IQanat وليمپياداسىنىڭ ءى تۋرى بۇكىل قازاقستان بويىنشا – ەلىمىزدىڭ 170 اۋدانىندا باستاۋ الدى! ينتەللەكتۋالدىق سايىسقا اۋىلدىق ەلدى مەكەندەردە تۇراتىن 56 مىڭ وقۋشى قاتىسادى.

IQanat وليمپياداسىنىڭ ەرەكشەلىگى – اكادەميالىق جەتىستىكتەرى مەن مەكتەپتەگى باعالارىنا قاراماستان، ءاربىر بالانىڭ جەڭىسكە جەتۋگە مۇمكىندىگى بار. ءداستۇرلى تەستىلەۋلەردەن ايىرماشىلىعى – IQanat تاپسىرمالارى وقۋشىنىڭ لوگيكالىق جانە ماتەماتيكالىق ويلاۋ، وقۋ ساۋاتتىلىعى جانە قازاق ءتىلىن مەڭگەرۋى سىندى قابىلەتتەرىن باعالاۋعا باعىتتالعان.

ءبىرىنشى تۋردا جەڭىمپاز اتانعان 10 مىڭعا جۋىق بالا ەكىنشى – وبلىستىق تۋرعا ءوتىپ، ونىڭ اياسىندا تەست تاپسىرۋدان بولەك، IQanat جوباسىنىڭ ءۇش كۇندىك دايىندىق شاراسى – قارقىندى ءبىلىم بەرۋ جانە ىنتالاندىرۋ ترەنينگتەرىنە قاتىسادى.

ەكىنشى تۋردا فينالعا وتەتىن 1000-عا جۋىق بالا ايقىندالادى. فيناليستەردىڭ ءبىر بولىگى بۋرابايداعى IQanat مەكتەپ-پانسيوناتىنا وقۋعا قابىلدانىپ، ولاردىڭ جاتىن ورنى، تاماعى، فورماسى مەن وقۋ ماتەريالدارىنا قاجەتتى شىعىندارى تۇگەل وتەلەدى. فيناليستەردىڭ ەكىنشى بولىگى IQanat وليمپياداسىنان كەيىنگى ءۇش جىلدىق قولداۋ باعدارلاماسىنا تەگىن قابىلدانىپ، ونىڭ اياسىندا بالالار ۇبت، حالىقارالىق ەمتيحاندارعا بەلسەندى دايىندالادى، اعىلشىن ءتىلىن، IT داعدىلاردى، soft skills, كاسىپكەرلىك نەگىزدەرىن مەڭگەرەدى. بۇل رەتتە بالالاردىڭ جەتىستىكتەرى وقۋ بارىسىندا دا، ودان تۇلەپ ۇشقاننان كەيىن دە باقىلاۋدا بولادى.

بۇل مۇمكىندىكتەردى بالالارعا IQanat جوباسىنىڭ قامقورشىلارى ۇسىنىپ وتىر. ولاردىڭ قاتارىندا قازاقستاندىق ءىرى بيزنەستىڭ، سونداي-اق شوب وكىلدەرى بولىپ تابىلاتىن، ەلىمىزگە تانىمال 160 كاسىپكەر بار.

جوبا قامقورشىسى الماز تولتاەۆ اۋىل بالالارىنىڭ دامۋىنا نە ءۇشىن قارجى قۇيۋ قاجەتتىگىن ءتۇسىندىردى:

«مەن وتباسىنىڭ تۇرعىلىقتى جەرى مەن قارجىلىق مۇمكىندىكتەرىنە قاراماستان، ءاربىر بالاعا ساپالى ءبىلىم مەن ول ۇسىناتىن مۇمكىندىكتەر قولجەتىمدى بولۋى كەرەك دەگەن سەنىمدەمىن، سوندىقتان IQanat جوباسىن قولدادىم. جوبا اۋىل بالالارىنا قازىرگى ۋاقىتتا ەڭ قاجەتتى داعدىلارعا جۇيەلى تۇردە وقىتادى جانە بۇل ءوزىنىڭ تىكەلەي ناتيجەلەرىن بەرەدى. IQanat باعدارلاماسىمەن قامتىلعان بالالاردىڭ 90%-ى قازاقستاننىڭ جانە شەتەلدىڭ ۇزدىك ۋنيۆەرسيتەتتەرىنە گرانتپەن وقۋعا قابىلدانۋدا. قازىر IQanat تۇلەكتەرى الەمنىڭ 17 ەلىندە ءبىلىم الىپ جاتىر. بۇل جوباعا قوسىلۋ – ءبىزدىڭ ەلىمىزدىڭ تۇراقتى دامۋى مەن ادام كاپيتالىنا ينۆەستيتسيا قۇيۋدى بىلدىرەدى. ويتكەنى، ءدال وسىنداي ىنتالى دا يگى نيەتتى بالالاردان كەلەشەكتە ۇلكەن وزگەرىستەر جاساي الاتىن مىقتى ۇرپاق شىعادى».

IQanat باعدارلاماسى تۇلەكتەرىنىڭ (Alumni) سانى بۇگىندە 2200-دەن استام. ولار – جوبانىڭ ماقتانىشتارى ءارى قوزعاۋشى كۇشى. وليمپيادا، نەگىزىنەن، ءدال وسى تۇلەكتەردىڭ كۇشىمەن وتكىزىلۋدە. بۇگىندە ستۋدەنت اتانعان ولاردىڭ ءبارى دە بىرنەشە جىل بۇرىن وسى جولدى ءجۇرىپ وتكەن، تەستىلەۋدىڭ قىر-سىرىن ەگجەي-تەگجەي بىلەدى. ولار ۇيىمداستىرۋ جۇمىستارىنىڭ بارلىق ساتىسىندا كومەكتەسىپ جاتىر: مەكتەپتەردى ارالاپ، وزگە بالالارعا باعدارلاما ەرەجەسىن تۇسىندىرەدى، ءتىپتى وزدەرى دە تەست قابىلدايدى. IQanat Alumni قوعامداستىعىن بەلسەندى دامىتۋدا – تۇلەكتەردىڭ قاتىسۋىمەن تۇراقتى كەزدەسۋلەر مەن بەلسەندى شارالار وتكىزىلەدى. ودان بولەك، وسى تۇلەكتەردىڭ ءبىر بولىگى IQanat قامقورىنا العان مەكتەپ وقۋشىلارىنا مەنتور بولىپ جاتىر.

2017 جىلى ىرگەسى قالانعان ۋاقىتتان بەرى وليمپيادا 240 مىڭنان استام اۋىل بالاسىن قامتىدى. جىل سايىن جوباعا قر وقۋ-اعارتۋ مينيسترلىگى قولداۋ كورسەتەدى.

Abai.kz