بالقاش كولىنە وتكەن جىلمەن سالىستىرعاندا 4 ملرد تەكشە مەتر ارتىق سۋ جىبەرىلدى، دەپ حابارلايدى Halyq Uni.

سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، بيىل ەلىمىزدىڭ سۋ قويمالارىنا رەكوردتى – 75 ملرد تەكشە مەتردەن استام سۋ جينالدى. ونىڭ 12 ملرد تەكشە مەتردەن استامى تاسقىن سۋى.

تاسقىن سۋىن دۇرىس ءبولۋ سۋ قويمالارىن تولتىرىپ قانا قويماي، سوڭعى جىلدارى قۇرعاۋعا اينالعان وزەندەر مەن كولدەرگە، شابىندىقتارعا، تابيعي جايىلىمدارعا جانە باسقا دا ايدىندارعا سۋ جىبەرۋگە مۇمكىندىك بەردى، – دەپ قوستى ۆەدومستۆو.

جىل باسىنان بەرى بالقاش كولىنە 15,4 ملرد تەكشە مەتر سۋ كەلدى. بۇل وتكەن جىلعى كورسەتكىشتەن 4 ملرد تەكشە مەترگە ارتىق. ونىڭ ىشىندە تاسقىن كەزىندە 3,3 ملرد تەكشە مەتر سۋ ءتۇستى. جىل باسىنان بەرى كاسپي تەڭىزىنە 17 ملرد تەكشە مەتر سۋ كەلدى. الماتى وبلىسىنداعى قاپشاعاي سۋ قويماسى سوڭعى 10 جىلدا العاش رەت 100%-عا تولىپ، 18 ملرد تەكشە مەتردەن استام سۋ جينادى. سۋ تاسقىنى كەزىندە باتىس قازاقستان وبلىسىنىڭ قامىس-سامار كولدەرىنە 80 ملن تەكشە مەتر سۋ جىبەرىلدى. ۇلىتاۋ وبلىسىنان قىزىلوردا وبلىسىنا 839 ملن تەكشە مەتر سۋ كەلدى. وسىنىڭ ارقاسىندا، باقىلاۋ تاريحىندا العاش رەت بۇل سۋ سارىسۋ وزەنى ارقىلى قىزىلوردا وبلىسىنىڭ كولدەر جۇيەسىنە جەتتى.

سۋ ديپلوماتياسى، سۋدى ءدال ءبولۋ جانە سۋ ۇنەمدەۋ تەحنولوگيالارىن ەنگىزۋ ارقىلى ەلىمىزدىڭ وڭتۇستىگىندە سۋ بالانسىن جاقسارتۋعا قول جەتكىزىلدى. ماسەلەن، بيىل سولتۇستىك ارالعا شامامەن 2,5 ملرد تەكشە مەتر سۋ جىبەرىلدى. بۇل 2023 جىلمەن سالىستىرعاندا 400 ملن تەكشە مەترگە ارتىق. بۇل رەتتە، قىزىلوردا وبلىسىنىڭ شارۋالارى سۋ ۇنەمدەۋ تەحنولوگيالارىن پايدالانعاندىقتان 200 ملن تەكشە مەترگە دەيىن سۋ ۇنەمدەپ، ول سۋ سولتۇستىك ارالعا جىبەرىلگەنىن دە ايتا كەتكەن ءجون. جىل باسىنان بەرى قىزىلوردا وبلىسىنىڭ كولدەر جۇيەسىنە 4,7 ملرد تەكشە مەتردەن استام سۋ جىبەرىلدى. سالىستىرۋ ءۇشىن، وتكەن جىلى بۇل كورسەتكىش شامامەن 4,3 ملرد تەكشە مەتر ەدى.

«ءبىز ارقاشان سۋ رەسۋرستارىن بولۋدە ەكونوميكا قاجەتتىلىكتەرى مەن سۋ نىساندارى ەكوجۇيەسىن قولداۋ اراسىنداعى دۇرىس تەپە-تەڭدىكتى ىزدەيمىز. بيىل شارۋالار مەن باسقا دا سۋ پايدالانۋشىلارعا كەرى اسەرىن تيگىزبەستەن ۇلكەن جانە شاعىن سۋ ايدىندارىن ساقتاۋ جانە قالپىنا كەلتىرۋ بويىنشا ۇلكەن جۇمىس اتقارىلدى. مىسالى، وتكەن سۋارۋ كەزەڭىندە ەلىمىزدىڭ شارۋا قوجالىقتارىنا شامامەن 11 ملرد تەكشە مەتر سۋ بەرىلدى. بولاشاقتا بۇل باعىتتا جۇمىس جاقسارادى. ونىڭ ىشىندە سۋدى ساۋاتتى باسقارۋ جانە تۇتىنۋعا باسىمدىق بەرەتىن جاڭا نورماتيۆتىك-قۇقىقتىق بازا قۇرۋ ەسەبىنەن دە ناتيجەگە جەتۋگە نيەتتىمىز»، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz