، وسىناۋ حاككەي كلۋبىنىڭ ەكى تىزگىن، ءبىر شىلبىرىن ەسكى قازاقستاننىڭ بەلدى وكىلى - اسقار ءمامين ۇستاپ وتىرعانىن بىلەسىزدەر.

ءبىزدىڭ بولجاۋىمىزشا اۋىس-ءتۇيىستىڭ الدى «بارىستان» باستالۋى بەكەر ەمەس. دەمەك، جاقىن كۇندەرى مىزعىماستاي كورىنگەن مامينگە قاتىستى ساۋالدار تۋىنداۋى مۇمكىن.

بارىس؟ كلۋبتى شىن مانىندە ءسىز بەن ءبىز «اسىراپ» وتىرمىز. بىلتىر وسى كلۋبقا ەل قازىناسىنان 8,5 ملرد تەڭگە (!) بولىنگەن. ال، ناتيجە ءنول.

«بارىس» بيىلدىققا 14 ويىن وتكىزىپ، سونىڭ 12-سىندە ويسىراي ۇتىلعان. تولىق كارت-بلانش بەرىلگەن سۋ جاڭا مينيستر كلۋبتىڭ كورسەتكىشتەرى ءۇشىن ەكى ادام جاۋاپتى ەكەنىن بىلەتىن سەكىلدى. مۇنىڭ ءبىرى - 2006 جىلدان بەرى «بارىستى» باسقارىپ كەلگەن ىلگەرىدەگى بوريس يۆانيششەۆ پەن حوككەي فەدەراتسياسىنىڭ باسشىسى - اسقار ءمامين.

شىنى كەرەك، بۇعان دەيىنگى ەشبىر ءمينيستردىڭ يۆانيششەۆ-ءمامين تاندەمىنە ءتىسى باتپاعان. بىزگە جەتكەن مالىمەت بويىنشا مىرزابوسىنوۆ تەك بۇل ەكەۋىمەن شەكتەلمەيدى. اس ءىشىپ، اياق بوساتۋدان وزگەنى بىلمەيتىن باسقا دا فەدەراتسيا باسشىلارى مەن سپورت مەنەدجەرلەرىنەن سوڭعى كۇندەرى مازا كەتكەن.

«ازىرگە قارماققا مايدا شاباقتار عانا ىلىگىپ جاتىر. ەندىگى كەزەك – شورتاندار مەن اكۋلالاردا. تولىق كارت-بلانش بەرىلگەن جاڭا مينيستر سپورتتاعى «جاتىپىشەرلەر مەن ارامتاماقتاردى» سالادان تۇبەگەيلى قۋادى»، - دەيدى DALA INSIDE دەرەككوزى. ىلايىم، سولاي بولعاي!

Abai.kz