جىل سايىن قىركۇيەك ايىنىڭ العاشقى كۇندەرى جاقىنداعاندا ەلىمىزدىڭ تۇكپىر-تۇكپىرىندەگى مەكتەپتەردە «مەكتەپكە جول» اتتى يگى داستۇرگە اينالعان قايىرىمدىلىق اكتسياسى باستاۋ الادى.

بۇل ناۋقان بارىسىندا جومارت جۇرەكتى ازاماتتار، كاسىپكەرلەر مەن ەرىكتىلەر الەۋمەتتىك جاعىنان از قامتىلعان جانە كوپ بالالى وتباسىلاردىڭ بالالارىنا وقۋ قۇرالدارىن الىپ بەرىپ، قولداۋ كورسەتەدى. مۇنداي قايىرىمدىلىق شارالارىنىڭ قوعام ءۇشىن ماڭىزى وتە زور، ويتكەنى ەلىمىزدەگى ءاربىر بالانىڭ الەۋمەتتىك جاعدايىنا قاراماستان ءبىلىم الۋعا تەڭ مۇمكىندىگى بولۋى ءتيىس. ءاربىر وقۋشىنىڭ مەكتەپكە ءوز قاتارلاستارىمەن بىردەي دارەجەدە قۋانا بارىپ، الاڭسىز ءبىلىم الۋىنا جاعداي جاساۋ – ءبارىمىزدىڭ ورتاق مىندەتىمىز.

وسى يگى ىسكە ۇلەس قوسۋ ماقساتىندا بيىل Abai.kz اقپاراتتىق پورتالىنىڭ ۇجىمى الماتى قالاسىنداعى ماعجان جۇماباەۆ اتىنداعى نومەرى 137 جالپى ءبىلىم بەرەتىن مەكتەپتە وسىنداي قولداۋعا مۇقتاج وتباسىلارعا شىنايى قۋانىش سىيلادى.

رەداكتسيا قىزمەتكەرلەرى سىرتتان دەمەۋشى ىزدەمەي، وزدەرىنىڭ جالاقىلارىنان قارجى ءبولىپ، ورتاق يگى باستاماعا ۇيىتقى بولدى. ناتيجەسىندە مەكتەپتىڭ الەۋمەتتىك جاعىنان كومەك قاجەت ەتەتىن وتباسىلارىنان شىققان ون بالاسىنا قاجەتتى وقۋ قۇرالدارىمەن تولىق جابدىقتالعان جاڭا مەكتەپ سومكەلەرى سىيعا تارتىلدى. وعان قوسا، ءبىر بالاعا مەكتەپكە قاجەتتى بارلىق كيىم-كەشەك تولىقتاي الىنىپ، بالانىڭ جاڭا وقۋ جىلىنا تولىق دايىندالۋىنا سەپتىگىن تيگىزدى.

وسىنداي بالالاردىڭ جۇرەگىنە جىلۋ سىيلاعان ىزگى شارا تۋرالى مەكتەپ ديرەكتورى ساندۋعاش اقشالوۆا ءوز ريزاشىلىعىن ءبىلدىرىپ، بۇل باستامانىڭ وسكەلەڭ ۇرپاق ءۇشىن ورنى بولەك ەكەنىن اتاپ ءوتتى. مەكتەپ باسشىسىنىڭ ايتۋىنشا، وسىنداي قايىرىمدىلىق اكتسيالارى قوعامداعى مەيىرىمدىلىك پەن جاناشىرلىقتى ارتتىرىپ قانا قويماي، بالالاردىڭ وقۋعا دەگەن ىنتاسىن وياتىپ، ەرەكشە قۋانىش سىيلايدى.

Abai.kz