قوناەۆتاعى جازعى تۋريستىك ماۋسىم اياقتالۋعا جاقىن. جىل سايىن مىڭداعان تۇرعىن مەن قالا قوناعىن قابىلدايتىن جاعاجايلاردا دەمالىسپەن قاتار قاۋىپسىزدىككە دە ەرەكشە كوڭىل بولىنەدى. وسى جاۋاپتى جۇمىستىڭ الدىڭعى شەبىندە – ادام ءومىرىن ساقتاۋدى باستى مىندەتى سانايتىن قۇتقارۋشىلار.

بيىلعى شومىلۋ ماۋسىمىندا قوناەۆ قالاسىنىڭ كوممۋنالدىق جاعاجايلارىندا قىزمەت اتقارعان قۇتقارۋشىلار 200-دەن استام ادامنىڭ ءومىرىن ساقتاپ قالدى. ولاردىڭ ارقايسىسى – دەر كەزىندە جاسالعان ارەكەت پەن كاسىبي شەبەرلىكتىڭ ناتيجەسى.

سۋداعى توتەنشە جاعداي ساناۋلى سەكۋندتا ورىن الۋى مۇمكىن. كەي جاعدايدا دەمالۋشىلار قاۋىپسىزدىك تالاپتارىن ەلەمەي، ءوز مۇمكىندىگىن دۇرىس باعالامايدى. ءبىرىنىڭ اياعى تارتىلسا، ەندى ءبىرى تەرەڭدىككە كەتىپ، وزدىگىنەن جاعاعا شىعا الماي قالادى. وسىنداي ساتتەردە قۇتقارۋشىلار بىردەن ىسكە كىرىسىپ، ادام ءومىرىن اراشالاپ قالادى.

وسى ماۋسىمدا ەڭ كوپ ادامدى قۇتقارعان قىزمەتكەرلەردىڭ ەڭبەگى ەرەكشە اتالىپ ءوتتى. قالا اكىمىنىڭ ورىنباسارى مارات تۇرسىن ولارعا قالا اكىمىنىڭ العىس حاتتارىن تابىستادى.

ماراپاتتالعانداردىڭ قاتارىندا:

سايات نۇرتاي – 11 ادامدى قۇتقارعان;
داۋلەت كۋمارحان – 10 ادامدى قۇتقارعان;
سامعات سارسەك – 12 ادامدى قۇتقارعان;
دميتري زينوۆەۆ – 8 ادامدى قۇتقارعان;
نۇربول ماراتۇلى – 8 ادامدى قۇتقارعان.

ماراپاتتاۋ راسىمىندە قالا اكىمىنىڭ ورىنباسارى قۇتقارۋشىلاردىڭ ەڭبەگىنە جوعارى باعا بەردى.

«قۇتقارۋشى – قيىن ساتتە ءبىرىنشى بولىپ كومەككە كەلەتىن، ءوز ومىرىنە قاۋىپ تونسە دە، وزگەنىڭ ءومىرىن قۇتقارۋدى باستى مىندەتى سانايتىن مامان. بۇل – ۇلكەن جۇرەك پەن جوعارى كاسىبيلىكتى تالاپ ەتەتىن جاۋاپتى قىزمەت. سىزدەرگە ادال قىزمەتتەرىڭىز، باتىلدىقتارىڭىز بەن جوعارى جاۋاپكەرشىلىكتەرىڭىز ءۇشىن العىس ايتامىن. ارقايسىڭىزعا مىقتى دەنساۋلىق، وتباسىلارىڭىزعا اماندىق، قىزمەتتەرىڭىزگە تابىس تىلەيمىن»، – دەدى مارات تۇرسىن.

ماراپاتتالعان قۇتقارۋشىلاردىڭ ءبىرى – سامعات سارسەك ءۇشىن بۇل ماۋسىمداعى ەڭ ەستە قالعان جاعداي كەشە بولعان. №5 جاعاجايعا دەمالۋعا كەلگەن جاستاردىڭ ءبىرى سۋعا تۇسكەن كەزدە اياعى تارتىلىپ، باتا باستاعان. جاعدايدى دەر كەزىندە بايقاعان سامعات بىردەن سۋعا ءتۇسىپ، جاس جىگىتتى قاۋىپسىز جەرگە الىپ شىققان.

«ءبارى بىرنەشە سەكۋندتىڭ ىشىندە بولدى. ونىڭ قينالىپ جاتقانىن كورگەن بويدا ويلانباستان كومەككە باردىم. باستىسى – ادامدى امان الىپ قالۋ»، – دەيدى قۇتقارۋشى.

قۇتقارۋشىلاردىڭ ايتۋىنشا، سۋداعى قاۋىپسىزدىككە سالعىرت قاراۋعا بولمايدى. قاۋىپتىڭ الدىن الۋدىڭ ەڭ ءتيىمدى جولى – بەلگىلەنگەن جاعاجايلاردا شومىلۋ، بالالاردى قاراۋسىز قالدىرماۋ جانە ءوز مۇمكىندىگىن دۇرىس باعالاۋ.

Abai.kz