بۇگىن قازاقستان رەسپۋبليكاسىنىڭ باس پروكۋرورى بەرىك اسىلوۆ جاساندى ينتەللەكت سالاسىنداعى الەمگە ايگىلى ساراپشى كاي-فۋ ليمەن جۇمىس كەزدەسۋىن وتكىزدى.

ءىس-شارانىڭ باستى تاقىرىبى IT-ماماندار ەمەس، پروكۋراتۋرا قىزمەتكەرلەرىنىڭ وزدەرى ازىرلەگەن العاشقى تسيفرلىق جاساندى ينتەللەكت قۇرالدارىنىڭ تانىستىرىلىمى بولدى.

مۇنداي ناتيجەلەرگە قازاقستاندىق Q.AI كومپانياسىمەن ىنتىماقتاستىقتىڭ ارقاسىندا قول جەتكىزىلدى.

20-دان استام پروكۋرور ءداستۇرلى باعدارلامالاۋ داعدىلارىنسىز جاساندى ينتەللەكت نەگىزىندەگى شەشىمدەردى ازىرلەۋگە مۇمكىندىك بەرەتىن وزىق Vibe Coding ءادىسى بويىنشا قارقىندى وقۋدان ءوتتى.

كەزدەسۋ بارىسىندا قاداعالاۋ ورگانىنىڭ باسشىسى مەن دوكتور كاي-فۋ ليگە ەكى پيلوتتىق ءونىم تانىستىرىلدى:

– تەرگەۋشىنىڭ جي-كومەكشىسى (قىلمىستىق سحەمالار گەنەراتورى) – قىلمىستىق ىستەر بويىنشا ماتىندىك انىقتامالاردى اۆتوماتتى تۇردە تالداپ، بىرنەشە سەكۋند ىشىندە كورنەكى سحەمالار قۇراستىراتىن بىرەگەي الگوريتم. جاساندى ينتەللەكت قىلمىستىڭ ءمان-جايىن وزدىگىنەن انىقتاپ، قاتىسۋشىلار اراسىنداعى جاسىرىن بايلانىستاردى ايقىندايدى جانە نەگىزگى دالەلدەمەلەردى جۇيەلەيدى. پاراقورلىق پەن جالعان شوت-فاكتۋرالارعا قاتىستى ىستەردە سىناقتان وتكەن بۇل قۇرال پروكۋرورلاردى تەحنيكالىق سيپاتتاعى كۇندەلىكتى جۇمىستان بوساتىپ، ۋاقىتتى ايتارلىقتاي ۇنەمدەيدى.

– ۇلكەن دەرەكتەردىڭ جي-تالداۋشىسى – قىلمىستىق ستاتيستيكانىڭ ءبىر جىلدىق كولەمىن نەبارى 15 مينۋت ىشىندە وڭدەي الاتىن جۇيە. نەيروجەلى قۇقىق بۇزۋشىلىقتاردىڭ تۇرلەرى مەن دەموگرافيالىق كورسەتكىشتەرىن كورنەكى تۇردە بەينەلەيتىن ينتەراكتيۆتى داشبوردتار قالىپتاستىرادى. بۇل شەشىم مەملەكەتتىك دەڭگەيدە الدىن الۋ شارالارىن قابىلداۋ ۇدەرىسىن تۇبەگەيلى جەدەلدەتۋگە مۇمكىندىك بەرەدى.

«بۇگىن ءبىز باس پروكۋراتۋرانىڭ تسيفرلىق جەتىلۋ دەڭگەيىنىڭ جوعارى ەكەنىن كورىپ وتىرمىز. قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت ون جىل ىشىندە قوعام يگىلىگى ءۇشىن – ازاماتتاردى الدىن الا قورعاۋ مەن قوعامدىق قاۋىپسىزدىكتى قامتاماسىز ەتۋ ماقساتىندا پايدالانۋعا بولاتىن وراسان زور دەرەكتەر قورىن جيناقتادى. كودتىڭ بىردە-ءبىر جولىن جازباعان قىزمەتكەرلەر ادامنىڭ مۇمكىندىگىنەن الدەقايدا جوعارى جىلدامدىقپەن دەرەكتەردى وڭدەي الاتىن ونىمدەر ازىرلەۋدە»، – دەدى كاي-فۋ لي تانىستىرىلىم بارىسىندا.

كەزدەسۋ قورىتىندىسى بويىنشا پروكۋرور-ازىرلەۋشىلەردى ودان ءارى وقىتۋ، سونداي-اق ۆەدومستۆو كولەمىندە جۇيەلى «جي-قاباتىن» ەنگىزۋ ءۇشىن باسىم پيلوتتىق كەيستى ايقىنداۋ جونىندە ۋاعدالاستىقتارعا قول جەتكىزىلدى.

جاساندى ينتەللەكت سالاسىنداعى ۇزدىك شەشىمدەردىڭ اۆتورى اتانعان پروكۋرورلارعا العىس حاتتار تابىستالدى.

«XXI عاسىردا باستى دەتەكتيۆ الگوريتمدەر بولادى. ەگەر بۇرىن قىلمىسكەردى ساۋساق ءىزى اشكەرەلەسە، ەندى ونى مىنەز-قۇلىق مودەلى اشكەرەلەيدى. ءبىز ۇرىلاردىڭ، قاراقشىلاردىڭ جانە زورلىق-زومبىلىق جاساۋشىلاردىڭ كۇماندى مىنەز-قۇلىق ۇلگىلەرىن انىقتاۋ ءۇشىن بەينە اعىنداردى تالداۋ مۇمكىندىگىنە جاقىنداپ كەلەمىز. قىلمىسكەر ءجۇزىن جاسىرا الادى، بىراق ءوزىنىڭ مىنەز-قۇلقىن جاسىرا المايدى. وسىلايشا قىلمىستىڭ الدىن الۋ جانە جازانىڭ بۇلتارتپاستىعىن قامتاماسىز ەتۋ تەتىكتەرى كۇشەيەدى. زاڭنىڭ الدىن الا ارەكەت ەتۋ مۇمكىندىگى ارتادى»، – دەپ اتاپ ءوتتى بەرىك اسىلوۆ كەزدەسۋدى قورىتىندىلاي وتىرىپ.

2026 جىل قازاقستاندا تسيفرلاندىرۋ جانە جاساندى ينتەللەكت جىلى بولىپ جاريالاندى. بۇل كەزدەسۋ مەن وندا ۇسىنىلعان بارلىق شەشىمدەر مەملەكەت باسشىسىنىڭ مەملەكەتتىك ينستيتۋتتاردى جاڭعىرتۋ جانە مەملەكەتتىك باسقارۋ ساپاسىن ارتتىرۋ ءۇشىن وزىق تەحنولوگيالاردى پايدالانۋ جونىندەگى تاپسىرمالارىنىڭ ناقتى جۇزەگە اسۋى بولىپ تابىلادى.

Abai.kz