ءۇشىنشى جىل جالعاسىپ جاتقان رەسەي مەن ۋكراينا سوعىسىنا قاتىستى ماڭىزدى اقپاراتتارعا شولۋ ۇسىنباقپىز...

ءپۋتيننىڭ كومەكشىسى: «ۋكراينا مەن مولدوۆا مەملەكەت رەتىندە مۇلدەم جوق  بولادى»

رەسەي پرەزيدەنتىنىڭ كومەكشىسى نيكولاي پاترۋشەۆ: «2025 جىلى ۋكراينا مەملەكەت رەتىندە كارتا بەتىنەن سىزىلادى»، - دەپ مالىمدەدى. «اسىرەسە، نەوناتسيستىك يدەولوگياعا كۇشتەپ ماجبۇرلەۋ مەن اسىرە رۋسسوفوبيانىڭ ۋكراينانىڭ ءبىر كەزدەرى گۇلدەنگەن قالالارىن، سونىڭ ىشىندە حاركوۆ، ودەسسا، نيكولاەۆ، دنەپروپەتروۆسك قالالارىن قۇرتىپ جاتقانى الاڭداتادى. الداعى جىلى ۋكراينا مەملەكەت رەتىندە مۇلدەم جوق بولۋى مۇمكىن»، - دەدى پاترۋشەۆ.

سۋرەت: ria.ru

پاترۋشەۆ قىزدى-قىزدىمەن: «كيشينەۆتىڭ رەسەيگە قارسى اگرەسسيۆتى ساياساتى مولدوۆانىڭ نە باسقا مەملەكەتتىڭ قۇرامىنا كىرۋىنە، نە مۇلدەم ءوز ءومىر ءسۇرۋىن توقتاتۋىنا الىپ كەلەدى.  بۇل جاعدايدا ۋكراينانىڭ مىسالىن ءسوز ەتۋگە بولادى، وندا نەوناتسيزم مەن رۋسوفوبيا ارنايى اسكەري وپەراتسيادان بۇرىن ەلدى كۇيرەۋگە باستاپ الىپ كەلدى»، - دەگەن ويىن قوستى .

ول: «رەسەي مەن اقش ۋكراينا بويىنشا باسقا ەلدەردىڭ قاتىسۋىنسىز كەلىسسوزدەر جۇرگىزۋگە ءتيىس. ەشقانداي لوندونمەن جانە بريۋسسەلمەن سويلەسۋگە قاقىلارى دا جوق. ەۋروپالىق وداق باسشىلىعىنىڭ بىرقاتار مۇشەلەرىنىڭ، ونىڭ ىشىندە ەۋروپاداعى تۇراقتىلىققا مۇددەلى جانە رەسەيگە قاتىستى سالماقتى ۇستانىمدى ۇستاناتىن ۆەنگريا، سلوۆاكيا، اۆستريا، رۋمىنيا جانە ەۋروپانىڭ باسقا دا كەيبىر ەلدەرىنىڭ اتىنان سويلەۋگە ولار ءۇشىن ەشكىمدە قۇقىق بەرگەن جوق»، - دەپ، كەڭىنەن كوسىلە گاپىرىپ الدى.

سۋرەت: novostipmr.com

كيشينەۆ پاترۋشەۆتىڭ مالىمدەمەلەرىنە جاۋاپ بەردى!

مولدوۆا سىرتقى ىستەر مينيسترلىگى رەسەي پرەزيدەنتىنىڭ كومەكشىسى نيكولاي پاترۋشەۆتىڭ «مولدوۆا بيلىگىنىڭ رەسەيگە قارسى ساياساتى بۇل ەلدىڭ مۇلدەم مەملەكەت رەتىندە جويىلۋىنا الىپ كەلۋى مۇمكىن» دەگەن سوزىنە قارسى جاۋاپ قاتتى.

«مۇنداي مالىمدەمەلەر ەلىمىزدىڭ ىشكى ىستەرىنە قول سۇعۋشىلىق. بۇل ءوڭىردى تۇراقسىزداندىرۋعا باعىتتالعان قادام بولىپ تابىلادى. مولدوۆا رەسپۋبليكاسى ءوز ازاماتتارىنىڭ ەركىنە سايكەس دەموكراتيا جانە ەۋروپالىق ينتەگراتسيا جولىمەن دايەكتى تۇردە ءجۇرىپ كەلە جاتقان ەگەمەندى مەملەكەت»، - دەدى مولدوۆا سىرتقى ساياسي ۆەدومستۆوسى.

سۋرەت: euronews.com

ترامپ ۋكراينانى ءپۋتيننىڭ جەمساۋىندا كەتىرە مە؟

الەم اقش-تىڭ جاڭا سايلانعان پرەزيدەنتى دونالد ترامپتىڭ يناۋگۋراتسياسىن ەكى كوزدەرى ءتورت بولا كۇتۋدە. بىرنەشە كۇننەن كەيىن امەريكانىڭ جاڭا پرەزيدەنتى رەسمي تۇردە ءوز قىزمەتىنە كىرىسەدى. ال سولاي بولا تۇرا، «Bloomberg» اگەنتتىگى ءوز دەرەككوزدەرىنە سىلتەمە جاساپ، ۆلاديمير پۋتينمەن كەزدەسۋگە دايىندالىپ جاتقان ترامپتىڭ ۋكراينا تاعدىرىنا مۇددەلى ەمەستىگىن حابارلاپ، الەم جۇرشىلىعىنا جەر شۇقىتتى.

ويتكەنى، ترامپ اقش ءۇشىن ۋكراينانىڭ رەسەيگە قارسى سوعىسىنىڭ ستراتەگيالىق ماڭىزىن جەتە تۇسىنبەيدى.

ترامپ ۋكراينانى پۋتينگە بەرە مە؟ ونىڭ ورنىنا نە قالايدى؟ ۋكراينا ەۋرووداقتىڭ كومەگىنە عانا سۇيەنە وتىرىپ، اقش قولداۋىنسىز رەسەيمەن سوعىسقا شىداي الا ما؟ دەگەن ساۋالدار پۋتين: «ورىس ءتىلدى رەسپۋبليكادا تۇراسىڭدار» دەگەن قازاقتاردى دا الاڭداتا باستادى.

پەنتاگون باسشىسىنا كانديدات: «ءبىز اگرەسسوردىڭ كىم ەكەنىن بىلەمىز...»

دونالد ترامپ اقش قورعانىس ءمينيسترى لاۋازىمىنا ۇسىنعان پيت حەگسەت ءوزىنىڭ كانديداتۋراسىن قاراۋعا ارنالعان تىڭداۋلاردا اقش كونگرەسى سەناتىنىڭ قارۋلى كۇشتەر ىستەرى جونىندەگى كوميتەتىندە  ءسوز سويلەپ، بولاشاق اكىمشىلىك ۋكرايناداعى سوعىستىڭ تابيعاتىن تۇسىنەتىنىن جانە ونىڭ تەزىرەك اياقتالۋىن قولدايتىنىن مالىمدەدى.

سەناتور انگۋس كينگ حەگسەتتەن رەسەيدىڭ ۋكرايناعا قارسى سوعىسىنا قاتىستى ونىڭ ۇستانىمىن سۇراعاندا: «اقش-تىڭ كەلەسى پرەزيدەنتى ۋكرايناداعى «قاقتىعىستى» كيەۆ ءۇشىن بارىنشا ءتيىمدى جولمەن رەتتەۋگە تىرىسادى»، - دەپ مالىمدەدى حەگسەت.

پەنتاگون باسشىسى لاۋازىمىنا ۇمىتكەردەن ۆاشينگتوننىڭ جاڭا اكىمشىلىگى «ۋكراينانى تاستاپ كەتۋدى» جوسپارلاپ وتىرعانىن انىقتاپ بەرۋىن سۇراعان شاقتا حەگسەت: «بۇل پرەزيدەنتتىك دەڭگەيدەگى ساياسي شەشىم. ترامپ بۇل قاقتىعىستىڭ اياقتالعانىن كورگىمىز كەلەتىنىن انىق ايتتى.

ءبىز اگرەسسوردىڭ كىم ەكەنىن بىلەمىز. ءبىز جاقسى جىگىتتىڭ كىم ەكەنىن دە بىلەمىز. ءبىز ونى (شەشىمدى) ۋكرايندىقتار ءۇشىن بارىنشا ءتيىمدى بولادى دەپ ويلايمىز. قانشا دەگەنمەن بۇل سوعىس توقتاتىلۋعا ءتيىس»، - دەپ اتاپ ءوتتى حەگسەت.

ءابىل-سەرىك الىاكبار

Abai.kz