Reuters اگەنتتىگى دەرەككوزگە سۇيەنە وتىرىپ، رەسەي اقش-قا ۋكراينادا اتىستى توقتاتۋ بويىنشا كەلىسسوزدى باستاماي تۇرىپ، ورىندالۋى ءتيىس شارتتاردى تاپسىردى دەپ حابارلادى.

دەرەككوزدەردىڭ ايتۋىنشا، رەسەيلىك ۇسىنىستاردىڭ بۇعان دەيىن ماسكەۋ ايتقان تالاپتاردان ايىرماشىلىعى جوق. ولاردىڭ اراسىندا ۋكراينانىڭ ناتو-عا ۇمتىلماۋى، رەسەي باسىپ العان ۋكراينا جەرىن “ورىس جەرى” دەپ تانۋ، ۋكراينادا شەتەل اسكەرىن ورنالاستىرماۋ سياقتى شارتتار بار.

11 ناۋرىزدا ساۋد ارابياسىندا اقش وكىلدەرىمەن كەلىسسوز كەزىندە ۋكراينا اتىستى 30 كۇنگە توقتاتۋعا كەلىسكەن. رەسەي جاعى بۇل ۇسىنىستارعا جاۋاپ بەرمەدى.

اقش مەملەكەتتىك حاتشىسى ماركو رۋبيو كرەمل كەلىسكەن جاعدايدا اتىستى توقتاتۋ تۋرالى كەلىسىمگە بىرنەشە كۇن ىشىندە قول قويىلۋى مۇمكىن ەكەنىن ايتقان. ۆاشينگتون “ۇلكەن جەتىلىكتىڭ” باسقا ەلدەرىمەن بەيبىت كەلىسسوز كەزىندە ءوزارا ارەكەتتەسۋگە نيەت بىلدىرگەن. بۇل توپقا اقش-تىڭ وزىنەن بولەك، ۇلىبريتانيا، گەرمانيا، يتاليا، كانادا، فرانتسيا جانە جاپونيا كىرمەك. ولاردىڭ بارلىعى رەسەي باسقىنشىلىعى كەزىندە ۋكراينانى قولداعان.

دەرەككوزى: ازاتتىق راديوسى

Abai.kz