قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ ەۋروپالىق وداق وكىلدىگىنىڭ ۋاقىتشا سەنىمدى وكىلى يوحاننەس باۋرمەن بىرگە ەو-عا مۇشە مەملەكەتتەردىڭ ديپلوماتيالىق ميسسيالارى باسشىلارىنىڭ، سونداي-اق بىرقاتار جەتەكشى ەۋروپالىق ونەركاسىپ كومپانيالارى باسشىلارىنىڭ قاتىسۋىمەن «قازاقستان – ەۋرووداق» ديالوگتىك پلاتفورماسىنىڭ 16-شى وتىرىسىن وتكىزدى.

ەۋروپالىق وداق قازاقستاننىڭ حالىقارالىق ارەناداعى ماڭىزدى سەرىكتەسى بولىپ سانالادى. 2005–2024 جىلدار ارالىعىندا وداق ەلدەرىنەن قازاقستانعا تىكەلەي ينۆەستيتسيالاردىڭ جالپى اعىنى $200 ملرد-تان استى، بۇل ەلىمىزگە كەلگەن تىكەلەي شەتەلدىك ينۆەستيتسيالاردىڭ جالپى كولەمىنىڭ 47,8%-ىن قۇرادى.

سۋرەت: primeminister.kz سايتىنان الىندى.

«بۇگىندە ەۋروپالىق وداق – قازاقستاننىڭ ءىرى ساۋدا جانە ينۆەستيتسيالىق سەرىكتەسى. بۇل ەلىمىزدىڭ سىرتقى ساۋداسىنىڭ ۇشتەن بىرىنەن استامىن جانە تارتىلعان ينۆەستيتسيانىڭ جارتىسىن قۇرايدى. وتكەن جىلى ەلدەرىمىز اراسىنداعى ءوزارا تاۋار اينالىمى 17%-عا ءوسىپ، $50 ملرد-قا جەتتى. ءبىز ەۋروپاعا جەتكىزىلەتىن تاۋار نومەنكلاتۋراسىن ودان ءارى كەڭەيتۋگە جانە ارتاراپتاندىرۋعا مۇددەلىمىز»، — دەپ اتاپ ءوتتى ولجاس بەكتەنوۆ.

قازاقستان پرەزيدەنتى قاسىم-جومارت توقاەۆتىڭ تاپسىرمالارىن جۇزەگە اسىرۋ شەڭبەرىندە ساۋدا-ەكونوميكالىق ىنتىماقتاستىقتى ارتتىرۋ ماقساتىندا جەكە ينۆەستيتسيالار اعىنى ءۇشىن بارىنشا قولايلى ىسكەرلىك احۋال قالىپتاستىرۋ بويىنشا جۇيەلى جۇمىستار جۇرگىزىلۋدە.

جاڭا ينۆەستيتسيالىق تسيكلدى باستاۋعا جانە ەلىمىزدىڭ ءجىو-ءنى ەكى ەسەگە ارتتىرۋ جونىندەگى ستراتەگيالىق مىندەتتى قول جەتكىزۋگە باعىتتالعان 2029 جىلعا دەيىنگى جاڭارتىلعان ينۆەستيتسيالىق ساياسات تۇجىرىمداماسى ىسكە اسىرىلۋدا.

ۇكىمەت نورماتيۆتىك راسىمدەردى بيۋروكراتيادان ارىلتۋ جانە وڭتايلاندىرۋ ءۇشىن مەملەكەتتىك باسقارۋعا تسيفرلىق شەشىمدەر ەنگىزۋدە. ۇلتتىق تسيفرلىق ينۆەستيتسيالىق پلاتفورماسى، سونداي-اق ليتسەنزيالاۋ پروتسەستەرىنىڭ اشىقتىعىن قامتاماسىز ەتەتىن minerals.gov.kz جانە e-qazyna.kz پورتالدارى ىسكە قوسىلدى. شيكىزات وڭدەۋدى جانە قوسىلعان قۇنى جوعارى دايىن ءونىم شىعارۋدى باسىم تۇردە دامىتۋ ءۇشىن زاڭنامالىق بازا جەتىلدىرىلۋدە. قابىلدانعان شارالار بيزنەسكە كەدەرگىلەردى جويۋعا، ەكونوميكانى ىرىقتاندىرۋعا باعىتتالعان.

سۋرەت: primeminister.kz سايتىنان الىندى.

«قازاقستانمەن بىرگە ءبىز تسيفرلاندىرۋدى قولداۋ جانە گەودەرەكتەردى باسقارۋ سياقتى ناقتى ءىس-قيمىلدارعا ەرەكشە نازار اۋدارا وتىرىپ، 2025–2026 جىلدارعا ارنالعان ستراتەگيالىق ارىپتەستىكتىڭ جول كارتاسىن ازىرلەپ جاتىرمىز»، — دەپ اتاپ ءوتتى يوحاننەس باۋر.

ءسوز العان گەرمانيا ەلشىسى مونيكا يۆەرسەن، فرانتسيا ەلشىسى سيلۆان گيوگە، پولشانىڭ ۋاقىتشا سەنىمدى وكىلى ميحال رافال لابەندا ساۋدا، عىلىم جانە ونەركاسىپ كووپەراتسياسى سالالارىنداعى ءوزارا ءىس-قيمىلدى نىعايتۋ تۋرالى ۇسىنىستار جاسادى.

تاۋ-كەن ونەركاسىبى سالاسىنداعى بىرقاتار باستاما تۋرالى، اۋە گەوفيزيكاسى جانە كارتوگرافيالىق گەوفيزيكا سالاسىنداعى الەمدىك كوشباسشى، يسپاندىق Xcalibur Multiphysics كومپانياسىنىڭ باس ديرەكتورى اندرەس بلانكو; جابدىقتىڭ ءىرى جەتكىزۋشىسى فيندىك Metso كومپانياسىنىڭ ورتالىق ازيا ايماعى بويىنشا ۆيتسە-پرەزيدەنتى كاميل الياۋتدينوۆ; تاۋ-كەن ونەركاسىبى، ينفراقۇرىلىم جانە تابيعي رەسۋرستاردى وندىرۋگە ارنالعان جابدىقتار مەن شەشىمدەردىڭ الەمدىك جەتەكشى ءوندىرۋشىسى Epiroc شۆەد كومپانياسىنىڭ ورتالىق ازيا بويىنشا وڭىرلىك باس مەنەدجەرى كامشات گاليەۆا.

كوتەرىلگەن ماسەلەلەرگە قر ونەركاسىپ جانە قۇرىلىس، ەكولوگيا جانە تابيعي رەسۋرستار، عىلىم جانە جوعارى ءبىلىم مينيسترلىكتەرىنىڭ باسشىلىعى تۇسىنىكتەمە بەردى.

Abai.kz