«تازا قازاقستان» – ەلىمىزدىڭ تابيعاتىن قورعاۋ، ەكولوگيالىق مادەنيەتتى نىعايتۋ جانە ازاماتتاردىڭ ەكولوگياعا جاۋاپكەرشىلىگىن ارتتىرۋ ماقساتىندا ۇيىمداستىرىلعان اۋقىمدى رەسپۋبليكالىق باستاما. بۇكىل ەل بويىنشا قورشاعان ورتانى قورعاۋعا باعىتتالعان ءتۇرلى شارالار ءوتىپ جاتىر. الماتى قالاسىنىڭ جوعارى وقۋ ورىندارىنىڭ پروفەسسورلارى مەن وقىتۋشىلارى اكتسيانى قولداپ، ءوز ستۋدەنتتەرىمەن بىرگە سەنبىلىككە شىعىپ، تابيعاتقا قامقورلىق تانىتىپ، ەكولوگيالىق مادەنيەتتى دامىتۋعا بەلسەنە اتسالىسۋدا.

ازاماتتىق اۆياتسيا اكادەمياسىنىڭ پروفەسسورى گۇلناز قاجىمۇراتقىزى تۋلەكوۆا «تازا قازاقستان» اكتسياسىنىڭ قالانى كوركەيتۋگە زور ىقپالىن اتاپ ءوتىپ، «بۇل شارانىڭ باستى ماقساتى – قورشاعان ورتانى لاستانۋدان ساقتاۋ، تۋعان جەرگە دەگەن سۇيىسپەنشىلىكتى وياتۋ» دەپ ءبولىستى. تابيعاتتىڭ تازالىعىن ساقتاۋعا ۇلەس قوسۋ – ءاربىر ازاماتتىڭ مىندەتى ەكەنىن ايتقان پروفەسسور الماتىنىڭ كوركى مەن تازالىعىن ساقتاۋعا شاقىردى.

قازاق ۇلتتىق اگرارلىق زەرتتەۋ ۋنيۆەرسيتەتىنىڭ پروفەسسورى لاززات الديباەۆا دا ەكولوگيالىق مادەنيەتتى دامىتۋدىڭ اركىمنىڭ قاراپايىم ادەتتەرىنەن باستالاتىنىن باسا ايتتى. ونىڭ ويىنشا، «سۋ مەن جارىقتى ۇنەمدەپ جۇمساۋ، قوقىس تاستاماۋ سياقتى قاراپايىم قادامدار ارقىلى ەكولوگيالىق مادەنيەتىمىزدى ارتتىرا الامىز». پروفەسسور ەكولوگياعا قامقورلىقتى تەك ءسوز جۇزىندە ەمەس، ءىس جۇزىندە جۇزەگە اسىرۋ قاجەتتىگىن اتاپ ءوتتى.

م.تىنىشپاەۆ اتىنداعى ALT ۋنيۆەرسيتەتىنىڭ پروفەسسورى داۋلەتحان نايمان ستۋدەنتتەرىمەن بىرگە سەنبىلىككە شىعىپ، ءوز ۋنيۆەرسيتەتىنىڭ  ماڭايىنداعى اۋماقتاردى تازارتۋ ارقىلى قورشاعان ورتاعا قامقورلىق جاساۋدى داستۇرگە اينالدىرعانىن ايتتى. ستۋدەنتتەر قوقىستاردى سۇرىپتاپ، قايتا وڭدەۋگە جىبەرۋگە اتسالىسۋدا جانە بولاشاقتا بۇل باستامانى جۇيەلى تۇردە جالعاستىرۋدى جوسپارلاپ وتىر.

ال قازاق ۇلتتىق ۋنيۆەرسيتەتىنىڭ پروفەسسورى سالتانات تۋماجانوۆا «تازا قازاقستان» اكتسياسىن جاھاندىق ەكولوگيالىق ماسەلەلەرگە جاۋاپ رەتىندە قاراستىرىپ، ەكولوگيالىق مادەنيەتتى قالىپتاستىرۋدىڭ ماڭىزدىلىعىن اتاپ ءوتتى. ول ستۋدەنتتەر مەن وقىتۋشىلاردىڭ بىرلەسە وتىرىپ ۋنيۆەرسيتەت اۋماعىن تازارتۋ جۇمىستارى ارقىلى جاستاردى تابيعاتتى ايالاۋعا تاربيەلەيتىنىن ايتتى. «وسى باستامالار ارقىلى ءبىز تازا جانە جاسىل بولاشاققا قادام باسامىز»، – دەدى ول.

وسىلايشا، الماتىنىڭ پروفەسسورلىق-وقىتۋشىلىق قۇرامى مەن ستۋدەنتتەرى «تازا قازاقستان» اكتسياسى اياسىنداعى باستامانى قولداي وتىرىپ، ولار تۋعان جەرگە دەگەن سۇيىسپەنشىلىكتى، تابيعاتقا دەگەن قۇرمەتتى بولاشاق ۇرپاققا جەتكىزۋدە.

Abai.kz