مەملەكەتتىك كىرىستەر كوميتەتى الەۋمەتتىك جەلىدە ءتۇرلى جارنامالىق ماتەريالدار ورنالاستىرىپ، قىرۋار تابىس تاۋىپ جۇرگەن بلوگەرلەردىڭ سالىق تولەۋگە مىندەتتى ەكەنىن حابارلادى.

«ءتۇرلى اقپارات كوزدەرىنەن الىنعان دەرەكتەردى ۇسىنىلعان سالىق دەكلاراتسيالارىنىڭ مالىمەتتەرىمەن سالىستىرۋ قورىتىندىسى بويىنشا 594 تۇلعالارعا 53,3 ملرد تەڭگەگە سايكەسسىزدىكتەر بەلگىلەندى. ناتيجەسىندە اعىمداعى جىلدىڭ 13-14 اقپان ارالىعىندا «كىرىستەردى تومەندەتۋ» بۇزۋشىلىقتارى بويىنشا كامەرالدىق باقىلاۋ حابارلامالارى جىبەرىلدى. حابارلامانى ورىنداۋ ماقساتىندا دەربەس ەسەپتەلگەن سالىقتاردى تولەي وتىرىپ، قوسىمشا سالىق ەسەپتىلىگىن تاپسىرادى نەمەسە حابارلامامەن كەلىسپەگەن جاعدايدا تۇسىندىرمەنى ۇسىنۋ قاجەت»، دەلىنگەن كوميتەت حابارلاماسىندا.

وكىلەتتى ورگان بلوگەرلەرگە 30 كۇنگە مۇرسات بەرىپ وتىر. وسى ۋاقىت ىشىندە قانداي دا ءبىر جاۋابىن بەرۋى ءتيىس.

بلوگەرلەر مىنا ارەكەتتەرى ءۇشىن سالىق تولەۋگە مىندەتتى:

ءارتۇرلى ينتەرنەت-رەسۋرستارىندا ونلاين-جارنامالاردى جاريالاعانى، ياعني:

• اقپاراتتىق ونىمدەردى جىلجىتۋ
• ءتۇرلى ونىمدەردى ساتۋ
• ءارتۇرلى وقىتۋ كۋرستارىن ساتۋ
• ۇتىس ويىندارىن وتكىزۋ

جانە تاعى دا باسقا تابىس تابۋ كوزدەرى.

ارينە، ولار ءبىز تولەۋگە مىندەتتەلگەن سومانىڭ كولەمى تىم كوپ دەپ، كەلىسپەيتىندىكتەرىن ءبىلدىرىپ جاتىر.

Abai.kz